Sumo 19 - Bibilia Ilagano Lya Kale 2015

Wiyūmīlīja būlī na solobo

¹ Hambū hambū ū ng'habī ūyo atī na shilingo mu kashimīzīle kakwe, kūtinda mbūūlī ūyo akitagūlaga mihayo yisalīkile.

² Ītī chiza ū munhū ū kwikala atī na witegeleja, nūūlū kwiyangūhīlīja hūna ūhūbīla.

³ Ū munhū akikenaagūjaga būpanga kūlwa būchilū bokwe, alīyo ī ng'holò yakwe yansaayīla SEEBA.

⁴ Ī sabo īkadutaga banwani bingī, alīyo ū ng'habī bakansambaalaga a banwani biye.

⁵ Ū nkaanīji nomolomo atūgūpūlūgūka ū nsango, nū ng'witagūji wa būhwahwa ndūhū ū kūpīla.

⁶ Banhū bingī bakikombaga kū basugi gīkī babayeje, na būlī ng'wene akandimaga būnwani ū munhū wa ng'holò ya winhani.

⁷ Ū ng'habī bakampeelaga pye a badūgūye, a banwani biye a bene bakūmponya kūle no! Akūgema ū kūbakūūbīja kūnū akūbikūmbīlījaga, alīyo atūbilabya nūūlū hado!

⁸ Ū wa kūpandīka masala akūbūtogwa ū būpanga bokwe, ūyo ūbūlang'hana ū witegeleja Īkūmeelela ī mihayo yakwe.

⁹ Ū nkaanīji nomolomo atūgūpūlūgūka ū nsango, nū ng'witagūji wa būhwahwa akūyagaala

¹⁰ A kikalīle ka kūyegela būpanga katang'wigeleelilwe ū mbūūlī, nū gwa nsese kūsuga bataale bakwe mi no.

¹¹ A masala ga munhū gakang'winhaga wiyūmīlīja; nīyo ū kūlekeja būhūbi wa banhū h'ī likūjo lyakwe.

¹² Ū būpelanu bo ntemi būbange gītī kūpogoma kwa shimba, alīyo ū būyegi bokwe būlī gītī lūme lwagwaga ha maswa.

¹³ Ū ng'wana mbūūlī ng'wene iyanga kūlī ise, nū nkīma wa halalī kūlī ngoshi akazwanjaga gītī kūtoona toona kwa minzī gwa gwa gwa būl'ikanza.

¹⁴ Ū wingīji bo manumba na sabo būkafumaga kū babyaji, alīyo ū ngosha akapandīkaga nke ng'witegeleja kūfuma kūlī SEEBA.

¹⁵ Ū boolo būkang'wenhelejaga munhū kūbiza wa tūlo nhaale, hama ū ngaya nīmo akakoyaga na nzala.

¹⁶ Ūyo akigwaga īyo akūtongagwa abūlang'hanile ū būpanga bokwe, alīyo ū wa nhūngwa ja nyadalahi mu shimīzīle yakwe akūyagaala.

¹⁷ Ū ng'wiza ng'holò kū bahabī, akang'winhaga SEEBA alashokejiwe; na ng'hana akwinhwa mheela kūlwa shītīle shakwe.

¹⁸ Ng'hūgūlage ū ng'wana wako aho kūtaalī kūlīho kwisagīlwa, ūtizūngumanīja ūbize nguno ya kūyagaala kwakwe.

¹⁹ Ū munhū mpelanu shiigelile afunye wei ī shilīpīlo sha nsango, ūlū ūlangunanhe akūshokeja, ūkūngunanha hangī.

²⁰ Bizaga ng'wigwi ūlū ūlīhūgūlwa, nī yīyo ūlīlangwa yanukūlage, ūpandīke masala ga ha ntondo.

²¹ Ū munhū akahelaga mihayo mingī ū mu ng'holò yakwe, alīyo īyo īhelilwe na SEEBA h'īyo īkashikīīlaga.

²² Ī ng'hūmbū ja munhū jilī kūchīlwa shigongo; hambū hambū kūbiza ng'habī kūtinda kūbiza nomolomo.

²³ Ū logohano kūlī SEEBA lūkatūngīījaga mu būpanga; hū mhayo ūyo gūkang'winhaga munhū kwikala mu būlembeezu, na kūleka kūkuumiwa mayanga.

²⁴ Ū ng'winogolelwa ashikile kūchima ū nkono gwakwe ū mu shiseme sha shilīwa, alīyo ūlemeelwa ū kūgūbūūcha kūgwenha ū kū nomo!

²⁵ Ntūlage ū munhū w'ibengwe, a ba lūtūgà bakūmana masala; ū munhū ng'witegeleja ng'hūgūlage akwilanga.

²⁶ Ū munhū wa kūng'wītīla yabūbi ise na kūmpeeja nina, ng'wenuyo ng'wene ng'wana w'igisha minala na ng'wenhi wa magooke.

²⁷ Ng'wanone, ūlū ooya kūdegeleka ya kūtongwa, numho wipūūganya nabo ū būmani.

²⁸ Ū nkaanīji ūyo atī na ngofyoolo ndalahi wa būlamuji ūbo būgoloolile, hama ū nomo gwa ng'hūnga nago, ū būbi gūkabūlyaga gītī shilīwa.

²⁹ A badalahi ū nsango gwabo gūlīho gūbalindile, na a babbūūlī balindīīlilwe mbooko.