Sumo 6 - Bibilia Ilagano Lya Kale 2015

Būhūgūji kūlwa būchilū

¹ Ng'wanone, ūlū wiyeega kūlwa nguno ya nzenganwa ng'wiyo, nūūlū widima nkono na munhū ūngī hūna ūng'wilahīlīla,

² Nūūlū wahaya mihayo milebe ūbiza wigwasha; mihayo ya kūhaya na nomo gwako yūkūgwisha,

³ Ītaga gūūyū ng'wanone ūpūlūgūke; ūlū ūgwa mu nkono go nzenganwa ng'wiyo, jaga ko ūkangwīle mu magūlū; ūkang'wibūūlīle ū nzenganwa ng'wiyo!

⁴ Galemejage a miso gako ū kūpandīka ī tūlo, a makumbīīso gako gatizūlaala tūlo.

⁵ Ipījage gītī laala kūpūlūgūka mu nkono gwa ng'hwīmi; gītī noni kūgūpūlūgūka ngono gwa ntegi.

⁶ Bebe ng'winogolelwa, jaga ha soomhi, ūkajiideedeng'hanye ūmo jikatūmamīlaga, ūchagūke.

⁷ Ī joi jitī na ng'hamīji, ndūhū nūūlū wa kūjimīīla, nūūlū nsugi.

⁸ Alīyo jikibīkīlaga shilīwa ū mu makanza ga chū, jikabilingaga ī shilīwa mu shikū ja magesa.

⁹ Bebe ng'winogolelwa ūkwikala ūlaalile kūshisha nanalī? Ūkūmisha nanalī ū mu tūlo yako?

¹⁰ Bebe laala laalaga ka kanza, shūūtūlaga ho kakanza, kunaga hado a makono wifuule.

¹¹ Alīyo ū būhabī būkūkūsanga gītī kūsangwa na ng'wiboneeji, nū būkuneese gītī ng'wanishi alī na shilanga mu nkono.

¹² Ū munhū ng'haali na ng'wibonya akajaga ūsīngīja na nomo nsoso būlī kwene,

¹³ kūnū akūbalolaga a banhū ūbakandīla liso, wīta okulīja hasī ī mhambala, na kūmanūbagemeelela bo nzwala jakwe;

¹⁴ wa kwikala akūdosaga mihayo mibi kūlwa būhaali bo mu ng'holò yakwe, na kūsoosela wilemeelwa mu banhū pyī ī shikū.

¹⁵ Alīyo akūgwīlwa mayanga mu būtūmana; akwisanganījiwa nhabaala, na atūpūlūgūka.

¹⁶ Īlīho mihayo ītandatū īyo ayīkolilwe ū SEEBA, īlī mpungatī ī ya malofu ū kūlī we.

¹⁷ Miso ga nyadooshi, lūlīmi lūlomolomo, makono ayo gakitaga mininga gatī na shilingo,

¹⁸ ng'holò īyo īkahelaga mihayo ya malofu, magūlū ayo galī mangū kūja kū yabūbi,

¹⁹ nkaanīji maama ūyo akitagūlaga būlomolomo; na munhū ūyo akasooselaga wilemeelwa mu badūgū.

Būhūgūji kūlwa būshihani

²⁰ Ng'wanone, dimaga shilagīlo sha ng'wa so; na a malange ga ng'wa noko yaya ū kūgaleka.

²¹ Shitūūlage mu ng'holò yako ilalī, ūshitunge mu nhingo yako gītī ngufu.

²² Shikūkūtongeela būlī kwene ūko ūjile, nūūlū ūlaalile shikūkūlang'hana, ūlū ūlī miso shikūlūngalūnga nang'ho.

²³ Nguno ī shilagīlo shilī talà, na a malange gal'isana; hama a kalangīle ka būhūgūji h'ī nzīla ya kikalīle,

²⁴ ya kūkūlang'hana kūlī nkima wabūbi; ūlūpūlūgūke ū lūlīmi lūkondooku, ū lwa nkīma ng'wīmīlīzu.

²⁵ Ūtizūwikūmvwa mu ng'holò yako ū wiza w'ihanga lyakwe; nūūlū a miso gakwe gatizūkūgwasha.

²⁶ Nguno ū malahya akūkwicha ha sīlīlī no, ūkūbiza gītī lūgūkūlū lwa ngatī; lelo ū nkīma nshihani ng'wene nchooji wa būpanga wako gete.

²⁷ Ū munhū adūgije kwahula moto ūgūkīlīja ha matango gūūleka koocha shizwalo shakwe?

²⁸ Nnūūlū ū munhū adūgije kūshimīza ha makala ga moto ūkīja kūpya ū būpandījo bo mhambala jakwe?

²⁹ H'ūmo īkajīlaga nū kūlī munhū wa kūlaala na nke o nzenganwa ng'wiye, ūyo ūgūgima ū mhayo gwenūyo atūgūpūlūgūka ū nsango.

³⁰ A banhū batandalahaga ū munhū ūlū wiba gīkī alye nguno atuubile.

³¹ Alīyo ūlū ūding'wa akūlīpa ng'hangala mpungatī, nūūlū īkang'wigeleelwa kūfunya pyī ī sabo ja mu kaya yakwe.

³² Alīyo būlī ngosha nshihani agehelilwe a masala, ū ng'wīti wa mhayo gwenūyo akikenaagūlaga wei ng'wenekīlī.

³³ Akatūlagwa no na kwibengelejiwa, na a magooke gakwe ga būja na būja;

³⁴ nguno ū wilu būkasaayīchaga no, ū ngosha atī na shigongo ūlū alī ng'wikanza lya kūmala shilī.

³⁵ Atīko kwanukūla shilīpīlo shose shose, nūūlū kūhongwa akūlema h'ūmo jikwīlīle ī sabo.