Sumo 30 - Bibilia Ilagano Lya Kale 2015

Mihayo ya ng'wa Aguli

¹ Mihayo ya ng'wa Aguli ng'witūnja o ng'wa Yakehi; būhangi. Ū munhū ng'wenūyū akang'wīla Itieli; alichene, Itieli na Ukali.

² “Ū mu banhū bose ū nene natamanile mhayo; ū mu banhū bose pye, natī nabo ū witegeleja ūbo wigeleelilwe kū banhū.

³ Nataalī ū kwilanga a masala, nūūlū ū Ng'wela nataalī ū kūūmana.”

⁴ Nani wabīta kūlinha ng'wigūlū hūna wika hangī? Nani ūyo wabīta kūbilinga nyaga ūgūtūūla mu shiganza sha nkono gwakwe? Nani wabīta kūbunga minzī mu ng'wenda gwakwe? Nani ūyo wajitūūla pyī ī mbīmbī ja sī? Ī lina lyakwe nani, nū ng'wana wakwe nani ī lina? Aliniwīlage ūlū ūmanile!

⁵ Būlī mhayo go ng'wa Mulungu gūtī na shilingo, hū ng'wene alī lūmūda kū banhū abo bakapeelelaga mulī we.

⁶ Yaya ū kongeja shose shose a ha mihayo yakwe, atizūkūhama akooleche gīkī ūlī nomolomo.

⁷ Ee SEEBA, nalīkūlomba mihayo ībīlī, ūtizūnilemeja aho nataalī kūcha.

⁸ Ū būhwahwa nū būlomolomo nīngījage būnisegenele; ūtizūninha būhabī nūūlū būsabi, ninhage shiliwa sha būlī lūshikū dūhū.

⁹ Natizūkūtumbūūkīla nakakūlema nalīhaya, “Nani nang'hwe ū SEEBA?” Nūūlū natizūhabīpa nakandya kwiba, nalyenheleje kūsondagūlwa ī lina lya ng'wa Mulungu wane.

¹⁰ Ū ntūmami yaya kūnsīīga mhayo ntaale wakwe, nguno akūkūzuma ūpandīke makoye mataale.

¹¹ Balīho banhū abo bakabazumaga basaabo, nūūlū kūbalūmba baninaabo yaya;

¹² bangī bakibonaga gīkī balī beela, alīyo batīneejiwa ū būsoso wabo;

¹³ bangī balī na liso lya nyadooshi pyī ī shikū, ba kalolele ka nyadalahi;

¹⁴ bangī a mino gabo gabange gītī machimu mūūgī, a magigo gabo mūūgī gītī shū; ga nīmo gwa kūbalīīla bahabī na a bagayiwa ū mu sī bashile pyī ū mu banhū.

¹⁵ Ū Mbipi alī na bashīke babīlī, bakikalaga būlīla balīhaya, “Ninhage! Ninhage!” Shilīho shinhū shidatū shitafulaga, alichene, shilī shinè īsho shitamanile kūhaya gīkī, “Niigeja!”

¹⁶ Kūlimu, nda ya ngūmba. Sī īyo itafulaga minzī, na moto ūyo gūtahayaga gīkī, “Niigeja lūūlū!”

¹⁷ Ī liso lya munhū wa kūndalaha ise na kūng'wibengeleja nina, līkūsokolwa makūngūūlū mu mahululu, līkūliiwa mabeeshi.

¹⁸ Īlīho mihayo idatū īyo Īkanikamaajaga ū nene, īnè īyo īnitabanije kwīmana.

¹⁹ A kalalīle ka ng'hoonà ng'wigūlya, na a kashoolomele ka nzoka ha shiganga, nū mumo meli īkajīlaga higūlya ya mahuuli ga nyaza īsalile, na nhūngwa ja ngosha na munhya.

²⁰ A kajīle ka nkīma nshihani katikīlile na munhū kūmala kūlya hūna wipyagūla ū kū nomo, hanuma ūhaya, “Ū nene natītile būbi bose bose!”

²¹ Ī sī īkadetemiagwa mihayo idatū, īlī īnè īyo ītadūgije kwīyiyūmīlīgīja.

²² Ū nsese kūbiza ntemi, nū mbūūlī ūlū ūlya wigūta,

²³ nū nkīma ūyo walī atī na wa kūntogwa ūlū ūtolwa; na nkīma nsese ūlū ūmpilūla nina būgonzo.

²⁴ Ū mu sī shilīho shibūmvwa shidoololo shinè, alīyo shilī na masala mingī no.

²⁵ Jilīho soomhi ījo jitī na nguzu, alīyo jikibīīkīlaga shilīwa ū mu makanza ga chū,

²⁶ jilīho na mhīmbī jitī na būdūla būtaale, alīyo jikibeegejaga ū wikalo wajo mu mahalo,

²⁷ na njige najo jitī na ntemi, alīyo ūlū jandya lūgendo jikajīlanījaga mabità mabità.

²⁸ Kalīho ka shigonà ako kadūgije kūding'wa nūūlū mu nkono, alīyo ūkūkasangīla ng'wikūlū lya ntemi.

²⁹ Shilīho shibūmvwa shidatū īsho shilī na kashimīzīle ka nyataale, shinè shilī na kajīle ka lūgiili giili.

³⁰ Īlīho shimba, h'ī ya nguzu mu shiinū jose, ī yoi ītashokaga numa kū būtongi wa shose shose;

³¹ hama īlīho na ng'hungulume, nyigīmba gīmbi; na ngulyati ya mbūli īlīho; alīho na ntemi ūyo akikalaga apīndiwe na bashilikale bakwe.

³² Ūlū wabīta kwīta mihayo ya nyabbūūlī wigūngūhya bebe ng'wenekīlī, nūūlū hamo wabīta kwiganika kūhaya kwīta yabūbi, tūūlaga nkono a ha nomo gwako!

³³ Nguno ūmo mabeelè gakafunījaga magūta ūlū gusegeeswa, nū mumo nindo īkamyolelagwa yazwa mininga, h'ūmo būlī nū būpelanu, nabo ūlū būsooselwa būkenhaga yombo.