wandījo 12 - Bibilia Ilagano Lya Kale 2015

Kwitanwa kwa ng'wa Abulamu

¹ Ū SEEBA walī wamala kūng'wīla ū Abulamu gīkī, “Saamaga ū mu sī ya ng'wing'we, ūlekane nabo a badūgūyo, wīnge ū mu kaya ya ng'wa so; ūje kū sī īyo nalakoolekeje.”

² Nakūkwīta ūbize ihanga itaale, na nakūkūfuuha; Ī lina lyako nakūlyīta lībize itaale, nīyo ūkūbiza mbūūkī ya mbango.

³ Abo bakūkūlombela mbango nakūbafuuha, alīyo abo balakūzume nakūbazuma. Na būlī kwene ū mu sī, a banhū bakwīlūkīlwa mbango kūlwa nguno yako.

⁴ Hūna lūūlū ū Abulamu wīnga, gīt'umo walī wang'wīlīla ū SEEBA, nū Lutu ūja hamò nang'hwe. Ū Abulamu aho alīnga ī Halani, walī na myaka makūmi mpungatī n'ītanò (75),

⁵ akansola nū nke wakwe ū Salai, nū ng'witūnja wa nzunaye ū Lutu, nī sabo jabo. Aho balī mu sī ya Halani baalī bapandīka basese, būbasola nabo; būbūūka bajile Kanaani. Aho bashika ko,

⁶ Ū Abulamu wandya kwīyeleela ī sī yenīyo. Nose ūshika mu Shekemu, ipandī ilebe hitanagwa Mole, na ntī ntaale gwalīho; ūtūūla ng'hambī henaho. Ū mu shikū jenījo bikalaga bana Kanaani ū mu sī yenīyo.

⁷ Hūna ū SEEBA ūng'wilongela ū Abulamu ūng'wīla gīkī, “Ū būbyīle wako, nalīwinha ī sī yenīyī.” Ū Abulamu ūbeeja ng'walīlo kūlwa ng'wa SEEBA ūyo akang'wilongela.

⁸ Gwike akasaama a henaho, ūsegeja ūja kū lūgūlū lwalī kīya ya nzengo gwa Beeseli. Ūtūūla ng'hambī yakwe kwenūko, ha gatī ya Beeseli na Ai; ī Beeseli yūbiza ng'weli, ī Ai kīya. A henaho ūbeeja ng'walīlo kūlwa ng'wa SEEBA; ūlīkumīlīja ī lina lya ng'wa SEEBA.

⁹ Ū Abulamu ūsegeja hangī, wīnga a henaho ūjīlīīla Negevu.

Abulamu kūpeelela Misili

¹⁰ Kwimanīla yagwa nzala nhaale ū mu sī yenīyo, ū Abulamu ūpeelela sī ya Misili, gīkī akikale kwenūko ū ng'wikanza lya nzala, nguno īkabiza ng'halī no.

¹¹ Aho wegeela kūshikīīla ī Misili, ūng'wīla ū nke wakwe ū Salai, “Namanile gīkī ūlī nkīma w'ihanga isoga ū kūlola.

¹² A bana Misili ūlū balakūbone bakūhaya, ‘Ū ng'wenūyū nke wakwe.’ Na lūūlū bashikile kūnibūlūga ū nene, būkūleka ū bebe.

¹³ Ali lūūlū, ūlabawīle gīkī ūl'ilūmbū lyane. Ūlū ūhaya gīko bakūnigaliila kūlwa nguno yako, nū būpanga bone ūkūbūpīja.”

¹⁴ Na ng'hana ū Abulamu aho washika ī Misili, a bana Misili būmona ū nkīma ng'wenūyo gīkī walī nsoga no ī lihanga lyakwe.

¹⁵ A bana ng'oma ba ng'wa Falao aho bamona būkankumīja ū Falao; haho na haho ū nkīma ng'wenūyo ūsolwa ūtwalwa ng'wikūlū.

¹⁶ Ū Falao ūngaliila chiza ū Abulamu kūlwa nguno yakwe ū Salai; ūng'winha mitugo, ng'holo na ng'ombe. Ūng'winha na nzobe ng'hosha na ng'hīma, na ngamīla; hamò na batūmami bagosha na bakīma.

¹⁷ Alīyo ū SEEBA akangwisīja makoye ū Falao nī kaya yakwe pyī ī yose, kūlwa nguno ya ng'wa Salai, ū nke wa ng'wa Abulamu.

¹⁸ Ū Falao ūng'witana ū Abulamu ūmūja, “Bebe wanīītīlile mhayo kī ū gwenūyo? Nibūlī ūtaniwīlile gīkī nke wako?

¹⁹ Nibūlī ūkahaya, ‘Ū ng'wenūyū ilūmbūyo,’ kūshisha nose nūnsola abize nke wane? Ali lūūlū, ūūyo ū nke wako; nsolage ūje!”

²⁰ Hūna ū Falao ūbalagīla a banhū ba ha ng'wakwe, būnshindīkīla ū Abulamu nū nke, hamò nī shose īsho walī nasho.