Sumo 22 - Bibilia Ilagano Lya Kale 2015

¹ Ī lina isoga līlī na mpango ntaale kūtinda sabo h'ūmo jikwīlīle, Ī likūjo līlī lyawiza kūtinda hela nūūlū zahabu.

² Ū nsabi nū ng'habī balī na būsangī mu gīkī, pye a bose ū Meeja wabo SEEBA.

³ Ū nchagūku akabūloleelaga ū būbi wishīkīja, alīyo abo batūgije bakagiikiibaga bajile dūhū, baakiisagīja mu makoye.

⁴ Ū widohya na logohano kūlī SEEBA, shikenhaga būsabi, ikūjo na būpanga.

⁵ Ū mu nzīla ja bahūnga galīmo ming'hwa na mitego, alīyo ū munhū ūyo akilang'hanaga akikalaga kūle nago a genayo.

⁶ Ū ng'wana nangage ī nzīla īyo Īng'wigeleelilwe kwībītīla, atīko kwīyība kūshisha nūūlū kū būnamhala.

⁷ A basabi h'a basugi ba bahabī, nū nandi akagalūkaga wabiza nsese ū kūlī nandwa.

⁸ Ūyo akabībaga būbi akūgesa makoye, nū nang'ha go būpelanu bokwe gūkūkenaagūlwa.

⁹ Ū munhū wa shigongo akīlūkīlagwa mbango, nguno akasangīlaga na bagayiwa Ī shilīwa shakwe.

¹⁰ Ū munhū w'ibengwe ng'wīnjagi Īkūshila ī yombo, pyī nū wilemeelwa nū widūkagūji būkūkalīka.

¹¹ Ū munhū ūyo atogilwe kūbiza na ng'holò neela, na a kalūngalūngīle kakwe kalī ka shigongo, ū ntemi akūbiza nwani ng'wiye.

¹² A miso ga ng'wa SEEBA malang'hani ga būmani, alīyo akīzubangaga ī mihayo ya banhū abo batī na kūzunya.

¹³ Ū ng'winogolelwa akahayaga, “Īlīho shimba a hanze!” Nūūlū gīkī, “Tūkūbūlagīlwa mu mapanda!”

¹⁴ Ū nomo gwa nkīma nshihani gūl'ichongo ishimu, ū wa kūmpelanya SEEBA akūgwīla mo.

¹⁵ Ū mu ng'holò ya nīgīnī būkabizaga būlīmo būchilū, alīyo ī linasu lya būhūgūji līkabūpeejaga bong'wīngīla.

¹⁶ Ūyo akiboneelaga bahabī gīkī iyongegeje būsabi, nū wa kūyūnong'ha basabi, a bose ī ng'halīlo yabo kūhabīpa.

Kahayīle ka banhū ba masala

¹⁷ Tegaga ū gūtū gwako wigwe mihayo ya banhū ba masala; Ī ng'holò yako īlogejage ū kū mihayo ya būmani bone.

¹⁸ Nguno īkūbeelela ūlū wībīka mu ng'holò yako, pyī ī yose ībize mo ū mu nomo gwako īlindile kūtūmamīlwa.

¹⁹ Ū bebe nalīkūlanga ī lelo, ū bebe ng'wenūyū ūntūūlīle SEEBA ū kūsanya kwako.

²⁰ Naakwandīkīlile mihayo makūmi adatū ya kahayīle ka būlī mbika, mihayo ya kahayīle ka kūkūganikīla na kūkwinha būmani;

²¹ kūlwa kūkūlanga mihayo ya ng'hana na ya kūsanyiwa, ūdūle kūyūbinha mashosho mashikaanu a batūmi bako.

²² Alilūūlū, yaya ū kūbiboneela a bahabī kūlwa būhabī wabo, nūūlū a bagayiwa yaya kūbiboneela ū mu mabanza.

²³ Nguno ū SEEBA akūbalwīlīla ū mu mihayo yabo, na a babo bakūbiboneelaga akūbīngīja ū būpanga wabo.

²⁴ Yaya kūnwana na munhū asugilwe būpelanu, nū ng'wangū kūsaaya yaya kūshimīza nang'hwe.

²⁵ Nguno ūdūgije kūjananījiwa mu nzīla jakwe, nang'ho ūgwashiwe mu lūtu.

²⁶ Yaya kwidima nkono na munhū kūng'wilahīlīla, yaya nūūlū kwiyeega kūlwa kūlīpa būgasa;

²⁷ nguno ūlū ūgayiwa sha kūfunya, ūshikile kūtaagījiwa nūūlū būlīīlī wako ūbo ūkalaalīlaga.

²⁸ Yaya kūsaamya meng'ho ja lūbīmbī jaho na kale, ījo jatūūlwa na bataale bako.

²⁹ Ūlū ūmona munhū ngaliili mu katūmamīle kakwe ka milīmo, managa gīkī ū ng'wenūyo ashikile kūtūmamīla na batemi, atī wa kūtūmamīla banhū bado bado.