Sumo 3 - Bibilia Ilagano Lya Kale 2015

Wiza būngī bo masala

¹ Ng'wanone yaya ū kūgīība a malange gane, alīyo ī shilagīlo shane ūshidime ū mu ng'holò yako.

² Nguno shikūkongegeja myaka mingī ū mu būlamu wako, na shikūkwenhela mhola.

³ Ūtizūlekana nabo ū būtogwa nū būsanyiwa, shitūngage gītī ngufu mu nhingo yako, shandīkage a ha ng'holò yako.

⁴ Ū mu gīko ū kūpandīka wiza na kwīlūkīlwa kūfuma kūlī Mulungu na kū banhū.

⁵ Nsanyage SEEBA na ng'holò yako yose, yaya ū kūsendamīla masala gako ng'wenekīlī.

⁶ Ū mu kashimīzīle kako kose ntongejage we, nang'hwe akūjigoloola ī nzīla jako.

⁷ Lekaga ū kwibona bebe ng'wenekīlī gīkī ūlī na masala no, ng'ogohage SEEBA ūlekane nū būbi.

⁸ Ū gwenūyū gūkūkwenhela mhola ū mu mīlī gwako, na nguzu ū mu maguha gako.

⁹ Nkūjage ū SEEBA mu kūmfunīja sabo jako, na a matwajo ga kwandya ga magesa gako gose.

¹⁰ Hūna a mabīkīlo gako ga shilīwa gakookala gaseesekele, nī shisaabo shako shikookala divai mhya.

¹¹ Ng'wanone, ūtizūbūdalaha ū būhūgūji bo ng'wa SEEBA, nū kūhama kwakwe yaya ū kūkūkolwa;

¹² nguno ū SEEBA akabahūgūlaga abo abatogilwe, gīt'ūmo myaji akang'wītīlaga ng'wana ūyo antogilwe.

¹³ Alī na lubango ū wa kūpandīka masala; ū munhū wa kūkunga witegeleja.

¹⁴ Nguno ī solobo ya masala Īlī nhaale kūtinda hela; nīyo galī na wiza būtaale kūtinda bo zahabu.

¹⁵ A masala galī na mpango ntaale kūtinda lubi; ū mu shose īsho ūlashiikūmve, shitīho sha kūlenganīla nago.

¹⁶ Galī na būlamu būlīhu ū mu nkono gwa būlyo, ū gwa lūmoso gūlī na būsabi n'ikūjo.

¹⁷ Ī nzīla jago jilī nzīla ja kūyeja, nīyo pyī ī nzīla jago jilī ja mhola.

¹⁸ Galī ntī gwa būpanga ū kū bose abo bakūgadima; nīyo balī na lubango pye abo bakūgūmīīla kūlū kūlū.

¹⁹ Ū SEEBA wagūtūūla na masala ū nsingi gwa sī, nī ligūlū ūlyamba mu witegeleja gīt'ūmo līlī.

²⁰ Būjiba wa minzī būkagabanhyiagwa kūlwa būmani bokwe, na a malūnde gakatoonàga lūme.

²¹ Ng'wanone, ū būlamuji bowiza nū witegeleja shilang'hanage, ī mihayo yenīyī ītizīnga ū kū būtongi wako;

²² Īkūbiza būpanga ū kūlī bebe, būlenji wa kūbeeleja nhingo yako.

²³ Hūna ūkūshimīza ūlī mhola, nū lūpambala lwako lūtigumha.

²⁴ Ūlū ūlaala ūtogoha shose shose, ūlū ūlaalile ūkūbiza na tūlo mfuuku.

²⁵ Ūtūlyogoha ī lyogohya lya kwisanganīja, nūūlū būkenaagūji ūbo būkabagwīlaga bahūnga.

²⁶ Nguno ū SEEBA akūkūtimbya ng'holò, hangī akūkūlang'hana ūtizūgwashiwa gūgūlū gwako.

²⁷ Ūlū mhayo gwawiza gūlī mu būdūla wako, ūtizūleka ū kūbīītīla abo bigeleelilwe.

²⁸ Yaya kūng'wīla nzenganwa ng'wiyo gīkī, “Ūkwiza ikanza līngī; nakūkwinha ntondo,” alīyo ūlī nasho ī shikolo.

²⁹ Yaya kūnsīīga yabūbi nzenganwa ng'wiyo ūyo akikalaga hihī nang'ho mu kūkūsanya.

³⁰ Ūtizūyoga na munhū sagala, ūlū atakwītīlile yabūbi.

³¹ Yaya kūng'wikūmvwa munhū ūlū ng'wiboneeji, nī nzīla jakwe ūtizūjilondeela nūūlū hado;

³² nguno ū SEEBA abakolilwe a bahūnga, alīyo a batūngīlīja akabeegelejaga mu mahooya gakwe.

³³ Ī numba ya nkenaagūji īlī ha sīlīlī y'izumo lya ng'wa SEEBA, alīyo ī kaya ya batūngīlīja akayīlūkīlaga mbango.

³⁴ A banhū b'ibengwe abadalahile, alīyo alī na shigongo ū kū bidohya.

³⁵ Ī likūjo hū wingīji kū ba masala, alīyo a babbūūlī akabatūūlaga mu magooke.