wandījo 16 - Bibilia Ilagano Lya Kale 2015

Salai na Haagali

¹ Gwike ū Salai ū nke wa ng'wa Abulamu walī atīnamyalīla baana ū ngoshi, alīyo walī na nsese nkīma muna Misili, witanagwa Haagali.

² Lūshikū lūmò ūng'wīla ū Abulamu gīkī, “Bebe ū SEEBA wanilugalīla ū nene ū būbyīle, ni walaala nang'hwe ū nsese wane; hamo nadūgije kūpandīka a baana mu nzīla yakwe.”

³ Hūna lūūlū ū Abulamu aho washisha myaka ikūmi al'ū mu sī ya Kanaani, ū nke wakwe Salai ūnsola ū nsese wakwe ū Haagali, ū muna Misili; ūng'winha ū ngoshi gīkī antoole.

⁴ Ū Abulamu ūlaala nag'hwe ū Haagali, ūngeta nda; ū nkīma ng'wenūyo aho wabona gīkī wabiza nda, ūndalaha ū nina būgonzo.

⁵ A henaho ū Salai ūng'wīla ū Abulamu gīkī, “Yene yako lūūlū, a makoye aya galīnigwīla genaya wagenhelegije bebe. Nguno ū nene nakakwinha ū nsese wane gīkī ūntoole, hūna aho wabona gīkī wabiza nda, ūnidalaha. Ū SEEBA ni abizage namuji a ha gatī yane nū bebe!”

⁶ Ū Abulamu ūhaya, “Ū nsese wako alī mu nkono gwako, ng'wītīlage mhayo gose gose ūyo ūlīgūbona gīkī gūng'wigeleelilwe.” Hūna ū Salai ūnuhya ū Haagali, nose ūpeela wīnga ho.

Haagali na malaika wa ng'wa SEEBA

⁷ Malaika wa ng'wa SEEBA ūmona ū Haagali ha lwinzī, lwalī hihī n'ipanda lībītile ng'witogolo kūja sī ya Shuuli.

⁸ Ūhaya, “Bebe Haagali nsese wa ng'wa Salai, ūlīfuma halī, na ūjile hei?” Nang'hwe ūshosha, “Nalīmpeela mayū būgonzo, Salai.”

⁹ Ū Malaika wa ng'wa SEEBA ūng'wīla gīkī, “Shokaga ū kūlī noko būgonzo, ūkabize ng'widohya ū kūlī we.”

¹⁰ Ū Malaika ongeja kūhaya gīkī, “Nīyo ū būbyīle wako nakūbūkwīja no, kūshisha būtūdūla kūbalwa.”

¹¹ Ū Malaika ng'wenūyo ūhaya na gīkī, “Ī haha ū bebe ūlī nda, Ūkūbyala ng'wana ngosha. Ī lina lyakwe ūkūng'wilīka Ishimaeli, nguno ū SEEBA wagabonile a makoye gako.

¹² Akūbiza gītī nzobe ya mu matogolo; nīyo akūbiza ng'wilwisha na banhū bose, hama pye a banhū bakwilwisha nang'hwe. Ū mu kikalīle kakwe, akwilemeelwa nabo pye a badūgūye.”

¹³ Ū nkīma ng'wenūyo ūng'winha lina ū SEEBA ūyo akayomba nang'hwe; ūhaya, “Ū bebe ūlī Mulungu ūyo akanibonaga;” kūnū aliwīla gīkī, “Ī lelo namona Ūyo akanibonaga.”

¹⁴ H'ī nguno yene ū lwinzī lwenūlo lūkitanwa lina lya, “Beeli-lahai-loi;” nī lelo īyī lūtaalī lūlīho aho lwalī, a ha gatī ya Kadeshi na Beledi.

¹⁵ Aho lyashika ī likanza, ū Haagali ūmyalīla ū Abulamu ng'wana ngosha; ū Abulamu ūng'winha lina lya Ishimaeli ū ng'wana ūyo Haagali akamyala.

¹⁶ Ū nkīma ng'wenūyo aho alīmyala ū Ishimaeli, ū Abulamu walī na myaka makūmi anaane n'ītandatū.