wandījo 37 - Bibilia Ilagano Lya Kale 2015

Shilooti sha ng'wa Yosefu

¹ Ū Yakobo akikala mo ū mu sī ya Kanaani, ūmo wikalaga ū ise gītī nobeji.

² Ūbū wene būsomboji bo mihayo ya būbyīle bo ng'wa Yakobo. Ū Yosefu aho alī nyanda wa myaka ikūmi na mpugatī, wadīīmaga ng'holo hamò nabo a bakūlūye, a bitūnja ba ng'wa Biliha na Zilipa, a bake ba ng'wa ise. Ūlū bīīta ya nkūlà wizaga wang'wīla ū saabo.

³ Nīyo ū Isilaeli walī antogilwe no ū ng'witūnja wakwe ū Yosefu kūtinda pye a bitūnja bakwe a bangī, nguno akabyalwa kū būnamhala bokwe; hūna lūūlū walī wameegeja ng'hanjo ya būlenji būsoga.

⁴ A bakūlūye aho babona gīkī ū ise antogilwe kūbaheeba pye a boi, bakankolwa no; booya ū kūhooya nang'hwe mu mhola.

⁵ Kwimanīla waloota shilooti ikanza ilebe, aho wabalotoolela a bakūlūye bongeja ū kūnkolwa.

⁶ Akabawīla gīkī, “Alidegelekagi shiishi shilooti naalootaga.

⁷ Twalipaga ngano twajitunga miligo miligo, kwitulwa ū nigo gwane gwabūūka, gwīmīīla. Nī ying'we yūbūūka yīmīīla, hūna yūgūpīndya ū gwane, kūnū yagwinamīlaga.”

⁸ A bakūlūye būng'wīla, “Ū bebe ng'wenūyū hū ūkūbiza ntemi wise? Ūkūtūsuga gete ū bebe?” A henaho lūūlū hū bongeja ū kūnkolwa kūlwa nguno ya shilooti shakwe, nī yīyo akīhaya.

⁹ Ūloota hangī shilooti shingī; nī shene ūbawīla a bakūlūye. Ūhaya gīkī, “Degelekagi shiishi shilooti shingī naalootaga. Ū lūkangala ūlū, ī līīmi nū ng'weji, hamò na sonda ikūmi n'īmò jalinamaga kū būtongi bone.”

¹⁰ Aho wamala kūbawīla a bakūlūye, ūng'wīla nū ise. Ū ise ūng'hama alīng'wīla, “Ū bebe obizagūloota shilooti kī shenīshi! Ū nene nū noko na a bakūlūyo tūkwinama gete kū būtongi wako kūshisha ha sī?”

¹¹ A bakūlūye bakang'wītīla wilu no; alīyo ū ise ūgūtūūla mu ng'holò ū mhayo gwenūyo.

Yosefu kūsīgwa na bakūlūye

¹² Hanuma ya henaho a bakūlūye baalī lūgundīga mapandī ga Shekemu, bakūdīīmaga mitugo ja ng'wa saabo.

¹³ Hūna ū Isilaeli ūng'wīla ū Yosefu, “Ūmanile gīkī a bakūlūyo baajile kūdīīma mitugo hihī na Shekemu, ali lūūlū natogilwe kūkūtūma ūje ko.” Nang'hwe ūhaya, “Magatū baba.”

¹⁴ Ūng'wīla gīkī, “Jaga ūkabalole a bakūlūyo, ūbone ūmo balījīla, nū mumo jilī ī mitugo; ūnenhela ī mhola jabo.” Ūntūma, kūfuma ūko yikalaga ī kaya; yalī kū ntubīlo gwa Hebuloni. Ū Yosefu aho washika ī Shekemu,

¹⁵ Ūyūyeela yeela mu matogolo ga kwenūko akūbakoobaga; munhū nebe ūmanhya nang'hwe ūmūja, “Ūlīkooba kī?”

¹⁶ Nang'hwe ūshosha, “Nalībakooba bakūlū bane, hamo ūdūgije kūniwīla ūko balījidīīmīla ī mitugo?”

¹⁷ Ū munhū ng'wenūyo ūng'wīla “Bīngile a henaha; nakabigwa baliwīla, ‘Tūjagi Dosani.’” Hūna ū Yosefu ūbakūūbīja a bakūlūye, ūūkabasangīla bbihī na Dosani.

¹⁸ A boi aho banoleela kūle, ataalī ū kūshika aho baalī, bandya kūnsīga kūmūlaga.

¹⁹ Biwīla, “Ūūyo washika ū wa mashilooti gakwe;

²⁰ Ī lelo tūmūlagagi, tūmponye ng'wikomelo; tūkūja tūkahaye dūhū gīkī walyiwe līshiinū, tūbone ūko galakagelele a mashilooti gakwe!”

²¹ Ū Lubeni aho wabiigwa balīsīgana gīko ūgema kūmpīja; ūbawīla, “Bing'we tūtizūng'wīngīja ū būpanga bokwe.

²² Mutizūgima kwita mininga gose gose; mponejagi dūhū ng'wikomelo līīlī aha, nguno nīyo kū matogolo kūle ū kūūnū.” Ū Lubeni akagūhaya ū gwenūyo nguno walī n'iganiko lya kūmpīja ū mu makono gabo, alanshoshe kūlī ise.

²³ Na lūūlū ū Yosefu aho washika dūhū aho baalī, būnzuuja ī ng'hanjo yakwe, īyo yalī īsumilwe na būlenji būsoga, īyo walī azwalile.

²⁴ Būnsola būmponeja ng'wikomelo; gwike gaalī gaakama a minzī ū ng'wikomelo lyenīlo.

Yosefu kūjinjiwa kū basūlūja

²⁵ Hūna a boi bigasha kūlya shilīwa; kūbūūcha a miso, būbona nsūlūlū gwa Baishimaeli balīfuma Gileadi. Baalī na ngamīla jibūūkije miligo ya shisanjo sha mu shilīwa na maguta na būbbani, balīshitwala Misili.

²⁶ Ū Yuda ūbawīla a biye gīkī, “Ī gīsī ng'hana, tūkūpandīka solobo kī ūlū tūmūlaga ū nzuna wise hūna tūgabisa a mininga gakwe?

²⁷ Hambū hambū tūnjinjagi kū Baishimaeli babo; tūtizūng'wītīla yabūbi na makono gise. Nguno nīyo ī chene ū ng'wing'wana nzuna wise kamò; ū wei alī mīlī gwise na mininga gise gete.” Bizunīlīja nang'hwe a baana ba ng'wawe.

²⁸ Hūna a basūlūja a bana Midiani benabo aho bashika ho, a bakūlūye ū Yosefu būmfunya ū ng'wikomelo; būnjinja shekeli makūmi abīlī ja feza ū kū Baishimaeli benabo, būntwala kū sī ya Misili.

²⁹ Ū Lubeni wahayūshoka ū kwikomelo ūnsanga atīmo ū Yosefu, ūūtandūla shizwalo, shakwe.

³⁰ Ūja ū kū bazunaaye alīhaya, “Bing'we naje he? Ū nyanda atīmo ū ng'wikomelo!”

³¹ Būlomana būsīnza mbūli, bīsola ī ng'hanjo ya ng'wa Yosefu bīdabbya mu mininga.

³² Ī ng'hanjo īyo yalī yawiza wiza yenīyo bītwala ū kūlī saabo; būūkang'wīla, “Twalī twīkūga ī ng'hanjo īyī. Īlolage hamo īdūgije kūbiza ng'hanjo ya ng'witūnja wako!”

³³ Wīmana haho na haho; ūhaya, “H'ī ng'hanjo ya ng'wanone! Walyiwe mashiinū; tambala shilanga wasaasagūlilwe mashiinū ū Yosefu!”

³⁴ Ū Yakobo ūtandūla shizwalo shakwe ūzwala myenda ya magūnīla; ūnīla ū ng'witūnja wakwe shikū ningī no.

³⁵ Pye a bitūnja bakwe, na a bashīke bakwe būgema ū kūng'huumūja, alīyo būlemeelwa; nguno atazunije ū kūlūngūjiwa. Ūhaya, “Nilekagi ū nene, nakūcha nakūnīlaga ū ng'wanone, nankūūbīje ū mu shigila.” Ū ise akalīla no ī ng'hūngū, akūnīlaga.

³⁶ A Bamidiani aho bashika ī Misili, būnjinja ū Yosefu ha ng'wa Potifali, ntūmami wa ng'wa Falao; ntaale wa balang'hani.