Sumo 8 - Bibilia Ilagano Lya Kale 2015

Masala gakwitanaga

¹ Angū, a masala gatahīlīkaga gwa gwa gwa? Ū witegeleja būtikalaga būkūhamukaga n'ilaka?

² A masala galīho būlī hene a ha nzīla ja mu magūlya, būlī ha nzīla maaka galīho galindanile;

³ a ha mibita ya kwingīlīla mu mizengo galīho, gakūhamukaga n'ilaka:

⁴ Bing'we banhū, nalīng'witana; pye a banhū nalībahīlīka n'ilaka lyane.

⁵ Bing'we ba lūtūgà, chagūkagi; bachilū, bizagi na būdeeba.

⁶ Nidegelekagi nalī na mihayo mitengeke ya kūlūngalūnga; ū nomo gwane gūkahayaga mihayo ītūngīlīgije.

⁷ Ū nomo gwane gūkasomboolaga ya ng'hana, nguno ū nomo gwane gūtītogilwe Ī ya malofu.

⁸ Pyī ī mihayo ya kūfuma mu nomo gwane ītūngīlīgije; gūtīho ūyo gwigoma gomile, nūūlū gwa nyahūnga.

⁹ Ū kū bitegeleja pyī ī yose Ītūngīlīgije, ū kū badeeba ītī na kabi nūūlū hado.

¹⁰ Solagi katongeelele kane, yaya kūdutwa hela; mupandīke būmani kūtinda zahabu jawiza,

¹¹ nguno a masala galī na mpango ntaale kūtinda lubi ū mu shose īsho ūlashiikūmve, shitīho sha kūlenganīla nago.

¹² Ū nene masala nakikalaga hamò na witegeleja, hama nalī na būmani, nū būdeeba nalī nabo.

¹³ Ū kūng'ogoha SEEBA kūlī kūbūkolwa ū būbi; ū wikumīlīja nabūkolilwe, nū būdoshi nī nhūngwa jabūbī, pye na a mahooya ga nyahūnga.

¹⁴ Būhūgūji na masala madekanu shenīsho shane, nene hū nalī būmani, hangī nalī na būdūla.

¹⁵ A batemi bakasugaga kūlwa nguno yane, na a batongeeji bakatūūlaga shilagīlo shitūngīlīgije kūlwa nguno yane.

¹⁶ A basugi bakasugaga kūlwa nguno yane, na a batongeeji ba sī jose

¹⁷ abo banitogilwe nū nene nabatogilwe, na a babo bakanikoobaga bakanipandīkaga.

¹⁸ Ū nene nalī nabo ū būsabi, nī likūjo nalī nalyo; nī sabo īyo ītī ya kūjimīīla, pyī nū kwīlūkīlwa nalī nako.

¹⁹ Ī linong'ho lyane isoga no kūtinda zahabu h'ūmo ībeelele, īsho shikafumaga mulī nene shilī na mpango ntaale kūtinda hela ījo jikakumīlījiagwa.

²⁰ Nakashimīzīlaga mu nzīla ya būtūngīlīja, mu kashimīzīle kagoloolile;

²¹ abo banitogilwe nakabalekelaga sabo kūlwa wingīji wabo, nī shisho bakibīkījaga nakashongejaga.

²² Ū SEEBA naalī hamò nang'hwe a ha wandījo bo milīmo yakwe, aho ītaalī kūbiza ho ī milīmo yakwe Ī ya kūfuma kale.

²³ Ū nene natūūlilwe ho kūfuma kale ya weleelo bose, kūfuma ha wandījo, aho sī ītaalī kūbiza ho.

²⁴ Naabyalwa kwīngīīla aho manyanza gataalī kūbiza ho, aho jitaalī kwilonga nzwīlo ja minzī mingī.

²⁵ Naabyalwa ī ngūlū ī ndo nī nhaale jitaalī kūlembeela ha mapandī gajo;

²⁶ numho ataalī kwīsūmba Ī sī na a matogolo gayo, nūūlū lūbuubu lose lose lwa mu sī.

²⁷ Naalīho aho alīlītūūla ī ligūlū ha wikalo walyo; aho alītūūla lūbīmbī lwa higūlya ya būjiba bo nyanza.

²⁸ Na a haho alīgatūūla ng'wigūlya a malunde, nī nzwīlo ja mu gatī ya būjiba ūjitūūlīla būlang'hani jiikale jilīho,

²⁹ aho alīyīpīndīlīja lūbīmbī lwa kwīlang'hana ī nyanza, a minzī gatizūshikīlanhya Ī shilagīlo shakwe; pye na a haho akūtūūlaga misingi ya sī.

³⁰ Ū nene naalī ntūmami ntaale, wa kwikala hamò nang'hwe, būlī lūshikū waniyegelaga; būl'ikanza nikalaga na būyegi ū kū būtongi bokwe,

³¹ nakwīyegelaga pyī ī sī yakwe, na a baana bakwe nakūbayegelaga.

³² Alilūūlū baana bane, nidegelekagi; balī na lubango abo bajidimile Ī nzīla jane.

³³ Giigwagi a malange mubize na masala; yaya ū kūgagumanīja.

³⁴ Ū munhū wa kwīdīlīla Ī mihayo yane alī na mbango, ū wa kwikala ha mibita yane būlī lūshikū alī nzūgūlū matū alindanile ha milyango yane.

³⁵ Nguno būlī ng'wene ūyo ūnipandīka ū nene, wapandīkaga būpanga, na akūbiza nganja ū kūlī SEEBA.

³⁶ Alīyo būlī ng'wene ūyo ūduuma kūnipandīka, akwiminya wei ng'wenekīlī; bose pye abo banikolilwe batogilwe icha.