wandījo 45 - Bibilia Ilagano Lya Kale 2015

Yosefu kwimanīīcha

¹ Nose yūmuna ū Yosefu, ūlemeelwa ū kwiyūmīlīja ū kū būtongi wa batūmami bakwe abo baalīho; ūūtandūka kūlīla alīhaya, “Bapeejagi pye abo balī ng'wenūmu, bīnge ū kū būtongi wane.” Hūna ū Yosefu wimanīīcha ū kū baana ba ng'wawe, a bangī pye batīho.

² Ūlīla no n'ilaka lya higūlya kūshisha a Bamisili bigwa, nū kwikūlū lya ng'wa Falao gūshika ko ū mhayo gwenūyo.

³ Ū Yosefu ūbawīla, “Ū nene nalī Yosefu! Ū baba ataalī alīho mpanga?” A baana ba ng'wawe būjinjimala bagayiagwa ū gwa kūshosha, bakūdetemaga dūhū ū kū būtongi wakwe.

⁴ Hūna ū Yosefu ūbawīla a baana ba ng'wawe gīkī, “Bing'we egeelagi aha!” Aho bīīta gīko ūbawīla, “Ū nene hū nalī nzuna wing'we, ū Yosefu, ūyo mukanjinja Misili.

⁵ Alīyo lekagi gete ū kūpīnīhahala, nūūlū kwisaayīla bing'we benekīlī angū īkī mukanijinja kūūnū; nguno ū nene wanitūma Mulungu natonge ū kūūnū, kūlwa kūpīja būpanga.

⁶ Ī haha yashikaga myaka ībīlī īlīho nzala ū musī; ū kū būtongi yasaagaga ko yīngī ītanò, īyo ītī ya kūlīma nūūlū kūgesa.

⁷ Alīyo ū Mulungu akanitonja kūūnū ū nene kūlwa kūshilang'hana ī shibyalīlwe shing'we ū mu sī, na kūbūpīja ū būpanga wing'we mu kapīlīle kataale.

⁸ Hū kūhaya ītī bing'we abo mukanenha ū kūūnū, walī Mulungu ūyo ī haha wanīīta kūbiza ise wa ng'wa Falao, na ntaale wa kaya yakwe yose; na nsugi ū mu sī ya Misili ī yose.

⁹ Ali lūūlū, ī haha jagi wangū ū kūlī baba mukang'wīle, ‘Ū ng'witūnja wako ū Yosefu alīhaya gīkī, Ū Mulungu wanīīta kūbiza ntaale wayo pyī ī sī ya Misili; nzūgū wangū ū kūūnū nalī, ūtizūdīla.

¹⁰ Ūkwikala mu sī ya Gosheni, bbihī nū kūko nalī ū nene ūkwikala kwenūko ū bebe ng'wenekīlī, na a baana bako, na a bizūkūlū bako, na a madaale gako ga ng'holo na a ga ng'ombe; nī shose īsho ūlī nasho.

¹¹ Nakūkūlang'hana ko ū kwenūko; nguno ītaalī īliza ko myaka ītanò ya nzala. Ūlū ītī chene, ū beebe na a bose abo ūlī nabo mukūkoya no.’

¹² Bing'we benekīlī mulībona na miso ging'we, pye nū nzuna wane ū Benjamini alībona, gīkī hū nene nalīmuwīla ī yenīyī.

¹³ Ng'winhagi ū baba ī mhola j'ikūjo īlo nīīlūkīlwa ū kūūnū Misili, nī yīngī pyī īyo mulīyībona; nīyo ū baba mung'wenhe kūūnū wangū.”

¹⁴ Hūna wiponya a halī nzunaaye ū Benjamini, ūnkumbatīla wandya kūlīla, kūnū nū Benajamini nang'hwe akūlīlaga.

¹⁵ Pye na a bakūlūye ūbabbipa kūnū akūbalīlīīlaga; hanuma ya henaho a baana ba ng'wawe būhooya nang'hwe.

Isilaeli asaamīle Misili

¹⁶ Ī mhola aho jashika ū kwikūlū lya ng'wa Falao, gīkī bizaga baana ba ng'wawe na Yosefu, ū Falao na a bana ng'oma bakwe bakayega no.

¹⁷ Ū Falao ūng'wīla ū Yosefu gīkī, “Bawīlage a baana ba ng'wing'we; ‘Ītagi gīkī, jibbakīlījagi ī nzobe jing'we ī miligo, mushoke ū kū sī ya Kanaani;

¹⁸ mukang'wenhe ū sīng'we, nī kaya jing'we kūūnū nalī. Nakūng'winha ī shawiza īsho shilīmo ū mu sī ya Misili; mukūshilūmba ī shizeeze sha sī īyī.’

¹⁹ Na hangī ūlīkomelejiwa kūbawīla gīkī, ‘Solagi magogoteeni kūfuma kūūnū Misili, mukababūūche a baana bing'we na a bake bing'we; mumūche nū sīng'we mung'wenhe kūūnū.

²⁰ Mutizikala mulīkoya koyela shikolo shing'we, nguno pyī ī shawiza sha mu Misili shikūbiza shing'we.’”

²¹ A bitūnja ba ng'wa Isilaeli bīīta chene ng'hana; ū Yosefu ūbinha magogoteeni, gīt'umo akalagīīlīla ū Falao. Ūbinha na shiigunaanīlo sha mu nzīla.

²² A bose ūbinha būlī ng'wene shizwalo sha kwaalūla; alīyo ū Benjamini ūng'winha shekeeli magana adatū ja feza, na shizwalo shitanò sha kwaalūla.

²³ Ū kūlī ise ūtwala shikolo īshi, Nzobe ikūmi jibūūkije shikolo shawiza kūfuma mu sī ya Misili, na nzobe ng'hīma ikūmi jibūūkije būsīga na migatī kūlwa ng'wa ise kūtūmamīla mu nzīla.

²⁴ Hūna ūbalaga a baana ba ng'wawe būja; aho alīlekana nabo ūbawīla, “Lang'hanagi mutiziduumīla mu nzīla.”

²⁵ Bīnga ī Misili, būlinha kūja Kanaani, būūkashika ū kūlī saabo ū Yakobo.

²⁶ Būng'wīla, “Baba ū Yosefu ataalī alīho mpanga! Nīyo hū ntaale wa sī yose ī ya Misili.” Ū Yakobo ūūkaba! Nīyo atabazunīlīgije,

²⁷ kūshisha būnsomboolela pyī ī mihayo īyo akabawīla ū Yosefu, ūgabona na a magogoteeni ayo walī wagatūma ū Yosefu kwiza kūmūcha. A henaho lūūlū ū moyo gwakwe hū gūshoka.

²⁸ Ū Isilaeli ūhaya, “Naazunya lūūlū ī haha, ū ng'witūja wane ū Yosefu ataalī mpanga ng'hana. Nakūja nakamone aho nataalī kūcha!”