Sumo 27 - Bibilia Ilagano Lya Kale 2015

¹ Yaya ū kwikumīlīgīja ya lūshikū lwa ntondo, nguno ūtamanile ū lūshikū lūdūgije kwenha mihayo kī.

² Kumīlījiagwa na munhū ūngī, yaya ū kwikumilīja bebe mu mihayo yako ng'wenekīlī; agwīte munhū ūngī ū gwenūyo, yaya ū nomo gwako ng'wenekīlī.

³ Ī liwe idito, na a maseni gakabunaga; alīyo ū wikomya bo mbūūlī, ū wene būdito no kūgaheeba pye a genayo.

⁴ Ū būpelanu wabūbi no, nū būkalī būkenaagūji wa yose; alīyo nanī adūgije kūwīmīla ū wilu?

⁵ Hambū hambū kahūgūlīle ka hape, kūtinda būtogwa bo mu mbisīla.

⁶ Ū ng'wanishi ni akūbbipage ng'hangala lwīsī lwīsī, alīyo ū nsanyiwa nwani ng'wiyo nūūlū akakūchūūbūla.

⁷ Ū munhū ūlū igūtile nūūlū būūkī akūbūbbyeeda, alīyo ū kūlī munhū atubile nī shilūlū akashibonaga shinonu.

⁸ Ūmo noni īkatalīlaga yaleka chanjo shayo, h'ūmo alī nū munhū wa kūtala wīnga ha kaya ya ng'wawe.

⁹ A maguta nī malashi shikenhaga būyegi mu ng'holò, ū wiza bo munhū kūlī nwani ng'wiye ū wene būkafumaga mu ng'hana ya būganikīji bokwe.

¹⁰ Yaya ū kūlekana nū nwani ng'wiyo nūūlū ū nwani ng'wiye wa so; hama ūlū ūgwīlwa makoye yaya kwihuuta kūlī ng'wanong'wing'we, hambū hambū nzenganwa ūyo alī hihī kūtinda ng'wanong'wing'we ūyo azengile kūle.

¹¹ Bizaga na masala ng'wanone, Īyege ī ng'holò yane, nane napandīke ya kūnshokeja ū wa kūnibengeleja

¹² A bachagūku bakabūloleelaga ū būbi bishīkīja, alīyo abo batūgije bakagiikiibaga bajile dūhū, baakiisagīja mu makoye.

¹³ Ūyo wiyeega ha ng'wanya go munhū atandeebile, solaga ng'wenda gwakwe, ūlū wiyeegaga kūlwa nkīma malahya, gūdimīīlage ībize ng'handīko.

¹⁴ Ū wa kwipuna dilū makīngo kūhamuka n'ilaka lya higūlya alīnombela nzenganwa ng'wiye, akwisaabīlwa gīkī alīnzuma.

¹⁵ Ū nkīma wa halalī kūlī ngoshi atikīlile na kūtoona toona kwa minzī mu lūshikū lwa mbula;

¹⁶ ū kūgema kūnemeja īlī gītī kūhama nyaga, nūūlū gītī kūūmīīla maguta mu nkono.

¹⁷ Ūmo chūma shikanoolelaga chūma shiye, h'ūmo īlī nū kū banhū, būlī ng'wene akannoolaga ng'wiye.

¹⁸ Ūyo akagūlang'hanaga ntiini akūgalya a matwajo gago, nū wa kūūmalada ntaale wakwe akinhagwa ikūjo.

¹⁹ Ūmo minzī gakoolechaga suso ya būshū bo ng'wa munhū, h'ūmo īlī nī ng'holò yakwe, nayo īkoolechaga ūmo alī.

²⁰ Ī kūlimu nū būkenaagūku shitigūtaga, na a miso ga munhū nago gatigūtaga gīko.

²¹ Ū wiza bo feza būkamanīlagwa mu lyabījo isebu, ū bo zahabu ng'wichongo lya moto, alīyo ū munhū ū wiza bokwe būkamanīlagwa mu lūkumo lwakwe.

²² Ū mbūūlī ng'wene nūūlū ūkampūūla ng'witūlī, ūmpūūla na ng'wīsī ūnogolecha gītī mabūbele, alīyo nahene ūtūng'wīngīja ū būchilū bokwe.

²³ Bizaga ng'welwa ng'holò ū kūdeeba ūmo gakūjīlaga a madaale ga ng'holo jako, gadīlīlage chiza a madaale ga mitugo jako.

²⁴ Nguno ī sabo jitī ja kūshinga malalī na malalī, nūūlū ī ngikili ya nyatemi Ītikalaga ho kūlwa shibyalīlwe shose na shose.

²⁵ A maswa ga kūlisha mitugo gakamuulagwa galang'hanwa; gangī gakīnjiagwa mu ngūlū, kūnū a managana galīsonga;

²⁶ ū mu gīko ī ng'holo jako jikūkūpandīkīla shizwalo, ī mbūli najo jikūkwinha sabo ya kūgūla ilaale wigalīhīje.

²⁷ Ūkūpandīka mabeele mingī no ga kūkūgunanha kwīlisha pyī ī kaya yako, nū kūbalang'hana a batūmami bakīma a ba mu kaya yako.