wandījo 11 - Bibilia Ilagano Lya Kale 2015

Nzengo gwa Babeli

¹ Ali lūūlū, ī sī aho ītaalī na lūlīmi lūmò na kalūngalūngīle ka mbika īmò,

² a banhū bajaga bakūsaama saamaga kūjīlīīla mhandī ja kīya. Nose būūkashika mu mbūga ngalī ya Shinaali, būtūūla ng'hambī būzenga henaho.

³ Hūna biwīla gīkī, “Bing'we tūbeejagi madafaali tūgapembe mu moto gagūlūngīle.” Ī shikū jenījo batūmamīlaga madafaali a ha ng'wanya gwa mawe, na laami a ha ng'wanya gwa būlongo.

⁴ Bakiwīla, “Twibeegejagi nzengo, tūzenge mo numba ndīhu ya kūkuumya kū malunde; twipandīkīle lina, tūtizūsalang'hana sagala sagala hose pye ū mu sī.”

⁵ Ū SEEBA wiza kūgūlola ū nzengo gwenūyo, nī numba ī ndīhu īyo babeejaga a banhū.

⁶ Ū SEEBA ūhaya gīkī, “A banhū benaba balī na būmò, na bakūlūngalūngaga lūlīmi lūmò. Hūna lūūlū īkī bandyaga kwīta mihayo īlī gīkī, gūtīho gwa kūbalemeela ūyo balahaye kūgwīta.

⁷ Ī gete tūjagi tūkabayuugagūlīle ū lūlīmi lwa kalūngalūngīle kabo, boye ū kwiyigwa ūlū balīyomba.”

⁸ Hūna ū SEEBA ūbasambaaja, bīnga ho a henaho; būja bakūzengaga hose hose ū mu masī, gūcha ū nīmo gwa kūgūzenga ū nzengo gwenūyo.

⁹ H'ī chene ī lipandī lyenīlo līkitanwa Babeli, nguno a henaho h'aho ū SEEBA akalūyuugagūlīla ū lūlīmi lwa kalūngalūngīle ka mu sī hose pye. Ū SEEBA ūbasalang'hanya ho a henaho, bīnga ūbasambaaja kūja mu masī gose pye.

Būbyīle wa ng'wa Shemu

¹⁰ Īyī yene mihayo ya būbyīle wa ng'wa Shemu. Aho yabīta myaka ībīlī kūfuma a h'ihūūma, ū Shemu akamyala Apakishadi; a makanza genayo wasangwa alī na myaka igana (100).

¹¹ Ū Shemu aho wamyala ū Apakishadi, akikala ho myaka magana atanò (500); ūbyala na bitūnja bangī hamò na bashīke.

¹² Ū Apakishadi aho washisha myaka makūmi adatū n'ītanò (35), ūmyala Shela.

¹³ Hūna ū Apakishadi aho wamyala ū Shela, wikala ho myaka magana anè n'idatū (403); ūbyala na bitūnja bangī hamò na bashīke.

¹⁴ Ū Shela nang'hwe aho washisha myaka makūmi adatū (30), ūmyala Ebeli.

¹⁵ Ū Shela aho wamyala ū Ebeli, wikala ho myaka magana anè n'idatū (403); ūbyala na bitūnja bangī hamò na bashīke.

¹⁶ Nang'hwe ū Ebeli aho washisha myaka makūmi adatū n'īnè (34), ūmyala Pelegi.

¹⁷ Ū Ebeli aho wamyala ū Pelegi, wikala ho myaka magana anè na makūmi adatū (430); ūbyala na bitūnja bangī hamò na bashīke.

¹⁸ Ū Pelegi aho washisha myaka makūmi adatū (30), ūmyala Leu.

¹⁹ Ū Pelegi aho wamyala ū Leu, wikala ho myaka magana abīlī na kenda (209); ūbyala na bitūnja bangī hamò na bashīke.

²⁰ Ū Leu aho washisha myaka makūmi adatū n'ībīlī (32), ūmyala Selugi.

²¹ Ū Leu aho wamyala ū Selugi, akikala ho myaka magana abīlī na mpungatī (207); ūbyala na bitūnja bangī hamò na bashīke.

²² Ū Selugi nang'hwe aho washisha myaka makūmi adatū (30), ūmyala Naholi.

²³ Ū Selugi aho wamyala ū Naholi, akikala ho myaka magana abīlī (200); ūbyala na bitūnja bangī hamò na bashīke.

²⁴ Ū Naholi aho washisha myaka makūmi abīlī na kenda (29), ūmyala Teela.

²⁵ Ū Naholi aho wamyala ū Teela, akikala ho myaka igana n'ikūmi na kenda (119); ūbyala na bitūnja bangī hamò na bashīke.

²⁶ Ū Teela aho washisha myaka makūmi mpungatī (70), ūbabyala ba Abulamu na Naholi, na Halani.

Būbyīle wa ng'wa Abulamu

²⁷ Īyī yene mihayo ya būbyīle wa ng'wa Teela, ū Teela ūyo akababyala ba Abulamu na Naholi, na Halani. Ū Halani ūmyala Lutu,

²⁸ gwike ū Halani ng'wenūyo akazumalīka, ūneka ū ise ū Teela ataalī mpanga. Akazumalīkīla mu sī ya Ūlū ya Bakalidayo, ūko walī wabyalīlwa.

²⁹ A ba Abulamu nū Naholi būtoola būbīlī wabo; ū nke wa ng'wa Abulamu witanagwa Salai, ū wa ng'wa Naholi Milika. Ū Milika walī na nsīzaye witanagwa Iska; a babīlī benaba ū saabo walī Halani.

³⁰ Alīyo ū Salai walī atī na baana, nguno walī ngūmba.

³¹ Hūna ū Teela ūsaama ū mu sī ya Bakalidayo, ī Ulu; wīnga nū ng'witūnja wakwe ū Abulamu, būsaama kūja Kanaani. Baalī nū ng'wizūkūlū wakwe ū Lutu, ū ng'wana Halani, hamò nū Salai ū ng'wīnga wakwe, ū nke wa ng'wa Abulamu. Alīyo aho bashika Halani, būpandīka nzengo, bikala ng'wenūmo.

³² Ū Teela ūshisha būlamu bo myaka magana abīlī n'ītanò (205), hūna ūzumalīkīla mu sī ya Halani.