Sumo 23 - Bibilia Ilagano Lya Kale 2015

¹ Ūlū wigasha kūlya hamò na nsugi, kalalagwa ūshiitegeleje īsho shilī ha būtongi wako,

² nīyo ūlū ūgemile na kanyalaku ho, ilemejage gete kūnū witūūlīlaga na lūshū h'imilīlo.

³ Yaya ū kūshimilīla mate ī shizeeze sha ha ng'wakwe, nguno ū mu shilīwa shenīsho gūtīmo gwa ng'hana.

⁴ Yaya ū kwiyeecha kūlwa būchooji bo sabo, zwaga masala ga kwilang'hana.

⁵ Ī sabo ī jene jilī ja kakanza dūhū, ūkūjiilabya jūjimīīla na kūjimīīla; jikazwaga manana jalala jijile kwilunde gītī noni.

⁶ Yaya kūlya shīlīwa sha ha ng'wa munhū ng'huhu, yaya nūūlū kūshimilīla mate Ī shizeeze sha ha ng'wakwe.

⁷ Nguno ū wei alī munhū wa kūyūbala īsho ūlīnjimīīgīja; akūmanūkūwīla, “Lyaga ūng'wa nū kūng'wa,” alīyo ū mu ng'holò yakwe alī kūle no nang'ho.

⁸ Ī shigehu īsho ūlashilye ūkūshilūka, ūbize wajimīīja dalali Ī mihayo yako ya kūlūmba.

⁹ Yaya ū kūyomba na munhū mbūūlī nguno akwīdalaha ī mihayo yako ya masala.

¹⁰ Yaya ū kūsaamya meng'ho ja lūbīmbī jaho na kale, yaya nūūlū kwingīlīīla malaale ga bapīna;

¹¹ nguno ū Nkomoji wabo alī na būdūla būtaale, akwilwisha nang'ho abalwīlīle ū mu mihayo yabo.

¹² Ī ng'holò yako īlogejage kū būlangwa na a matū gako kū mihayo ya būmani.

¹³ Ū ng'wana wako yaya kūleka kūng'hūgūla, atūcha nūūlū ūkantwenya inasu.

¹⁴ Ntwenyage inasu ūbūpīje ū būpanga bokwe ū mu kūcha.

¹⁵ Ng'wanone, ī ng'holò yako ūlū yūpandīka masala, nū nene īkūyega ī ng'holò yane;

¹⁶ ūlū gūyūlūngalūnga mihayo Ītūngīlīgije ū nomo gwako, ū būpanga wane būkūzalabana.

¹⁷ Ī ng'holò yako ūtizīzunīlīja kūbikūmvwa a banhū ba shibi, alīyo bizaga na būkalalwa kūkooba logohano lo SEEBA shikū jose.

¹⁸ Kūlīho kwisagīlwa ū kū shikū ja kū būjiiwa; nīyo ū kwisagīlwa kwako gūtūponyiwa na hado yaya.

¹⁹ Ng'wanone, igwaga, hangī ūbize na masala; nī ng'holò yako wīlang'hane yikale mu kashimīzīle kawiza.

²⁰ Yaya ū kwisanja hamò na bakolwa walwa, nūūlū na balaku kū nyama.

²¹ Nguno a bakolwa walwa na a balaku bakahabīpaga, nī nyatindīzu īkazwīkaga banhū madaaso.

²² Ng'wigwage ū so, ūyo wakūbyala, nū noko yaya ū kūndalaha ūlū ūgigūlūha.

²³ Ī ng'hana īgūlage alīyo ūtizījinja; pandīkaga masala na wilang'hani, hamò na witegeleja.

²⁴ Ū ise o ng'wana ntūngīlīja alī na būyegi būtaale, ū wa kūbyala ng'wana wa masala akanyegelaga no.

²⁵ Ū so nū noko ni bayegage, azalabane ū noko wa kūkūbyala.

²⁶ Ng'wanone, ī ng'holò yako ni īnigalūkīlage nene, na a miso gako gakalalīle mu nzīla jane;

²⁷ nguno ū malahya ng'wene ichongo ishimu, nū nkīma ng'wīmīlīzu abange lwinzī lūpine.

²⁸ Nkūngīji wa bagosha gītī nyoli, hangī akenhelejaga bagosha bingī kwīnga mu kūzunya.

²⁹ Ī gīsī munhū kī ūyo akalīlaga sagala sagala? Nū wa kwikala apīnīhalile nani? Ūyo akikalaga ūyoja banhū nani? Ū wa kwikala ūdaaya nang'hwe nani? Nani ūyo akikalaga na machūbagūkīle ga dalali? Nani ūyo akikalaga na miso gaaza?

³⁰ Ī yenīyo mihayo ya banhū abo bakadīīlaga bakūng'waga walwa, abo bakasīngījaga baaja bakūbonjaga mabbakuli ga walwa wa būlī mbika.

³¹ Yaya ū kūbūkalalīla ū walwa ūlū būswīzilwe būlī ng'wibakuli būkūfunyaga ifulo, nūūlū būkabiza būkikaga chiza chiza ūlū ūlībūmila.

³² Nguno ū kū ng'halīlo yaho būkalumaga gītī nzoka, būlī na būsūngū gītī ng'hoboko.

³³ A miso gako gakūbona migeni, nū mu ng'holò yako īkūyūfuma mo mihayo ya malofu.

³⁴ Ūkūbiza gītī munhū alaalile mu shiseme shilī higūlya ya mahuuli ga nyanza yasalaga, nūūlū shitungilwe kwigūlya ya nongoodi gwa meeli.

³⁵ Ūkūyūhaya, “Balūnītūlaga alīyo ndūhū ū kūniminya! Nūūlū banikunduga naalī natiyigwaga! Ī gete nakūmisha nanali naje nakabūkoobe hangī?”