wandījo 25 - Bibilia Ilagano Lya Kale 2015

Kūcha kwa ng'wa Abulahamu

¹ Ū Abulahamu akatoola nkīma ūngī, lina lyakwe witanagwa Ketula.

² Ū nkīma ng'wenūyo ūmyalīla ū Abulahamu ba Zimulani, Yokishani, Medani, Midiani, Ishibaki na Shua.

³ Ū Yokishani akababyala ba Sheba na Dedani; a bitūnja ba ng'wa Dedani baalī ba Ashulimu, Letushimu na Leumimu.

⁴ A bitūnja ba ng'wa Midiani baalī ba Efa, Efeli, Hanoki, Abida na Elida; a bose benaba baalī ba būbyīle bo ng'wa Ketula.

⁵ Gwike ū Abulahamu akang'winha Isaka pyī ī sabo yakwe.

⁶ Alīyo a bitūnja ba kūbyalwa na bakīma bakwe a bangī, akabagabanhya manoong'ho; hama aho ataalī kūcha, ūbasaamya bīnga a halī ng'witūnja wakwe ū Isaka; ūbasaamīja kū sī ya kīya.

⁷ Ī myaka ya būlamu bo ng'wa Abulahamu ī yose yalī igana na makūmi mpungatī n'ītanò (175).

⁸ Hūna ū Abulahamu ūzumalīka mu būnamhala bowiza; ūjīkwa, wisangīja na bang'wawe alī namhala wa myaka mingī.

⁹ A bitūnja bakwe a ba Isaka nū Ishimaeli būnjīkīla ū ng'wipilinga lya Makipela, īlo līlī hihī na Mamule, ng'wilaale lya Ng'hītī, ū Efuloni ng'wana Zohali.

¹⁰ H'ī lilaale īlo Abulahamu akalīgūla kūfuma kū Bahītī. Ū ng'wenūmo h'ūmo akajīkīlwa ū Abulahamu hamò nū nke ū Saala.

¹¹ Ū Abulahamu aho wacha, ū Mulungu ūng'witīīla ningī no ū ng'witūnja wakwe ū Isaka. Ī shikū jene wasangwa akwikalaga Beeli-lahai-loi.

Shibyalīlwe sha ng'wa Ishimaeli

¹² Īyī yene mihayo ya ng'wa Ishimaeli, ng'witūnja wa ng'wa Abulahamu, ūyo Haagali muna Misili, ū ntūmami wa ng'wa Saala, akamyalīla Abulahamu.

¹³ Aya mina ga bitūnja ba ng'wa Ishimaeli, gīt'umo kwihela kwa kūbyalwa kwabo kwalī kūlī, Ū ng'witūnja wa kwandya kūbyala ū Ishimaeli walī Nebaioti; hūna wiza Kedali, Adibeeli, Mibusamu,

¹⁴ Mishima, Duma, Masa,

¹⁵ Hadadi, Tema, Jetuli, Nafishi, Kedema.

¹⁶ A benaba hū baalī bitūnja ba ng'wa Ishimaeli; hama nīyo a genaya ha mina ga basugi ba ng'anda ikūmi n'ibīlī, kūlenganīla na mizengo, hamò na ng'hambī jabo.

¹⁷ Ī myaka ya būlamu bo ng'wa Ishimaeli ī yose yalī igana na makūmi a adatū na mpungatī (137). Ūzumalīka, ūjīkwa, wisangīja na bang'wawe.

¹⁸ Ī shibyalīlwe shakwe shikazenga ng'wipandī lya kwandīja Havila kūja Shuuli, bbihī na lūbīmbī lwa sī ya Misili, kūjīlīīla Ashuli. Gwike bikalaga na wanishi ū kū bichaabo pyī ī shikū!

Kūbyalwa ba Esau na Yakobo

¹⁹ Īyī yene mihayo ya ng'wa Isaka, ng'witūnja wa ng'wa Abulahamu; ū Abulahamu akamyala Isaka.

²⁰ Ū Isaka aho alīntoola ū Lebbeka walī na myaka makūmi anè. Ū Lebbeka walī ng'wana Betueli, muna Alamu wa Padani-alamu; na walī ilūmbūye lya ng'wa Labani muna Alamu.

²¹ Ū Isaka akanombela ū nke nguno walī ngūmba; ū SEEBA ūng'wigwa, ūbūcha nda.

²² A baana aho balī ū mu nda būyūnkoya ū ninabo; kūshisha nose ūhaya, “Nibūlī nalīkoya gīkī?” Ūja kūmūja SEEBA ū mhayo gwenūyo.

²³ Ū SEEBA ūng'wīla, “Ū mu nda yako galīmo mahanga abīlī, Ū mu būbyīle wako jikwilonga ng'anda ibīlī Ījo jitī na būsangī. Ū lūmò lūkūbiza na nguzu kūtinda ū lūngī; ū ntaale akūntūmamīla ū ndo.”

²⁴ Ū mu nda yakwe baalīmo baana bagosha babīlī ba mabasa; aho lyashika ī likanza lya kūbyala,

²⁵ Ūyo akwandya kūfuma walī waza, nīyo ū mīlī gwakwe gwalī gītī igoodi lya booya; na lūūlū būng'witana Esau.

²⁶ Ū nzunaaye ūkūūbīja haho na haho, wiza andimile kwishiigina ū Esau; ū mhayo gwenūyo gūng'wenheleja kwitanwa Yakobo. Ū Lebbeka aho alībabyala a baana benabo, ū Isaka walī na myaka makūmi atandatū (60).

Esau kūjinja būbyalwa bo kwandya

²⁷ A bayanda benabo aho bakūla, ū Esau akabiza ng'hīīgi kalalamba; ūyūdīla kū matogolo. Lelo ū Yakobo ūbiza munhū nembeezu wa kwikala ha kaya.

²⁸ Ū Isaka walī atogilwe nyama ja ndimu, na lūūlū akantogwa no ū Esau; alīyo ū Lebbeka ūntogwa ū Yakobo.

²⁹ Lūshikū lūmò ū Yakobo walī wazuga shihele sha ndīngū; ū Esau wiza atuubile kīngī nasho, ū kūfuma ū kū matogolo ūko wadīlaga.

³⁰ Ūng'wīla ū Yakobo, “Alinisabūlīlage ho a banashihele a baaza benabo nalye, naakatuubaga!” (H'ī nguno yene akitanwa Edomu).

³¹ Nang'hwe ū Yakobo ūnshokeja, “Nijingījage tame ū būbyalwa wako wa kwandya.”

³² Ū Esau ūshosha alīhaya, “Bebe lekaga ī liguusha, ū nene nalībūlagwa lūtuubo, būkūnigunanha kī ū būbyalwa bo kwandya?”

³³ Ū Yakobo ūng'wīla, “Nilahīlīlage tame!” Wilahīla ng'hana; ūnjingīja Yakobo ū būbyalwa wakwe wa kwandya.

³⁴ Hūna ū Yakobo ūng'winha ū Esau ngatī na shihele sha ndīngū, ūlya. Aho wamala kūlya ūng'wa, hūna ūbūūka ūfuma ūja. Ū Esau ūbiza wabūdalaha ū būbyalwa wakwe wa kwandya!