Sumo 21 - Bibilia Ilagano Lya Kale 2015

Wibīkīja wa banhū babūbi

¹ Ī ng'holò ya ntemi īlī mu nkono go ng'wa SEEBA gītī myongo ya minzī, akīīlogejaga hose hose ūko ūtogelwa wei ng'wenekīlī.

² Pyī ī nzīla ja munhū jitūngīlīgije ū kūlī we ng'wenekīlī, alīyo ū SEEBA akajipimaga ī ng'holò.

³ Ū SEEBA akashanukūlaga ī shītīle Ī shigoloololile na sha būtūngīlīja, kūtinda shitambò.

⁴ A miso ga nyadooshi nī ng'holò ya wikumīlīja, h'ī mihayo īyo ībayegije a babūbi, alīyo shibi ī shenīsho.

⁵ A maganiko ga bagaliili gakabagunanhaga kūpandīka sabo ningī, alīyo ū wiyangūhīlīja būkabyalaga ng'wana mīsī.

⁶ Ī sabo ya kūpandīkwa bo lūlīmi lūlomolomo, ībange gītī ikūngūkū līlībīta, hama gūlī ntego gwa kūbūlaja.

⁷ Ū wibonya wa banhū babūbi būkūbapyagūla bashile ho, nguno balemile ū kwīta īyo Ītūngīlīgije.

⁸ Ī nzīla ya munhū ūyo alī mu kwihīga ītagoloolile; alīyo ū munhū ūyo atī na shilingo, Ī nhūngwa jakwe jitūngīlīgije.

⁹ Hambū hambū kūyikala kū kuluba ya kano wishishinīkaga, kūtinda kwikala mu numba īmò na nke wako ng'halalī.

¹⁰ Ū munhū wa nhūngwa ja malofu akikalaga ahahaalīlile yabūbi, atīko kūnchīla shigongo nūūlū nzenganwa ng'wiye.

¹¹ Ū w'ibengwe ūlū winhwa nsango, a ba lūtūgà bakūpandīka masala, ū munhū wa masala ūlū ūtongwa akadeebaga.

¹² Ū Ntūngīlīja ajibonile dūhū Ī kaya ja bahūnga, nīyo a bahūnga akabakenaagūlaga.

Wibīkīja wa banhū ba masala

¹³ Ū munhū wa kūchibīja matū gakwe atizūbigwa a bahabī ūlū bakūlīlaga, nang'hwe līkūshika ikanza lya kūlīla atizilonga wa kūng'wigwa.

¹⁴ Ī shakwinha sha kūfunyiwa bo mbisīla shikapojaga būpelanu, nū būdaki nūūlū būkabiza būtaale, būkalembeelaga a h'inong'ho lya kūfunyiwa bo swee swee swe.

¹⁵ Ū būtūngīlīja ūlū būtūmama, bakayegaga a batūngīlīja; alīyo a bīīti ba mihayo ya malofu bakagwīlagwa boobà.

¹⁶ Ū munhū wa kūtala wīnga mu nzīla ya witegeleja, akwimanīla alī ng'wibità lya bafu.

¹⁷ Ū munhū ūyo atogilwe kūyeja mīlī akūhabīpa, nū yūyo atogilwe walwa na shizeeze atalaasaba.

¹⁸ A bahūnga bakūbiza shihongeelo kūlwa batūngīlīja, na a babo batatogilwe kūzunya kūlwa ba nhūngwa ngololoku.

¹⁹ Hambū hambū kūja kwikala kū matogolo kūtinda kwikala na nke wako ng'halalī hangī ng'wayī.

²⁰ A banhū ba masala bakibīkījaga ū mu kaya jabo sabo niiza na shizeeze shabūyaga, alīyo ū mbūūlī akagabbulaga wamala pyī īsho akapandīkaga.

²¹ Ūyo akakoobaga būtūngīlīja na kūchīla shigongo, akapandīkaga būpanga na būtūngīlīja hamò n'ikūjo.

²² Ū munhū wa masala akadumīlaga nūūlū nzengo gwa banhū ba nguzu, wakambagūla ng'hambī ja kūpīlīla Ījo bajisanije.

²³ Ūyo agūlang'hanile ū nomo gwakwe nū lūlīmi lwakwe, ilang'hanile atizūgwa mu makoye.

²⁴ Ū munhū ng'wikumīlīja na ng'wibonya, ū ng'wenūyo ī lina lyakwe akitanagwa, “Ng'wibengeleja;” nūwe hangī ndooshi bo soso.

²⁵ Ū ng'winogolelwa akabūlagagwa na kwikūmvwa kwakwe, nguno a makono gakwe galemile ū kūtūmama.

²⁶ Akadīīlaga līīmi tole wikūmbagwa apandīke shose shose, alīyo a batūngīlīja bakinhanaga mu būtūūgugīla.

²⁷ Ī shitambò sha banhū babūbi sha malofu no, Ī no no no ū mfunya washo ūlū alī n'iganiko ibi.

²⁸ Ū nkaanīji nomolomo akūkenaagūka, alīyo ī mihayo ya ng'wigwi īlī ya kūshinga.

²⁹ Ū munhū wabūbi akihaamalajaga ū būshū bokwe, alīyo ū munhū wa nhūngwa jigoloolile, akajiideedeng'hanyaga ī nzīla jakwe.

³⁰ Gūtīho gwa kūnemeela ū SEEBA, gabize masala nūūlū witegeleja, nūūlū kahelele ka maganiko.

³¹ Ī falasa īkagolanyiagwa yagaaliilwa yalindīīla lūshikū lwa būlūgū, alīyo ū būtindi būlī kūlī SEEBA.