wandījo 32 - Bibilia Ilagano Lya Kale 2015

Yakobo kūng'ogoha Esau

¹ Ū Yakobo nang'hwe ūja na lūgendo lwakwe, bamalaika ba ng'wa Mulungu būmanhya nang'hwe.

² Ū Yakobo aho wababona ūhaya, “Ī gete ī yenīyī ng'hambī ya ng'wa Mulungu.” Hūna ī lipandī lyenīlo ūlitana “Mahanaimu.”

³ Ū Yakobo ūtūma banhū kūja Seili, mu sī ya Edomu, ū kūlī nkūlūye ū Esau.

⁴ Ūbakomeleja alībawīla, “Ūlū mulashike ū kūlī ntaale wane, ū nkūjiwa Esau, mukūhaya, ‘Ū nsese wako ū Yakobo alīhaya gīkī, Naalī kū ng'wa Labani, h'ūko naalikalaga kūshisha makanza aya.

⁵ Ī haha nalī na mitugo, ng'ombe, nzobe, ng'holo, na mbūlī; hama nalī na basese bagosha na bakīma. Na lūūlū nalītūma ī nhūng'wa jenīji ū kūlī nkūjiwa ntaale wane, gīkī napandīke kwanukūlwa ū kū būtongi wako.’”

⁶ A banhū abo akabatūma ū Yakobo aho bashoka būhaya, “Twashika ū kūlī nkūlūyo ū Esau, ī haha alī mu nzīla aliza na banhū magana anè, kūlwa kūkūsūng'wanha.”

⁷ Ū Yakobo oogoha no, hama ūzwangana kīngī nasho; a banhū abo walī nabo ūbagabanhya mabità abīlī, pye na a madaale ga mitugo nī ngamīla.

⁸ Nguno akiwīla gīkī, “Ū Esau ūlū ūlīkenaagūla ī libità ī līmò, ī lingī līshikile kūpūlūgūka lyūpeela.”

⁹ Hūna ū Yakobo ūlomba alīhaya, “Ee Mulungu wa ng'wa baba Abulahamu, Mulungu wa ng'wa baba Isaka. Ū bebe h'ūlī SEEBA ūyo ūkaniwīla gīkī, ‘Shokaga kaya kū sī yako na kū badūgūyo, nakūkūbeegeja yawiza.’

¹⁰ Ū nene nsese wako natigeleelilwe ū bebe ūnīītīle ū wiza bose wenūbo, nūūlū kūnoolekeja ū būtogwa wenūbū. Nguno aho nalīgūkīla ū mongo gwenūyū naalī iyene dūhū na nang'ha gwane, alīyo ī haha nalī na mabità abīlī!

¹¹ Nalīkūlomba ūnipīje ū mu nkono gwa nkūlū wane ū Esau, nguno naloogoha; akwiza anidumīle anikenaagūle ū nene na a baana, na a baninabo.

¹² Alīyo bebe ng'wenekīlī ūkahaya hape gīkī, ‘Nakūkūbeegeja yawiza;’ na gīkī, ‘Nakūbīīta a banhū ba būbyīle wako babize bingī gītī maseni ga ha nyanza, ayo gatūdūla kūbalwa.’”

Manong'ho ga ng'wa Yakobo kūlī Esau

¹³ Ū būjikū wa lūshikū lwenūlo ūbūmalīla henaho; ū mu shikolo īsho walī nasho, ūsolanhya shimò na shimò sha kūūnong'ha ū Esau.

¹⁴ Akasola mbūli magana abīlī na ng'hulyati makūmi abīlī, ng'holo magana abīlī na ng'ondi makūmi abīlī.

¹⁵ Ūsola na ngamīla ng'hīma makūmi adatū na baana bajo, ng'ombe makūni anè na nzagamba ikūmi, nzobe ng'hīma makūmi abīlī na nzobe ng'hosha ikūmi.

¹⁶ Aho wajisolanhya ūjitūūla mu makono ga basese bakwe; būlī idaale lyūbiza iyene. Hūna ūbawīla a basese bakwe gīkī, “Tongelagi gwike ng'wilekela ng'wanya a ha gatī y'idaale n'idaale.”

¹⁷ Ū wa kūbūtongi ūnagīīla ī ya kūhaya; ūng'wīla, “Ū nkūlū wane ū Esau ūlū alakūpuunīle akūbūje gīkī, ‘Ū bebe ūlī wa ng'wa nani? Nū kūko ūjile halī?’ Na gīkī, ‘Ī mitugo jose jenīji ūlījiswaga ja ng'wa nani?’

¹⁸ Ng'wīlage, ‘Ja nsese wako Yakobo; inong'ho lya kūng'winha nkūjiwa ntaale wakwe Esau, nū wei alīho a ha numa aliza.’”

¹⁹ Nū wa kabīlī ūnangīīla gīko, nū wa kadatū, kūshisha pye a bose abo baswagaga madaale; ūbawīla gīkī, “Būlī ūmò wing'we ūlū ūmanhya nū Esau, hayagi mihayo yenīyo dūhū.

²⁰ Izūkagwi gete ū kūhaya ī gīkī, ‘Nū wei ū nsese wako ū Yakobo alīho a ha numa aliza.’” Nguno wiganikaga gīkī, “A manong'ho aya nalīntūmīla genaya gakūmpoja, hama naliganika nū nene akūnanukūla ūlū nibona nang'hwe.”

²¹ Hūna a manong'ho ga ng'wa Yakobo gūtonga, ū wei ng'wenekīlī wikala a ha ng'hambī ū būjikū wenūbo.

Yakobo kwifuka na Munhū būjikū pe

²² Ū mu būjikū wenūbo, ū Yakobo ūbūūka ūbasola a bake bakwe na a bakīma a basese, hamò na a bitūnja bakwe abo ikūmi na ūmò, ūbakīja ū mongo gwa Yaboki.

²³ Aho wamala kūbakīja ū mongo, ūshikīja nī shikolo shakwe pye.

²⁴ Ū wei ūsaaga iyene ko; munhū nebe wifuka nang'hwe kūshisha būjikū pe.

²⁵ Ū munhū ng'wenūyo aho wabona gīkī atūng'heebaga ū Yakobo ū mu lifuka, ūnkuumya h'iguha lya lūnyonga lwa lūkunu lwakwe; ū lūnyonga lwa lūkunu lūtyūka.

²⁶ Hūna ū munhū ng'wenūyo ūhaya, “Nilekelage naje, weela ū būjikū.” Alīyo ū Yakobo ūshosha, “Ndūhū natūkūlekelaga kūshisha ūnifuuhe!”

²⁷ Ū munhū ng'wenūyo ūmūja, “Ī lina lyako ūlī nani?” Nang'hwe ūhaya, “Nalī Yakobo.”

²⁸ Ū munhū ng'wenūyo ūng'wīla, “Ī lina lyako ūtitanwa hangī Yakobo, ūlī Isilaeli; nguno wilwishije na banhū nū Mulungu, ūbiza ntindi.”

²⁹ Hūna ū Yakobo ūhaya, “Nalīkūlomba ūniwīle ī lina lyako.” Nang'hwe ūnshokeja, “Lyakī ī lina lyane ūlīlībūja?” Hūna ūmfuuha aho balī henaho.

³⁰ Ū Yakobo ūlitana ī lina ly'ipandī lyenīlo gīkī, “Penieli;” ūhaya, “Nguno nibonaga na Mulungu būshū kū būshū, alīyo nūchīlwa shigongo, nī haha nataalī nalīho nalī mpanga.”

³¹ Aho līlīfuma ī līīmi nang'hwe ūshimīza kwīnga ī Penieli, akūlibagīlaga kūlwa nguno ya lūkunu lwakwe.

³² H'ī nguno yene kūshisha lelo īyī a Baisilaeli batalyaga ī nyama ya ha lūge ūlo lūlūnganije ha lūnyonga lwa lūkunu. Nguno ū lūnyonga lwa lūkunu lwa ng'wa Yakobo lūkakuumiwa bbihī nū lūge lwenūlo.