wandījo 39 - Bibilia Ilagano Lya Kale 2015

Yosefu kūsanyiwa na ise būgonzo

¹ Ū Yosefu aho washishiwa ī Misili, muna Misili ūmò ntūmami wa ng'wa Falao, walī ntaale wa balang'hani, lina lyakwe Potifali, ūngūla ū kū Baishimaeli abo baalī bantwala ko.

² Alīyo ū SEEBA walī hamò nang'hwe ū Yosefu, na lūūlū ūng'wīlūkīla ningī no aho alī ū mu kaya ya ng'wa ise būgonzo, ū muna Misili ng'wenūyo.

³ Ū ise būgonzo aho wabona gīkī ū SEEBA alī hamò nū Yosefu, nī gīkī ū mu yose īyo wītaga ū SEEBA wangunanhaga,

⁴ akanyegela no; ūng'wīta kūbiza ngunanhi wakwe. Nīyo ū Potifali ūntūūla kūbiza nang'hani wa kaya yakwe yose; nī shikolo shakwe īsho walī nasho, ī shose ūshitūūla mu makono ga ng'wa Yosefu.

⁵ Kūfuma ikanza īlo akantūūla kūbiza nang'hani wa kaya yakwe, na wa shose īsho walī nasho, ū SEEBA wīfuuha ī kaya ya muna Misili ng'wenūyo, kūlwa nguno ya ng'wa Yosefu. Ī ja ng'wa SEEBA jūbiza kū būlī shikolo īsho walī nasho ū Potifali; pye hose hose, mu kaya nū kū malaale.

⁶ Na lūūlū ī shikolo īsho walī nasho ūshileka pye mu makono ga ng'wa Yosefu; na kūlwa nguno ya ng'wa Yosefu, ū wei ooya gete ū kwikala akūkoya koyaga na shikolo shose shose a ha kaya yakwe, ūlū ītī shilīwa dūhū īsho walyaga. Gwike ū wei ū Yosefu walī n'ihanga isoga ū kūlola.

Yosefu na nke wa ng'wa Potifali

⁷ Hūna lūūlū aho jabīta shikū akūtūmamaga hoi, ū nke wa ng'wa ise būgonzo ūng'wikūmva; ūng'wīla, “Nzūgū ūlaale nane.”

⁸ Alīyo akalema no, ūng'wīla gīkī, “Ū nene ū mu kaya yenīyī nalī ntaale, ū baba būgonzo atakoyakoyelaga shose shose īsho shilī mu kaya īyī; būlī shikolo shakwe ashitūūlile mu nkono gwane.

⁹ Ū mu kaya yenīyī atīho ntaale kūniheeba ū nene; na shitīho shikolo īsho anilemegije ū baba būgonzo ū mu numba īyī, ūlū ītī beebe iyene; nguno ū bebe ūlī nke wakwe. Na lūūlū nakūdūla ginehe ū kūng'wītīla shibi ū Mulungu ū mu mhayo gwa malofu gwenūyū?”

¹⁰ Ū nkīma ng'wenūyo nūūlū īkī walī wangūūmīīla ū Yosefu ū mu mhayo gwenūyū, alīyo nahene atazunije ū kūlaala nang'hwe; nūūlū ni kūhooya nang'hwe dūhū yaya!

¹¹ Na lūūlū lwise lūmò ū Yosefu wingīla ū mu kaya gīkī akabeeje milīmo yakwe īyo wītaga na kale, pye a batūmami a bangī baalī batīmo ū mu kaya.

¹² Ū nkīma ng'wenūyo ūndima ū Yosefu ī ligoodi lyakwe; ūng'wīla, “Nzūūgū ūlaale nane!” Alīyo wihuluguma, ūnekela ī ligoodi mu nkono gwakwe; ū wei ūpuluka hanze ūpeela.

¹³ Ū nkīma aho wabona gīkī ū Yosefu wapeelela hanze ūnekela ī ligoodi lyakwe mu nkono,

¹⁴ Ūyoganya alitana batūmami bakwe ba mu kaya; ūbawīla, “Ka lolagi shi ī Lihebulania īlo twenhelilwe, lyabizagūtwibengeleja! Lyalī liza mu kaya ūmu, lyandya kūnigaagaanīla angū līlaale nane; nalema, nīyo nūyoganya na kūyoganya.

¹⁵ Aho ligwa nayoganya nalīīlīla n'ilaka lya h'igūlya, lyūpuluka ū mu numba lyūpeela; lyūnilekela ī ligoodi lyalo īlī!”

¹⁶ Ū nkīma ng'wenūyo ūlībīka ī ligoodi lya ng'wa Yosefu kūshisha wiza kaya ū ise būgonzo.

¹⁷ Hūna ūng'wīla, “Ī Lihebulania, ī lisese īlo ng'watwenhelile lyenīlī, lyalī lyaningīlīīlaga kwiza kūnibengeleja.

¹⁸ Alīyo aho nayoganya nalīīlīla n'ilaka lya h'igūlya, lyūpuluka ū mu numba lyūpeela, lyūnilekela ī ligoodi lyalo līīlī!”

¹⁹ Ū ise būgonzo aho wigwa ū būsombooji bo nke wakwe ūbo akang'wīla; ī gīkī, “H'ūmo lyanīītīlaga ī lisese lyako ī lelo,” akapelana no.

²⁰ Ūnsola ū Yosefu ūmponya mu jeela, ūmo balugalīlagwa batūmami ba ntemi; wikala mo ng'hana ū mu jeela yenīyo.

²¹ Alīyo ū SEEBA walī hamò nang'hwe ū Yosefu, ūng'wītīla yawiza no; ūng'wīta kūbiza wa kūyegelwa ū kū būtongi bo ntaale wa jeela.

²² Na lūūlū ū ntaale wa jeela ūntūūla ū Yosefu kūbiza higūlya yabo pye a bafungwa abo baalīmo ū mu jeela yenīyo; nī mihayo ī yīngī īyo yalī yigelile kwītwa ū mu jeela, wītūūla ha sīlīlī ya ng'wa Yosefu.

²³ Ū ntaale wa jeela ng'wenūyo ooya ū kwikala akwiganikaga kwīlola ī mihayo īyo walī wītūūla mu makono ga ng'wa Yosefu; nguno ū SEEBA walī hamò nū Yosefu, na wang'winhaga būdūla wa kūbeeja chiza būlī nīmo ūyo wagwītaga.