wandījo 42 - Bibilia Ilagano Lya Kale 2015

Bakūlūye ba ng'wa Yosefu kūja Misili

¹ Ū Yakobo akigwa gīkī shilīko shilīwa ī Misili, ūbawīla a bitūnja bakwe, “Nibūlī mukwilola lolaga dūhū?”

² Ongeja kūhaya, “Nigwile gīkī shilīko shilīwa ī Misili, jagi koi mukatūsumīle, tūpīle; tūtizūnanuka.”

³ Na lūūlū a bitūnja ba ng'wa Yakobo būbūūka ikūmi, būja ī Misili ū kūsuma.

⁴ Alīyo ū Yakobo akaneka ū Benjamini, ū nzūnaye wa ng'wa Yosefu, atantūmile ū kūja nabo a bakūlūye; nguno akogoha atizūgwīlwa mhayo gwabūbi.

⁵ Na lūūlū a bitūnja ba ng'wa Isilaeli būbūūka bajile hamò na bangī abo bajaga kūgūla shilīwa, nguno yalīho nzala nī Kanaani.

⁶ Ali lūūlū, ū Yosefu walī ntaale ū mu sī yenīyo, hū ng'wene wabajingījaga ī shilīwa a banhū ba mu sī yenīyo. Na lūūlū a bakūlūye aho bashika binama ū kū būtongi bokwe, kūshisha ha sī.

⁷ Ū Yosefu aho wababona a bakūlūye ūbadeeba, alīyo wiyīta kūbiza gītī atūbamanaga; ūbayombya n'ilaka lyayī alībabūja, “Ng'wafumaga halī a bing'we?” Būnshokeja, “Twafumaga sī ya Kanaani, twizaga kūgūla shilīwa.”

⁸ A boi batang'witegelegije, nūūlū īkī ū wei ū Yosefu walī wabadeeba a bene.

⁹ Hūna ūshizūkwa ī shilooti shakwe ūmo walī wabalootela kale; ūbawīla, “A bing'we mulī badati, ng'wizaga kwīlola ī sī yise, mubone aho īlī na būgokolo.”

¹⁰ Būnshokeja, “Yaya gete baba nkūjiwa, a bise basese bako twizaga kūgūla shilīwa dūhū.

¹¹ A bose tūlī baana ba myaji ūmò; tūlī banhū ba mhola gete a bise basese bako, tūtī badati yaya.”

¹² Ūbashokeja alīhaya, “Yaya a bing'we ng'wizaga kwīlola dūhū ī sī yise, mubone aho būlī ū būgokolo wayo!”

¹³ Nabo būnshokeja balīhaya, “A bise basese bako tūlī banhū ba shikūlū na shizuna, twalī ikūmi na babīlī; banhū ba myaji ūmò muna Kanaani, ūyo nī haha alīko ū kū sī yenīyo. Ū kwangū wise alī kaya hamò na sīwe, alīyo ūmò wise atīho.”

¹⁴ A henaho ū Yosefu ūbakaanīlīja alībawīla, “Angū h'ūmo nalīmuwīlīla, gīkī mūlī badati a bing'we!

¹⁵ Mukūmanīka dūhū. Nitonga; būta Falao mutīngaga gete a henaha kūshisha ize aha ū nzuna wing'we ū kwangūlīja.

¹⁶ Ntūmagi ūmò wing'we aje akang'wenhe ū nzuna wing'we. A bangī pyī mukūlugalīlwa mu jeela, īdīlīlwe ī mihayo ying'we, mubonwe ūlū ninga mulīhaya ya ng'hana. Ūlū mubize mutūhayaga ya ng'hana; ū nene nitongaga mu lina lya ng'wa Falao, managi gīkī mukūbalwa kūbiza mulī badati!”

¹⁷ Hūna ūbalugalīla a bose mu jeela ikanza lya shikū idatū.

¹⁸ A ha lūshikū lwa kadatū lwaho, ū Yosefu ūbawīla gīkī, “Bing'we ītagi gūyū mhayo hū mukwikala bapanga, nguno ū nene nang'ogohile Mulungu.

¹⁹ Ūlū mulī banhū ba ng'hana, ūmò wing'we asaage aha mu jeela; a bangī muje kaya, mutwale shilīwa ū kū kaya jing'we jitizūnanulwa nzala.

²⁰ Alīyo shiigelile mung'wenhe ū nzuna wing'we, hū mukūmanīka gīkī mulīhaya ya ng'hana, hama mutūcha!” Na ng'hana h'ūmo bakīītīla.

²¹ Hūna bandya kwiwīla gīkī, “A makoye genaya galītūgwīla kūlwa nzuna wise, nguno twagūloleelaga gete aho watwiyandīlaga kūlwa būpanga bokwe, alīyo twalī tūtandegelekaga; h'ī nguno yene a makoye genaya gatūgwīlaga ī haha.”

²² Ū Lubeni ūbawīla, “Naalī natamuwīlaga gīkī nekagi ū nyanda mutizūng'wītīla yabūbi; alīyo ng'ūlema ū kūnidegeleka? Al'ī haha lūūlū angū mulībona gīkī galīkoowa a mininga gakwe!”

²³ A boi baalī batamanaga gīkī ū Yosefu wīdeebaga īyo bīhayaga, nguno watūmamīlaga nshomeleja.

²⁴ Ūgalūka ūja hanhū ūkalīla kakanza, alīyo ūshoka hangī wandya kūbayombya. Wanoga nose ūnsola ū Simioni, ūlagīla atungwe balolile.

²⁵ Hūna ū Yosefu ūlagīla gīkī a magūnīla gabo gokajiwe shilīwa, nī hela jabo bashokejiwe, būlī munhū atūūlilwe ū ng'wigūnīla lyakwe; na gīkī binhwe mhamba ja mu nzīla, pyī ī yenīyo bakīītīlwa.

²⁶ Hūna būjitungīlīja ī nzobe jabo ī miligo, būbūūka bajile.

²⁷ Bahayūshika ha ng'hambī ya kūlaala ū būjikū wenūbo, ūmò wabo ūtaligūla ū nigo gwakwe gīkī asole shilīwa sha kūlisha nzobe yakwe; ūjisanga ī hela jakwe ū ng'wigūnīla; jalī jatūūlwa haho nomo gwigūnīla.

²⁸ Ūbawīla a biye gīkī, “Bagosha ī hela jane jashoshiagwa, jiiji jilī ng'wigūnīla.” Ī myoyo yabo īkibakīla no; bandya kūdetema kūnū bakwilola lolaga, baliwīla, “Bing'we babbehi, ū Mulungu watwītīlaga mhayo kī hangī nago ū gwenūyū?”

Kūnsomboolela saabo

²⁹ Aho bashika ī kaya ī Kanaani ū kūlī saabo, būnsomboolela pyī īyo yalī yabagwīla.

³⁰ Būng'wīla, “Ū ntaale wa sī yenīyo walūyombaga nise mu būkalī no; nīyo walūtwisaabaga gīkī tūlī badati ū mu sī yenīyo.

³¹ Alīyo tūng'wīla gīkī, ‘A bise tūlī banhū ba mhola dūhū tūtī badati.

³² Twal'ikūmi na babīlī, banhū ba myaji ūmò ba shikūlū na shizuna. Gwike ūmò wise atīho ū kū welelo, hama ū nzuna wise ū kwangūlīja mu kūbyalwa, alī Kanaani hamò na sīswe.’

³³ Hūna ū munhū ng'wenūyo, ū ntaale wa sī, ūtūwīla; ‘Ī nzīla ya kūmudeeba gīkī mulī banhū ba ng'hana yīyī, nekagi ng'wana wa ng'wing'we ūmò hamò nane aha, a bangī jagi mutwale shilīwa ū kū kaya jing'we jitizūnanulwa nzala.

³⁴ Alīyo mukanenhele ū nzuna wing'we ū wa kūmalīīja; hū nakūmana gīkī ng'hana mutī badati, mulī banhū ba ng'hana. A henaho hū nakūmushokeja ū ndūgū wing'we, hama mukūbiza na wiyaabī wa ū mu sī īyī.’”

³⁵ Aho bandya kūgafugunhūla a magūnīla gabo, būjisanga ī hela jabo jilīmo pye, būlī munhū na hela jakwe ū mu nigo gwakwe! Aho bajibona īmbogoshija ya hela boogoha no; pye nū saabo.

³⁶ Hūna ū saabo ū Yakobo ūbawīla gīkī, “A bing'we mulīnimalīla a baana bane; ū Yosefu alīndūhū kū welelo, nū Simioni nū ng'wene atīho; hama hangī ī haha mulīhaya kūntwala nū Benjamini. Pyī ī mibi yenīyī īlīnigwīla nene dūhū!”

³⁷ Hūna ū Lubeni ūng'wīla ū ise gīkī, “Ntūūlage mu nkono gwane baba nakūnshosha; ūlū nūleka kūng'wenha na kwiza kūbatūūla mu makono gako, a bitūnja bane būbīlī wabo.”

³⁸ Alīyo ū Yakobo ūhaya dūhū gīkī, “Ū ng'wanone atī wa kūja hamò ning'we ū kwenūko; nguno ū nkūlūye wazumalīka nūlekelwa ng'wenūyū dūhū. Ūlū mhayo gose gose gwabūbi gūūkang'wilongela ū mu lūgendo ūlo mulīja, mukūnibūlaga na būpīna, nīyo ū būnamhala bone ūmo nalī ūmu, angū numho ng'wanihilimīkīja mu shigila gete!”