wandījo 17 - Bibilia Ilagano Lya Kale 2015

Ilagane mu nzīla ya kūsaalwa

¹ Ū Abulamu aho washisha myaka makūmi kenda na kenda (99), ū SEEBA akang'wilongela ūng'wīla gīkī, “Ū Nene nalī Mulungu wa būdūla bose, shimīzaga mu kūniigwa nene, hangī ūbize ūtī na shilingo.

² Nakūbeeja ilagane a ha gatī yane nū bebe; nīyo ū būbyīle wako nakūwīta būbize būtaale.”

³ Ū Abulamu ūgwa achimīgije; ū Mulungu ūng'wīla gīkī,

⁴ “Ī lilagane lyane ū kūlī bebe līlī gīkī, Ūkūbiza ise wa mahanga mingī.

⁵ Nīyo ūtitanwa Abulamu hangī; ī lina lyako lyabizaga Abulahamu, nguno naakwītaga kūbiza ise wa mahanga mingī.

⁶ Nakūkwīta ūbize na būbyīle būtaale, nabeeje mahanga mingī kūfuma mulī bebe; na batemi bakūfuma ū mulī bebe.

⁷ Nakūlīguzuhya ī lilagane lyane, lībize ilagane lya welelo na welelo ū kūlī bebe, nū būbyīle wako shibyalīlwe na shibyalīlwe īsho shikwiza ha numa yako; ū nene nabize Mulungu wako, na Mulungu wa būbyīle wako ūbo būkwiza ha numa yako.

⁸ Ī sī ya Kanaani īyo ūkwikalaga mo gītī nobeji, pyī ī yose nakūkwinha bebe hamò na būbyīle wako ūbo būkwiza ha numa yako. Īkūbiza yako ya wikomangīle, shikū jose ja welelo na welelo; na nakūbiza Mulungu wabo.”

⁹ Hūna ū Mulungu ūng'wīla ū Abulahamu gīkī, “Īkwigeleelilwe ūlīlang'hane ī lilagane lyane ū bebe ng'wenīkīlī, pyī nū būbyīle wako, shibyalīlwe na shibyalīlwe īsho shiliza ha numa yako.

¹⁰ Ī lilagane lyane īlo nalīlītūūla ha gatī yane nū bebe, hamò nū būbyīle wako ūbo būkwiza ha numa yako, īlo ūkūlīlang'hana līlī gīkī, Būlī ngosha ū mu bing'we akūsaalwa.

¹¹ Hūna lūūlū mukūyūsaalwa; ū būsaalwa wenūbo hū lūkūbiza lūmeng'ho lw'ilagane a ha gatī yane nū bing'we.

¹² Ū mu shibyalīlwe shing'we ī shose īsho shiliza, būlī ng'wana ngosha ū mu bing'we ūlū ūshisha shikū inaane asaalwe; abize wa kūbyalīlwa ha kaya, nūūlū wa kūgūlwa na hela kūfuma kū babisa, ūyo atī wa kūfuma mulī bebe.

¹³ Būlī ng'wene ū wa kūbyalīlwa ha kaya yako shiigelile asaalwe, pyī nūūlū wa kūgūlwa bo hela jako. Ī lilagane lyane līkūbiza mu mīlī gwing'we; līl'ilagane lya welelo na welelo.

¹⁴ Ngosha ose ose ūyo atasaalilwe, ūyo mīlī gokwe gūtasaalilwe, akūkomanyiwa īnjiwe ū mu banhū bakwe; nguno ū ng'wenūyo nkenaagūji w'ilagane lyane.”

Saala kwisagījiwa kūbyala ng'wana

¹⁵ Hūna ū Mulungu ūng'wīla ū Abulahamu na gīkī, “Ū nke wako ū Salai, oyaga ū kūng'witana Salai; ī lina lyakwe lyabizaga Saala.

¹⁶ Nīyo nakūmfuuha, hama nakūkwinha ng'wana ngosha kūbītīla mulī we. Nakūmfuuha abize nina wa mahanga, na batemi ba banhū bakūfuma mulī we.”

¹⁷ Ū Abulahamu ūgwa matuja nzwi, achimīgije; hūna ūseka kūnū aliwīla gīkī, “Ū munhū wa myaka igana nang'hwe adūgije kūbyalīlwa ng'wana gete? Ū Saala na būgikūlū bokwe wenūbo ūbyala ng'wana!”

¹⁸ Hūna ū Abulahamu ūng'wīla ū Mulungu gīkī, “Hambū hambū ū Ishimaeli ūlū ni okūla akahangama kū būtongi wako!”

¹⁹ Ū Mulungu ūhaya, “Ūlītūngīlīja; alīyo ū nke wako gete ū Saala, h'ūyo akūkūbyalīla ng'wana ngosha, nang'ho ūkūng'wilīka ī lina lyakwe Isaka. Ū ng'wenūyo h'ūyo nakūbeeja nang'hwe ī lilagane lyane, lībize ilagane lya welelo na welelo, kūlwa nguno ya būbyīle wakwe ūbo būkwiza ha numa yakwe.

²⁰ Nī ya ng'wa Ishimaeli īyo ūlīyīhaya nayigwaga nayo; nang'hwe nakūng'wīlūkīla ī mbango. Nakūng'wīta abize na būbyīle būtaale, na akūbiza na mabità mataale no no no; abize ise wa basugi ikūmi na babīlī; nīyo nakūng'wīta kūbiza ihanga itaale.

²¹ Alīyo ī lilagane lyane nakūlībeeja na Isaka, ūyo Saala akūkūbyalīla ha ng'waka makanza gīt'aya.”

²² Ū Mulungu aho wamala kūlūngalūnga nū Abulahamu, wīnga ho.

²³ Ū mu lūshikū lwenūlo, ū Abulahamu ūnsola ū ng'witūnja wakwe ū Ishimaeli, na a basese abo baalī baagūlwa bo hela jakwe, na a ba kūbyalīlwa a ha kaya yakwe, pye a ba gosha ba ha ng'wakwe ūbasola, ūbasaala gīt'umo Mulungu akang'wīlīla.

²⁴ Ū wei ū Abulahamu aho alīsaalwa, walī na myaka makūmi kenda na kenda (99).

²⁵ Alīyo ū ng'witūnja wakwe ū Ishimaeli, walī na myaka ikūmi n'idatū aho alīsaalwa.

²⁶ Ū Abulahamu nū Ishimaeli ū ng'witūnja wakwe, bakasaalwa lūshikū lūmò būbīlī wabo.

²⁷ Na būlī ngosha ū mu kaya ya ng'wa Abulahamu ūsaalwa hamò nang'hwe mu lūshikū lwenūlo; abize wa kūbyalīlwa ha kaya, nūūlū wa kūgūlwa bo hela kūfuma kū babisa.