Sumo 4 - Bibilia Ilagano Lya Kale 2015

A masala galī higūlya ya yose

¹ Baana bane, kigwagi a kalangīle ka ng'wa sīng'we, ng'ūdegeleka mu būkalalwa mupandīke witegeleja.

² Nalīng'winha malange madeekanu, yaya ū kūshilekanīja ī shilagīlo shane.

³ Ū nene aho nataalī nyada ū mu kaya ya ng'wa baba, nataalī nīgīnī, na ng'wana ūmò dūhū ū kūlī mayū,

⁴ ū baba akanilanga ūniwīla gīkī, “Ī mihayo yane ībaladage na ng'holò yako yose; Ī shilagīlo shane ūshidime, ūkūlama.

⁵ Pandīkaga masala, ūbize na būdeeba; ūtizīyība ī mihayo yane, nūūlū ūtizūgalūka wīleke.

⁶ Yaya ū kūgaleka a masala, nago gakūkūlang'hana, gatogagwe nguno gakūkūbalada.

⁷ A masala galī higūlya ya yose, alilūūlū, pandīkaga masala; nūūlū ni kūjimīīja ī shingī pyī, alīyo būpandīkage ū witegeleja.

⁸ A masala gakūjage, gakūkwenhela shingilima; gūmīīlage na būkalalwa, gakūkwingīja ng'wikūjo.

⁹ Gakūkūtūūlīla ihima lya būlenji ū kū ntwe gwako, na gakūkūzwīka ngikili y'ikūjo.”

¹⁰ Ng'wanone degelekaga wīyanukūle Īyo nalīyīhaya, hūna ī myaka ya būlamu wako Īkūbiza mingī.

¹¹ Nalīkūtonga mu nzīla ya masala, na kūkūtonga mu kashimīzīle kagololoku.

¹² Ūkūshimīza na shitilonga sha kūkūchaama ū mu kaīle kako, nūūlū ūpeela ūtipama.

¹³ Īyūmīīlage īyo ūkūtongagwa, yaya ū kwīlekela, ilang'hanage mu welwa ng'holò, nguno ū wenūbo būpanga wako.

¹⁴ Ūtizūtūūla lūpambala lwako mu nzīla ja banhū ba malofu, yaya nūūlū kūshimīzīla mu nzīla ya babūbi.

¹⁵ Yogohage, yaya ū kūbītīla mo, galūkaga wīleke ūje ūko ūjile.

¹⁶ Nguno a benabo batalaalaga kūshisha bīīte yabūbi; īkatalaga ī tūlo kūshisha bagwishe munhū.

¹⁷ Ī shilīwa bakapandīkīlaga mu nzīla ja malofu; ī divai bakang'waga kūlwa wiboneeji wabo.

¹⁸ A kashimīzīle ka batūngīlīja kabange gītī būūpe w'ikīngo lya mu dilū, Īlo līkongejaga kwaaka, kūshisha mu makanza ga līīmi, mu būtang'anhīzu w'isana.

¹⁹ Alīyo ī nzīla ya ba malofu Ībange gītī giiti sha gamha; batīko kūshiitegeleja īsho shikabipamyaga.

²⁰ Ng'wanone, īdīlīlage Īyo nalīyīhaya; ī mihayo yane īdegelekage mu welwa ng'holò.

²¹ Ītizīnga ū kū būtongi wako, Ībaladage ū mu ng'holò yako;

²² nguno īlī būpanga ū kū banhū abo bakīpandīkaga, ū kūlī munhū īlī būzubūku bo mīlī ngima.

²³ Ilang'hanage ī ng'holò yako kūkīla shose, nguno h'ū lūzwīīlo lwa būpanga wako.

²⁴ Wīnjage ū būhūūganu ū mu nomo gwako, a mahoya gabūbi gatizikuumya na nomo gwako.

²⁵ A miso gako gagoloole wīmà a kalolele, ūkalalīle ya kū būtongi dūhū.

²⁶ Lang'hanaga ūmo mhambala jako jikūbītaga, ūsole nzīla jigoloolile.

²⁷ Yaya kūgalūka galūka kūja kū nkono gwa būlyo nūūlū gwa lūmoso, ū lūpambala lwako lūlang'hanage ū kū yabūbi.