Tito 2 - Bibilia Ilagano Lya Kale 2015

Malange ayo gatūngīlīgije

¹ Alīyo ū bebe hoyaga nabo mihayo mitengeke, ya malange magūmūngūku.

² A banamhala babize na masala madeekanu, banhū abo bigeleelilwe kwinhwa ikūjo. Babize bitegeleja na bapanga ū mu kūzunya nū mu būtogwa, pyī nū mu wiyūmīlīja.

³ Gīko na a bagikūlū, nabo babize na nhūngwa j'ikūjo, batī balembekeja, batizūsugwa mhayo go būng'wi, babize balangi ba mihayo ya longe.

⁴ Bayūbalanga a bashīke kūbatogwa a bagoshi babo na a baana babo;

⁵ hamò na kūbiza bitegeleja, beela, bakomeezu ū mu milīmo ya mu kaya. Babize bawiza na bidohya ū kū bagoshi babo, gūtizūdalahwa ū nīmo go ng'wa Mulungu.

⁶ A basūmba nabo ūbahūgūla babize balembeezu.

⁷ Ū bebe ng'wenekīlī ū mu katūmamīle kako ka milīmo yose boolekejage būlolelo būsoga, ūbize ūtī na shilingo, nū mu kalangīle kako ūbize n'ikūjo.

⁸ Hangī ūbize na mihayo īlongile, īyo ītūdūla kūdalahījiwa; ū munhū ūyo atogilwe kūtūhaya kībi agayiwe ū gwabūbi, agooke.

⁹ A basese ni babizage bidohya mu yose ū kū basaabo būgonzo, babayeje, babize batī ba kwikala bishokeja nabo mihayo.

¹⁰ Hangī batizūbiza banyeecha ba shikolo, alīyo booleche mu yose gīkī balī basanyiwa na bawiza, a kalangīle ka ng'wa Mulungu mpīja wise kakūjiwe mu yose.

¹¹ Nguno ī shigongo sha ng'wa Mulungu shilīho kūlwa kūbapīja pye a banhū.

¹² Shikūtūlangaga kūbūlema ū būsoso nū kwikūmva kwa mu sī, ū ng'wikanza lya haha; na tūbize bitegeleja na beela,

¹³ aho tūtaalī tūkūlindīīlaga kwisagīlwa kwa kūyeja na kwilonga kw'ikūjo lya ng'wa Yesu Kilisito, ūyo alī Mulungu na mpīja wise ntaale.

¹⁴ Ū wei akifunya ng'wenekīlī kūlwa nguno yise, gīkī atūkomoole kwīnga mu būbi bose, ibeegeje banhū bakwe ba wikomangīle, beela, na bakalalilwe kwīta yawiza.

¹⁵ Hoyaga nabo ī mihayo yenīyī, ūbakomeleje na kūbahūgūla mu būdūla bose. Nīyo ūtizūng'winha munhū nūūlū ūmò ng'wanya gwa kūkūdalaha.