wandījo 4 - Bibilia Ilagano Lya Kale 2015

Kaini kūmūlaga Abeli

¹ Hūna ū Adamu ūlaala nū nke ū Eva, nūlūgīkī, Hawa ūbūūcha nda ūmyala Kaini; ūhaya gīkī, “Ū SEEBA wanigunanha nabyala ng'wana ngosha.”

² Hanuma ūmyala na Abeli, nzunaye wa ng'wa Kaini. Ū Abeli akabiza ndīīmi, alīyo ū Kaini ūbiza nīmi.

³ Ikanza ilebe ū Kaini ūkamfunīja manong'ho ū SEEBA kwīngīīla ū mu matwajo ga mu ngūnda gwakwe.

⁴ Nang'hwe ū Abeli ūfunya manong'ho ga mbyalwa ja kwandya ja mu mitugo jakwe, na mazezele gajo. Ū SEEBA ūng'wanukūla na būyegi ū Abeli, na a manong'ho gakwe.

⁵ Alīyo atanyegelile ū Kaini, na a manong'ho gakwe; ū mhayo gwenūyo gūnsaayīcha no ū Kaini, ūyikala amining'halile.

⁶ Ū SEEBA ūng'wīla ū Kaini gīkī, “Nibūlī wasaayile gīko? Mhayo kī gūlīkwenheleja kwikala ūmining'halile?

⁷ Ī gīsī ū bebe ūlū wīta yawiza, ūtanukūlwa? Alīyo ūlū ūtatūngīlīgije managa gīkī, shilīho shibi a ha nyango gwako shikulindilile, nīyo shikūkūmbūlile no; gwike īkwigeleelilwe ūshipyene!”

⁸ Lwise lūmò ū Kaini ūng'wīla ū nzunaye gīkī, “Tūjage kū ngūnda.” Aho balī mu ngūnda, kwimanīla ū Kaini wang'ūbūkīla ū nzunaye ū Abeli, ūmūlaga!

⁹ Hūna ū SEEBA ūmūja ū Kaini gīkī, “Alī halī ū nzunayo ū Abeli?” Nang'hwe ūshosha alīhaya, “Natamanile; ū nene nalī nang'hani wa nzuna wane?”

¹⁰ Ū SEEBA ūng'wīla, “Wītaga mhayo kī? Managa gīkī a mininga ga ng'wanong'wing'we galīnilīlīīla kūfuma a ha sī.

¹¹ Na lūūlū ī haha, ū bebe wazumagwa; wapeejiagwa ūyīngīle ī sī īyo yanukūlaga mininga ga nzunayo kūfuma mu nkono gwako.

¹² Ūlū wīlīma ī sī ītūkwinha matwajo gose gose; ūkūbiza nyūngi sagala ū mu sī, wa kwikala wibakīla nūūlū ndūhū mhayo!”

¹³ Ū Kaini ūng'wīla ū SEEBA gīkī, “Ū nsango gwane gwanididohela no, gūkūnilemeela ūmo nagūbūūkīje.

¹⁴ Īkī wanipeeja ī lelo ū mu sī, nū kūnilola ūtūnilola; nabizaga munhū wa kūja akūyūngaga sagala ū mu sī, nīyo nakūyikala nogohaga, nguno ose ose ūyo ūnibona adūgije kūnibūlaga!”

¹⁵ Alīyo ū SEEBA ūng'wīla gīkī, “Yaya ītī gīko; munhū ose ose ūyo ūmūlaga Kaini, akūlīpīlwa shiilī ng'hangala mpungatī.” Hūna ū SEEBA ūntūūlīla lūmeng'ho ū Kaini, lwa koolecha gīkī ūyo ūmona atizūmūlaga.

¹⁶ Na lūūlū ū Kaini wīnga ū kū būtongi bo ng'wa SEEBA, ūūkazenga mu sī ya Nodi, kīya ya Edeni.

Shibyalīlwe sha ng'wa Kaini

¹⁷ Ū Kaini ūlaala nū nke wakwe, ūbūūcha nda ūmyala Enoka; ū mu shikū jenījo ū Kaini wazengaga nzengo nebe, ūgwitana lina lya ng'witūnja wakwe Enoka.

¹⁸ Ū Enoka akamyala Iladi, ū Iladi ūmyala Mehuyaeli; ū Mehuyaeli ūmyala Metushaeli, ū Metushaeli ūmyala Lameki.

¹⁹ Ū Lameki akatoola mhalī, ūmò wa bake bakwe witanagwa Ada, ū ūngī Zila.

²⁰ Ū Ada ūmyala Jabali, ū ng'wenūyo h'ūyo akabiza ise wa badīīmi, abo bakikalaga mu numba ja maheema.

²¹ Ū nzunaye witanagwa Jubali, ū ng'wene ūbiza ise wa bose a batūji ba ndono na a bafuuji ba mbilūlū.

²² Ū Zila nang'hwe ūbyala ng'wana ngosha, lina lyakwe Tubali-kaini; ū ng'wene akabiza nsuji wa shiseme sha būlī mbika, kūfuma mu chūma shaaza na shapi. Ū Tubali-kaini walī n'ilūmbūye witanagwa Naama.

²³ Lwise lūmò ū Lameki ūbawīla a bake bakwe gīkī, “Bing'we Ada na Zila, nidegelekagi; bake ba ng'wa Lameki īdegelekagi ī mihayo yane. Naabūlagaga munhū kūlwa kūnichūūbūla, nsūmba walī waniminya.

²⁴ Ū Kaini ūlū walīpīlwa shiilī ng'hangala mpungatī, al'ū Lameki ū ng'wene angū numho ng'hangala makūmi mpungatī na mpungatī!”

²⁵ Ū Adamu akalaala hangī nū nke wakwe ūbyala ng'wana ngosha, ūng'wilīka ī lina lyakwe Seti. Nguno akahaya gīkī, “Ū Mulungu waninha ng'wana ūngī a ha ng'wanya gwa ng'wa Abeli, ūyo Kaini akamūlaga.”

²⁶ Ū Seti nang'hwe ūbyala ng'wana ngosha, ūng'wilīka ī lina lyakwe Enoshi, ū mu shikū jenījo a banhū hū bandya kūlīkumūcha ī lina lya ng'wa SEEBA.