Sumo 25 - Bibilia Ilagano Lya Kale 2015

Sumo jingī ja ng'wa Solomoni

¹ Īji najo sumo jingī ja ng'wa Solomoni, ījo jikandīkwa na banhū ba ng'wa Hezekiya, ntemi wa Yuda, shūsaamiwa kūfuma mu shitabo shingī.

² Ū kūgūleka mhayo mu mbisīla līl'ikūjo lya ng'wa Mulungu; alīyo ū kūgūgīsīlīja ū mhayo līl'ikūjo lya batemi.

³ Ūmo igūlū līlī kūle kwigūlya nī sī īlī na būshimu būtaale; h'ūmo jilī nī ng'holò ja batemi, jitī na būgīsīlīgīje.

⁴ Jīngījagi ū būsoso ī feza, ū nsuji akūbeeja shikolo shawiza;

⁵ ū ntemi ng'wīngījagi a banhū babūbi, ī lisumbī lyakwe līkūpandīka nguzu mu nzīla ya būtūngīlīja.

⁶ Yaya ū kwigūngūhya bebe ng'wenekīlī kū būtongi bo ntemi, nūūlū ūtiziguulanya ng'wigele lya bataale.

⁷ Nguno īlī chiza akūwīle wei ī gīkī, “Linhaga wize kūnū,” kūtinda kwichiwa ha sīlīlī ūng'wīngīle nkūjiwa nebe. Ūlū ūbona mhayo na miso gako,

⁸ yaya ū kwiyangūhīlīja kūgūshisha ng'wibanza; nguno ūkwīta ginehe ū kū ng'halīlo yaho ūlū ūkūgoola nzenganwa ng'wiyo?

⁹ Ūlū ūlī na mhayo hūna wihalalīja na nzenganwa ng'wiyo, yaya ū kūfumbagūla mbisīla ja munhū ūngī;

¹⁰ nguno ū wa kūkwigwa ashikile kūkūgoola lībipe ī lina lyako, hūna ūkwikala gīko ilalī.

¹¹ Ū mhayo ūlū gūhayiwa ng'wikanza lyawiza, gūbange gītī tūgili twa zahabu kūsanjiwa mu būlenji būsoga bo feza.

¹² A kahūgūlīle ka munhū wa masala, kū gūtū ng'wigwi kabange gītī sīīlī ya zahabu ya kū gūtū, nūūlū gītī būlenji bo zahabu niiza.

¹³ Ūmo mbeho y'ilunde īkanonelaga mu makanza ga magesa, nū ntūmījiwa nsanyiwa h'ūmo alī ū kū batūmi bakwe; a bataale bakwe akabinhaga kūpandīka nguzu mhya.

¹⁴ Ūmo gakabizīlaga malunde madūhū na nyaga nkalamuku, h'ūmo alī nū wa kwikumīlīja akūhayaga alī na sha kūbinha banhū, alīyo atī nasho.

¹⁵ Ū ntemi akikūmbīlījiagwa mu wiyūmīlīja nose wazunya; nū lūlīmi ū lūlyehu lūshikile kūbīnza iguha.

¹⁶ Ūlū ūpandīka būūkī ng'waga bo kūkwigela dūhū, ūlū ūbūkīlanīja ūkūlūka.

¹⁷ Shikaga kamò kamò a ha kaya ya nzenganwa ng'wiyo, ūlū ūkīlanīja ūkūnoja akūkolwe.

¹⁸ Ū būbi bo kūfunya būkaanīji mu kūnembekeja mihayo nzenganwa; būbange gītī ng'hoome ya mu būlūgū, nūūlū līlūshū nūūlū isonga lyūgī.

¹⁹ Ū ng'wikanza lya makoye, ū kūnsanya munhū atī nsanyiwa īlī gītī kūkoya na lino līkūfuutīlaga, nūūlū gūgūlū gūbīnzīkile.

²⁰ Ū kūng'wīmbīla mīmbo munhū azwanganile mu ng'holò, ībange gītī munhū kūzuula shizwalo ng'wikanza lya mbeho, nūūlū gītī kwitīīla siki ha nyamvwa.

²¹ Ūlū ng'wanishi wako atuubile ng'winhage shilīwa alye, nūūlū akolilwe notà ng'winhage minzī ang'we.

²² Nguno ū mu kwīta gīko, ūkūbiza ūlīntūūlīla makala ga moto a ha ntwe gwakwe; nang'hwe ū SEEBA akūkwinha mheela.

²³ Ūmo nyaga gwa kūfuma sukuma gūkenhelaga mbula, nū lūlīmi ū lūsong'hanya lūkenhelejaga banhū kwikinīla cheeni kūlwa būpelanu.

²⁴ Hambū hambū kūyikala kū kuluba ya kano wishishinīkaga, kūtinda kwikala mu numba īmò na nke wako ng'halalī.

²⁵ Ī ng'hūlū soga ja kūfuma sī ya kūle, jibangile gītī minzī manedeku kūlī munhū akolilwe notà.

²⁶ Ūmo lūlī lwinzī lūlibangūku, nūūlū lūzwīlo lwa minzī masoso, h'ūmo akabizīlaga nū ntūngīlīja ūlū wizunīlīja na ba nhūngwa ja malofu.

²⁷ Ītī chiza ū kūng'wa būūkī wingī ūkīlanīja, nū mu kwikoobela ikūjo ū munhū atapandīkaga shingilima.

²⁸ Ūmo gūlī nzengo ūyo ndugu jago jikambagūlilwe, h'ūmo alī nū munhū ūyo atī na būdūla bo kwilang'hana wei ng'wenekīlī.