Sumo 31 - Bibilia Ilagano Lya Kale 2015

Mihayo ya Ntemi Lemueli

¹ Mihayo ya Ntemi Lemueli; būhangi ūbo akalangwa na nina.

² Ee ng'wana wane! Ee Ng'wana wa nda yane! Bebe Ng'wana wa kūlahīla kwane,

³ Ūtizūmalīla nguzu jako kū bakīma; a benabo bakakenaagūlaga batemi, yaya ū kūlogeja nzīla jako kūbo.

⁴ Ee Lamueli, gūtī gwa batemi ū gwenūyo, ing'wa walwa lītī lya batemi; a basugi batigeleelilwe kwikala bahahaalīlile mapūūya,

⁵ batizūleewa kūshisha kwība Īyo īlagīlilwe mu shilagīlo, nose kwīkenaagūla īyo yigeleelilwe kūbaguna abo balī mu būluhi.

⁶ Ū walwa nekelage ūyo ajile mu kūyagaala, a mapūūya ga banhū abo basheedekejiwe makoye.

⁷ A benabo balekelage bayūng'wa bīība ū būhabī wabo, booya kwikala bakwizūkagwa būsunduhazu wabo.

⁸ Ū nomo gwako ni gūbagunage abo batī na būdūla bo kwigunanha boi benekīlī, a bagayiwa alīyo batadūgije kwilwīlīīla ū mu mihayo īyo Ībigeleelilwe.

⁹ Ūhabūla ū kūyomba, nū būlamuji ūfunya mu būtūngīlīja; balwīlīīlage a bahabī na bagayiwa ū mu mihayo īyo ībigeleelilwe.

Ng'wanisaale ūyo igeleelilwe ikūjo

¹⁰ Nani ūyo adūgije kūpandīka nkīma wa kūtoola w'ikūjo? Ū nkīma wa gīko ū mpango gwakwe ntaale no kūtinda lubi.

¹¹ Ī ng'holò ya ngoshi yīnsanije mu būshikanu bose, nose atīko kūbiza na būgehelwa mu shose shose.

¹² Pyī ī shikū ja būlamu bokwe akang'wītīlaga yawiza ū ngoshi, ndūhū gwabūbi nūūlū gūmò.

¹³ Wa kūyūkooba booya bo ng'holo na būlūba, watūmama na makono gakwe mu būyegi būtaale.

¹⁴ Abange gītī meeli ja basūlūja, Ī shiliwa akenhaga kwīngīīla kūle.

¹⁵ Akipunaga giiti dilū makīngo, wandya kūgolanya shilīwa sha banhū ba mu kaya yakwe; a batūmami bakwe a bakīma wabahelela ī ya kwīta.

¹⁶ Akabonaga ilaale wideedeng'hanya chiza tame, hūna walīgūla kūfuma mu sabo ja kūpandīka bo nguzu jakwe, walīlīma wahamba mo mizabibu.

¹⁷ Ūlū wandya kūtūmama milīmo akilumaga lya sīlīlī atī na lwenya; a makono gakwe galī na nguzu jigi.

¹⁸ Adeebile gīkī ū būsūlūja bokwe būkenhaga solobo, hūna lūūlū ī tala ya ha ng'wakwe Īkakeeyūlaga būjikū tandū īlībaka.

¹⁹ Akadimaga na makono gakwe ikumbò lya kūduutīja būlūba, hūna wayībilimya ī nduutyo kūnū ayūmīīlile.

²⁰ A makono gakwe agagoloolile kūbanukūla a bahabī, a makono gakwe galī ng'waje kūbagunanha a bagayiwa.

²¹ Nūūlū mu makanza ga mbeho Ītanzwanjaga ī kaya yakwe; nguno pye a banhū ba mu kaya yakwe balī na shizwalo shaza sha mu shikū ja mbeho.

²² Ī myenda ya kwamba ha būlīīlī bokwe akabeejaga misoga, ī shizwalo shakwe sha kitaani yawiza Īsangije na būlūba bo nzulunge.

²³ Ū ngoshi akūjiwe no ū mu mabanza ga mu nzengo, ūlū wigashaga hamò na a banamhala a basugi ba sī.

²⁴ Ū nkīma ng'wenūyo akabeejaga shizwalo sha kūjinja sha būlūba wa kitaani, nī mishipi akabajingījaga wei a basūlūja.

²⁵ Ī shizwalo shakwe nguzu n'ikūjo, nī ya shikū ja kū būjiiwa akikalaga ayīlindīīlile mu būyegi.

²⁶ A mahooya gakwe ga masala, ū lūlīmi lwakwe lūkafunyaga malange gigelile kūsanyiwa.

²⁷ Ī myatīla ya ha ng'wakwe ayīdīlīlile chiza no, atalyaga shilīwa sha kwenhelwa igashije dūhū.

²⁸ A baana bakwe bakabūūkaga kūnūmba na kūnombela mbango, nū ngoshi wakwe, nīyo ū ng'wene akankumīlījaga kūnū alīhaya,

²⁹ “A bakīma abo bakīītaga misoga balī bingī, alīyo ū bebe ūbaheebile pye a bose.”

³⁰ Ū būsoga būkalembalembaga, nū wiza shilī shikolo sha kūbīta. Alīyo ū nkīma ūyo ang'ogohile SEEBA shiigelile akumīlījiwe ū ng'wenūyo.

³¹ Ng'winhage ī linong'ho īlo ligeleelilwe būnoge bokwe, nī milīmo yakwe īkumīlījiwe hape kū būtongi wa banhū bose.