wandījo 22 - Bibilia Ilagano Lya Kale 2015

Abulahamu kūgeng'wa na Mulungu

¹ Ikanza ilebe ū mu shikū jenījo, ū Mulungu ūngema ū Abulahamu. Ūng'witana, “Abulahamu!” Nang'hwe widīka, “Kalame Baba!”

² Ūng'wīla gīkī, “Nsolage ū ng'witūnja wako; ū ng'witūnja wako ūyo ūmò wike ū Isaka, ūyo ūntogilwe, ūje nang'hwe kū sī ya Molia, ūkamfunye kū lūgūlū lūmò ūlo nalakoolekeje, abize shitambo sha kūpemva.”

³ Mu dilū makīngo aho weela, ū Abulahamu ūbūūka kūgolanya nzobe yakwe. Ūbamisha na basūmba babīlī batūmami bakwe, hamò nū Isaka; bandya kūpandagūla ng'hwi ja ha ng'walīlo gwa shitambo. Aho bamala būbūūka bajile ū kwipandī īlo Mulungu walī wanagīīla.

⁴ Kū lūshikū lwa kadatū lwaho wahayūbūūcha miso ū Abulahamu, ūlīloleela kūle kū būtongi ī lipandī lyenīlo.

⁵ Hūna ūbawīla a batūmami bakwe gīkī, “Ikalagi henaha nī nzobe, ū nene nū nyanda tūje ūko tūkalamye, tūkūshoka hangī tūmusange aha.”

⁶ Ū Abulahamu ūjisola ī ng'hwi ja shitambo sha kūpemva, ūnseseja ū ng'witūnja wakwe ū Isaka. Ū wei ūgūbūūcha ū mooto nū lūshū. Aho balīshimīza būbīlī wabo gīko,

⁷ Ū Isaka ūnyombya ū ise ū Abulahamu alīhaya, “Baba!” Ū Abulahamu widīka, “Ni kinehe ng'wanone!” Ū Isaka ūhaya, “Ū moto tūlī nago, nī ng'hwi jiiji; al'ī ng'holo ya shitambo sha kūpemva, ī yene īlī halī?”

⁸ Ū Abulahamu ūhaya, “Ī ng'holo ya shitambo sha kūpemva, Mulungu akūtūpandīkīla ng'wanone.” Hūna būja nalo ū lūgendo balī babīlī dūhū gīko.

⁹ Aho bashika a h'ipandī īlo Mulungu walī wanagīīla, ū Abulahamu ūbeeja ho ng'walīlo, ūjihela chiza chiza nī ng'hwi a ha ng'walīlo. Hūna ūntunga ū ng'witūnja wakwe ū Isaka; ūnaalīkīja a ha ng'walīlo, a higūlya ya ng'hwi.

¹⁰ Wibeeja beeja, hūna ūlūdima ū lūshū mu nkono gwakwe, gīkī ansīnze ū ng'witūnja wakwe.

¹¹ Alīyo malaika wa ng'wa SEEBA ūng'witana kūfuma ng'wigūlū; ūhaya, “Abulahamu Abulahamu!” Widīka, “Kalame Baba!”

¹² Ūng'wīla, “Ūtizūnkuumya ū nyanda! Lekaga ū kūng'wītīla mhayo gose gose. Ī haha naamanaga lūūlū gīkī ūng'ogohile ū Mulungu, nguno ūtaniimile ū ng'wana wako, ū ng'witūnja wako ūyo ūmò wike!”

¹³ Kūbūūcha miso ī gīkī ū Abulahamu, ūbona ng'ondi ya ng'holo, yigwasanyaga a mapembe gayo ng'wisaka. Wījīla ho wiza wīfunya kūbiza shitambo sha kūpemva, a ha ng'wanya gwa ng'witūnja wakwe.

¹⁴ Ū Abulahamu ūlitana ī lipandī lyenīlo gīkī, “SEEBA akabapandīkīlaga.” Kūshisha nī lelo gūtaalī gūkūhayiagwa gīkī, “A ha lūgūlū lwa ng'wa SEEBA hū hene bakapandīkīlaga.”

¹⁵ Ū Malaika wa ng'wa SEEBA ūng'witana ū Abulahamu lūkangala lwa kabīlī kūfuma ng'wigūlū.

¹⁶ Ūhaya gīkī, “Nene ng'wenekīlī nalitonga kū lina lyane, alīhaya SEEBA; īkī wagwīta ū mhayo gwenūyū, waleka kūngugīla ū ng'wana wako, ū ng'witūnja wako ūyo ūmò wike,

¹⁷ Ū nene nakūkūfuuha no no no. Ū būbyīle wako nakūbūkwīja būbize gītī sonda ja ng'wigūlū ū wingī waho, nūūlū gītī maseni ga ha nyanza. Na būkūbiza na būdūla wa kūbapyena banishi, na kūbataaja mizengo yabo.

¹⁸ Na hangī īkī waligwaga ī lilaka lyane, pye a mahanga ga mu sī gakwīlūkīlwa mu nzīla ya būbyīle wako.”

¹⁹ Hūna ū Abulahamu ūja ūkababītīla a basūmba ba ha ng'wakwe, ūshoka nabo Beeli-sheba.

Bitūnja ba ng'wa Naholi

²⁰ Hanuma ya makanza malebe, ū Abulahamu ūwīlwa gīkī, “Ū Milika nang'hwe wamyalīla bitūnja ū ndūgūyo ū Naholi.

²¹ Ū wa kwandya Huzi, bangī ba Buzi, Kamueli (ise wa ng'wa Alamu),

²² Kesedi, Hazo, Pilidashi, Jidilafu na Betueli.”

²³ Ū Betueli akamyala Lebbeka. A bitūnja a banaane benaba h'abo Milika akamyalīla ū Naholi, ū ng'wanong'wawe na Abulahamu.

²⁴ Walī na nkīma ūngī witanagwa Leuma, nang'hwe ūbyala bitūnja; ba Teba, Gahamu, Tahashi, na Maaka.