wandījo 14 - Bibilia Ilagano Lya Kale 2015

Abulamu kūnguna Lutu

¹ Ū mu shikū jenījo, ntemi Amulafeli wa Shinaali, na Alioki ntemi wa Elasa, na Kedolaoma ntemi wa Elamu, hamò na Tidali ntemi wa Goyimu,

² bakamba būlūgū kwilwisha na ntemi Beela wa Sodoma, na Bilisha ntemi wa Gomola, na Shinabi ntemi wa Adima, na Shemeba ntemi wa Zeboyimu, hamò na ntemi wa Bela (h'ī Zoa).

³ A batemi benaba ū wa Sodoma, wa Gomola, wa Adima, wa Zeboyimu, nū wa Bela būgasangūlīla a mabità gabo, būūkihela mu sī ya ntubīlo gwa Sidimu (h'ī Nyanza ya Munhu).

⁴ Baalī ha sīlīlī ya būsugi bo ntemi Kedolaoma, būshisha myaka ikūmi n'ībīlī bakūntūmamīlaga, alīyo ū mu ng'waka gw'ikūmi n'idatū būngomela.

⁵ Ū mu ng'waka gw'ikūmi n'īnè, ū ntemi Kedolaoma na a batemi abo walī wiyigwile nabo būja kwilwisha būlūgū na a banishi babo būbapyena, Balefaimu būbapyenela Ashiteloti-kanaimu, Bazuzimu būbapyenela Hamu, Baemimu būbapyenela Shaveni-kiliataimu,

⁶ hamò na Bahooli, a bene būbapyenela mu sī ya magūlya ya Seili; būūkashika na Eli-palani, kūjīlīīla kw'itogolo lītī na banhū.

⁷ Hūna būgalūka, būbasanga bana Eni-mishipati (h'ī Kadeshi); būyīpyena pyī ī sī ya Baamaleki, na a Baamoli abo bikalaga mu Hazezoni-tamali.

⁸ Nabo a batemi ba Sodoma, Gomola, Adima, Zeboyimu, nū wa Beela (h'ī Zoa) būkuminga mabità gabo. Būbūūka bajile kū sī ya ntubīlo gwa Sidimu, būūkamba būlūgū

⁹ kwilwisha nū Kedolaoma ū ntemi wa Elamu, nū Tidali ū ntemi wa Goyimu, nū Amulafeli ū ntemi wa Shinaali, hamò nū Alioki ū ntemi wa Elasa, batemi bane benabo kwilwisha na batanò.

¹⁰ Ū mu sī ya ntubīlo ī ya Sidimu, gaalīho machongo mingī ga laami; na lūūlū aho baheewa a batemi ba Sodoma na Gomola, bahayūpeela bamò ba banhū babo būyūgwīla ū mu machongo genayo, bangī būpeelela kū ngūlū.

¹¹ A bapyeni būshisola pyī ī shikolo sha bana Sodoma na a bana Gomola, nī shilīwa shabo būduta bajile.

¹² Nū Lutu, ū ng'witūnja wa nzunaye wa ng'wa Abulamu būnsola, hamò nī sabo jakwe, nguno wikalaga mu Sodoma.

¹³ Ūmò wa banhū abo bakapūlūgūka wiza ū kūlī Abulamu ū Ng'hebulania, aho washika ūng'winha ī yenīyo. Ī kaya ya ng'wa Abulamu ī shikū jenījo yalī hihī na mitī ya ng'wa Mamule muna Amoli, ndūgūye wa ng'wa Eshikoli na Aneli; a bose baalī banwani biye ū Abulamu.

¹⁴ Ū Abulamu aho wigwa gīkī ū ndūgūye wadimagwa nding'wa, ūsolanhya bagosha ba mbagashūūla magana adatū n'ikūmi na banaane (318), ba kūbyalīlwa ha kaya yakwe; pye baalī balangilwe kalwīīle ka būlūgū. Ūkūūbīja kūshisha ipandī lya Dani.

¹⁵ Mu makanza ga būjikū ū Abulamu ūbagaba a banhū bakwe mu magele, hū būbadumīla a banishi, būbaheeba būpeela. Būbakūūbya kūshisha Hoba, sukuma ya Damasko.

¹⁶ Ūshipīja pyī ī shikolo īsho shalī shasolwa; ūnshosha nū ndūgūye ū Lutu, nī sabo jakwe, hamò na a bakīma, na a banhū a bangī.

Melikizedeki na Abulamu

¹⁷ Ū Abulamu aho washoka kūfuma ū kū būlūgū ūbo akampyena ntemi Kedolaoma hamò na a batemi abo walī wiyigwile nabo, ū ntemi wa Sodoma ūja kwibona nang'hwe, ūnsangīla mu mbūga ya Shave (makūlū gaho sī ya ntemi).

¹⁸ Melikizedeki, ntemi wa Salemu, nang'hwe wiza, ū ng'wene wenha migatī na divai. Ū wei walī ngabīji wa ng'wa Mulungu ūyo alī Higūlya no.

¹⁹ Hūna lūūlū aho washika ūmfuuha ū Abulamu, alīhaya gīkī, “Ū Abulamu īīlūkīlwe mbango na Mulungu ūyo alī Higūlya no, ū Nseemi w'igūlū na sī.

²⁰ Nīyo akumīlījiwe ū Mulungu Ūyo alī Higūlya no, ūyo wabatūūlile a banishi bako mu nkono gwako.” Hūna ū Abulamu ūng'winha īmò ya ng'wikūmi ya shikolo shose.

²¹ Ū ntemi wa Sodoma ū ng'wene ūng'wīla ū Abulamu gīkī, “Ninhage nene a banhū, ū bebe ūtwale ī shikolo.”

²² Alīyo ū Abulamu ūng'wīla ū ntemi wa Sodoma gīkī, “Ū nene naamalile kūlahīla kūlī SEEBA, ū Mulungu ūyo alī Higūlya no, ū Nseemi w'igūlū na sī.

²³ Naahayile gīkī natūdūla kwanukūla shikolo shako shose shose, yaya nūūlū kalūgoye, nūūlū ni katungījo ka shilaatū dūhū yaya gete; ūtizūpandīka nzīla ya kūhaya gīkī, ‘Nansabije ū Abulamu.’

²⁴ Natanukūlaga shose shose, ūlū ītī īsho baalyile dūhū a banhū bane, nī shisho bigeleelilwe kwanukūla a banhū abo baalī baajile hamò nane, a ba Aneli, Eshikoli, na Mamule; a bene ni basolage īsho baanogelile.”