Yakobo 5 - Bibilia Ilagano Lya Kale 2015

Kūhūgūlwa kwa basabi

¹ Degelekagi ning'we a basabi, līlagi na mutūle ng'hūngū, kūlwa makoye ayo galamugwīle.

² Nguno ū būsabi wing'we būlībola, nī shizwalo shing'we shilīmalwa fufuuji!

³ Mukwibīkījaga sabo kūlwa shikū ja kū būtongi, alīyo pyī ī zahabu jing'we nī feza jing'we jilīkenaagūlwa būkelebu. Ū būbi ūbo būlīfuma musho būkūmukaanīla; nīyo būkūmukenaagūja ī mibīlī ying'we, ībize gītī ībabūlilwe mu moto.

⁴ Nguno managi gīkī ī mheela ja batūmami jilīlīla, ī ja bagesi ba mu migūnda ying'we abo mukūlemaga kūbalīpa; ī ng'hūngū ya batūmami benabo yashikile mu matū ga ng'wa Seeba wa mabita.

⁵ Ū mu būpanga wing'we bo mu sī mukwiyejaga na kwīta gīt'ūmo mutogelilwe; gwike managi gīkī mukwilishaga mugīne kūlwa lūshikū lo kūsīnzwa!

⁶ A bing'we ū ntūngīlīja mukūnamulaga ng'wamūlaga; alīyo ū wei atī na būdūla bo kūmulemeja ī ying'we!

Wiyūmīlīja na kūlahīla

⁷ Hūna lūūlū badūgū, bizagi biyūmīlīja kūshisha ize ū Seeba; ilangīlagi halī nīmi, ū ng'wene akalindīīlaga mu wiyūmīlīja gīkī a matwajo ayo agasanije gatūlwe mbula kwandīja ya kwandya kūshisha ya kūmalīja.

⁸ Na a bing'we bizagi biyūmīlīja muhandatīle ū mung'holò jing'we, nguno ū kwiza kwa ng'wa Seeba kwegeelaga.

⁹ Badūgū, yaya ū kwikala ng'widugumīla, mutizūgwa mu nsango; nguno ū namuji wegeelaga, alī ha nyango wīmīīlga.

¹⁰ Iganikagi ūmo baluhīlaga a bahangi abo bahayaga mu lina lya ng'wa Seeba, ilangagi kūfuma mu wiyūmīlīja wabo.

¹¹ Managi gīkī a biyūmīlīja tūkababalaga kūbiza balī na lubango. Ī gīsī angū mubūmanile ū wiyūmīlīja bo ng'wa Ayobu? Ū kū ng'halīlo yaho angū mulībona ū Seeba ūmo alī, gīkī nchīīji wa shigongo, na nsaatwa ntaale wa banhū!

¹² Nīyo hangī a higūlya ya yose yenīyo badūgū bane, yaya ū kwilahīla, ībize bo kūlīhaya igūlū, nūūlū sī; yaya nūūlū kūtūmamīla shilahīlo shingī na shingī, mutizūgwa mu nsango, alīyo ī Ehe ying'we ībize Ehe, nī Yaya nayo ībize Yaya.

Nguzu ja mu kūlomba

¹³ Alīho ose ose alī na makoye ū mu bing'we? Ni alombage. Nūūlū alīho ose ose ūyo alī na būyegi? Ni īmbage lyīmbo lya kūkumīlīja.

¹⁴ Hamo nūūlū alīho ūmò wing'we akūsaataga? Ni itanage banamhala ba kanisa bize banombele na kūmila maguta mu lina lya ng'wa Seeba.

¹⁵ Ū būlombi bo mu kūzunya būkūmpīja ū nsaatu, ū Seeba akūngūngūmūla; nūūlū akabiza wīta shibi akūlekejiwa.

¹⁶ Hūna lūūlū ng'witambūlīla ī shibi shing'we būlī ng'wene kū biye, na ng'wilombela bing'we kū bing'we gīkī mupījiwe. Ū būlombi bo ng'wa munhū ntūngīlīja būlī na nguzu na būkagunanhaga.

¹⁷ Ū Eliya walī munhū gīt'ūmo tūlī bise, ū mu kūlomba kwakwe akalomba ītizūtūla mbula; na ng'hana ītatūlile ī mbula ū mu sī, kūshisha yūbīta myaka idatū na myeji ītandatū.

¹⁸ Aho walomba hangī, ī ligūlū lyenha mbula, nayo ī sī yūtwaja matwajo gayo.

¹⁹ Badūgū bane, ūlū ūmò wing'we ūtala wīnga ū mu ng'hana, hūna wigela ūmò wa kūnshosha,

²⁰ managi gīkī ū wa kūngalūcha munhū wa shibi īnge mu būbi bokwe, akūbiza wabūpīja ū būpanga bokwe; nīyo akūkundīkīja būbi wa mbika ningī.