Tito 3 - Bibilia Ilagano Lya Kale 2015

Kikalīle ūmo kalī

¹ Ūbizūkīja babize bidohya ū kū batongeeji, na bigwi ū kū basugi; babize bachagūku kū būlī nīmo gwawiza.

² Yaya ū kūbiza badūkani nūūlū bayombo; babize biyūmīlīja, hangī booleche widohya būtaale kū banhū bose.

³ Nguno na a bise ī kale twalī bachilū chilū, na bashitiigwa. Twalī mu būlemva lemva wa kūtūmamīla būlī mbika ja kwikūmva, na kwiyeja mu mihayo ya malofu. Na twalī banhū ba wilu na ba kwikala twikolagwa bise benekīlī na benekīlī.

⁴ Alīyo ū wiza nū būtogwa bo ng'wa Mulungu Mpīja wise aho wilonga,

⁵ ūtūpīja. Gwike ītī kūlwa nguno twalī twabeeja shītīle sha būtūngīlīja, alīyo kūlwa shigongo shakwe. Ūtūpīja mu nzīla ya kūtooja kūlwa kūbyalwa būpya, nakwītwa kūbiza bapya mu nzīla ya ng'wa Moyo Ng'wela,

⁶ ūyo akatwitīīla mulī Yesu Kilisito Mpīja wise.

⁷ Nose yūbiza gīkī, ū mu kūbalīlwa būtūngīlīja kūlwa shigongo shakwe, tūbize bingīji gīt'ūmo kūlī ū kwisagīlwa kwa būpanga butashilaga.

⁸ Ū gwenūyū gūlī mhayo gwa kūsanyiwa. Hūna lūūlū natogilwe wīsomboole mu būgaliili pyī ī yose yenīyī, abo banzunije Mulungu bakalalwe kūgatūmamīla a makanza gabo mu shītwa shawiza. Ī mihayo yenīyī pyī ī yose īlī yawiza, hangī īlī na solobo ū kū banhū.

⁹ Alīyo ī ya būhalalī wa nyachilū chilū na ya kwihela kwa mashibyalīlwe, nūūlū ya wilemeelwa na gwikenya kūlwa nguno ya shilagīlo, lekanaga nayo ī yenīyo, nguno ītī na solobo na hangī midūhū.

¹⁰ Ū munhū ūyo atogilwe mihayo ya wilemeelwa ng'hūgūlage kamò nūūlū kabīlī, hama lekanaga nang'hwe!

¹¹ Managa gīkī ū munhū gītī ng'wenūyo akwītaga yabūbi nguno ahūganile, nīyo akwilamulaga wei ng'wenekīlī.

¹² Ūlū nalantūme Alitema nūūlū Tikiko kwiza ūko ūlī, ū bebe nzūgū wangū Nikopoli; nakūbiza kwenūko nguno naabonile nakūlīmalīla kwene ī likanza lya mbeho ya mu shiyaga.

¹³ Ū Zena ū mani wa shilagīlo nū Apolo, batūmage bize wangū, na hangī balola lolelage sha kwigunanhīla mu nzīla, batizūkoya.

¹⁴ Nīyo a banhū bise ni bilangage kwīta yawiza, bayūgunanha aho būlīho būgehelwa, batizūbiza batī na matwajo.

¹⁵ Pye abo balī hamò nane balīkūgīsha. Bagīshage abo batūtogilwe mu kūzunya. Shigongo shibize hamò ning'we bose: Alichene.