wandījo 3 - Bibilia Ilagano Lya Kale 2015

Munhū kūgwa mu shibi

¹ Gwike ī nzoka yalī masala sala kūjiheeba pyī ī shiinū ja mu matogolo ī jingī, ījo walī wajibeeja ū SEEBA Mulungu. Yūmūja ū nkīma gīkī, “Angū ng'hana gete ū Mulungu wahaya, ‘Mutizūlya matwajo ga ntī gose gose ū mu ngūnda?’”

² Nang'hwe ū nkīma wīwīla ī nzoka gīkī, “A matwajo ga mitī ya mu ngūnda tūdūgije ū kūgalya.

³ Alīyo ū Mulungu wahaya gīkī, ‘Yaya ū kūlya a matwajo ga ntī ūyo gūlī ha gatī ya ngūnda; yaya nūūlū kūgakuumya, nguno mukūcha!’”

⁴ Ī nzoka yūnshokeja ū nkīma gīkī, “Ndūhū gete, mutūcha!

⁵ Ū Mulungu amanile dūhū gīkī ūlū ng'ūlya, a miso ging'we gakūkundūlīlwa, mubize gīt'umo alī ū Mulungu, ning'we mukwīmana ī misoga nī mibi.”

⁶ Ū nkīma aho wabona gīkī a matwajo ga ntī gwenūyo gawiza ū kūshilīwa, nū mu miso galībeela, nīyo gashikile kūng'winha munhū masala, ūtonola ūlya. Nū ngoshi, nū ng'wene ūng'winha ūlya.

⁷ Hūna a bose būbīlī wabo a miso gabo gūkundūlīlwa, bideeba gīkī balī dūūhū; būtunganīja madūūtū ganti ntiini, gīkī bibeegeje shizwalo.

⁸ Kwimanīla mu makanza ga līīmi lyaheeha, ū Adamu nū nke būliigwa ī lilaka lya ng'wa SEEBA Mulungu akūyeelaga ū mu ngūnda. Ū Adamu nū nke būng'wibisa ū SEEBA Mulungu, mu mitī ya mu ngūnda.

⁹ Alīyo ū SEEBA Mulungu ūng'witana ū Adamu gīkī, “Ūlī halī?”

¹⁰ Nang'hwe ūhaya, “Naaliigwa ī lilaka lyako ū mu ngūnda nogoha nibisa, nguno nalī dūūhū!”

¹¹ Ū SEEBA Mulungu ūng'wīla, “Nani ūyo wakūwīlaga gīkī ūlī dūūhū? Wagalyaga a matwajo ga ntī ayo nakakūlemeja kūgalya?”

¹² Ū Adamu ūhaya, “Ū nkīma ūyo waninhile gīkī ikale hamò naane, h'ūyo walī waninha nūlya!”

¹³ Hūna ū SEEBA Mulungu ūng'wīla ū nkīma gīkī, “Bebe mhayo kī ū gwenūyū wagwītaga?” Nang'hwe ū nkīma ūhaya, “Lyalī lyanilemba ī liyoka nūlya!”

Kūzung'wa Kwa Nzoka

¹⁴ Ū SEEBA Mulungu wīwīla ī nzoka gīkī, “Ū bebe īkī wītaga mhayo gūlī gīko, wazumagwa kūtinda pyī ī ndimu, na kūtinda shiinū jose ja mu matogolo! Ūkūyūsholomela nda, hama ī shilīwa shako shabizaga lūbuubu pyī ī shikū ja būlamu wako.

¹⁵ Nīyo nakūtūūla wanishi a ha gatī yako nū nkīma, na a ha gatī ya myalwa wako nū wakwe. Ū myalwa wakwe akūgūtobagūla Ū ntwe gwako, nang'ho ūkūngulaaja ishiigina lyakwe.”

Kūzung'wa kwa banhū

¹⁶ Ū Mulungu ūng'wīla ū nkīma gīkī, “Nakūbongeja ū būsaatu wa būsūngū wako ū ng'wikanza lya kūbyala baana, ūkūyūbyala mu kūsaatwa kūtaale no. Hama ū kwikūmva kwako kūkūbiza kūlī ngoshi wako; nīyo akūkūsuga ū bebe.”

¹⁷ Lelo ū Adamu ū ng'wene ūng'wīla, “Īkī walī waliigwa ī lilaka lya nke wako ūzunya kūlya ū ntī ūyo nakakūlemeja nūkūlagīla gīkī, ‘Yaya ū kūgūlya;’ ī sī yazumagwa kūlwa nguno yako, pyī ī shikū ja būlamu wako ūkūyūkoyakoya hū wapandīka ī shilīwa.

¹⁸ Ī sī īkūkūzwisīja ming'hwa na magwaata, nīyo ūkūyūlya sha kūzwa mu matogolo. Mu Lūyīlo lwa būshū bako, ūkūyūlya

¹⁹ Ūkūyūyīla tame hū wapandīka Ī shilīwa shako. Kūshisha ūkūshoka ha sī, nguno h'aho ūfumile. Ū bebe ūlī malongo, na lūūlū ūkūshoka mu malongo!”

Munhū kūpeejiwa mu ngūnda

²⁰ Ū Adamu ūng'wilīka ū nke wakwe lina lya Eva, nūlūgīkī, Hawa, nguno h'uyo akabiza nina wa bapanga bose.

²¹ Hūna ū SEEBA Mulungu ūbabeegeja shizwalo sha makūnza ū Adamu nū nke, ūbazwīka.

²² Hanuma ū SEEBA Mulungu ūhaya gīkī, “Ī haha ū munhū wabizaga gītī ūmò wise, wīmanaga ī misoga nī mibi. Na lūūlū ītigeleelilwe agasole na a matwajo ga ntī gwa būpanga agalye, abize mpanga welelo bose.”

²³ Hūna lūūlū ū SEEBA Mulungu ūmpeeja ū mu ngūnda gwa Edeni; ūūkabiza nīmi wayo ī sī īyo akabeejiwa kūfuma muyo.

²⁴ Aho wampeeja ūtūūla bamalaika Balang'hani akakitanagwa makelubi ū kū kīya ya ngūnda gwa Edeni, na līlūshū lya moto lya kwikala līkūgalūkaga hose hose būlī kwene, kwīlang'hana ī nzīla ya kūja ha ntī gwa būpanga.