Sumo 18 - Bibilia Ilagano Lya Kale 2015

¹ Ūyo atatogagwa būnwani mi ng'holò, alemile pye gete a kalamulīle a katengeke.

² Ū mbūūlī atabonaga wiza bose bose ū mu kwīmana ī mihayo, alīyo akayegaga kūmanūfunya maganiko gakwe we dūhū.

³ Ū būbi ūlū wingīla nī libengwe lyashikaga, nū būgay'ikūjo nabo būtalekanaga na magooke.

⁴ Ī mihayo ya nomo gwa munhū Īlī minzī mashimu, alīyo ū lūzwīlo lwa masala lūbange longa lūtakamaga.

⁵ Ītī chiza ū kūbiza na būsolanhya bo kwizunīlīja na munhū ng'hūnga, nūūlū ū ntūngīlīja ītī chiza kūng'wiboneela mu kalamulīle.

⁶ Ū nomo gwa mbūūlī gūkamponyaga mu wilemeelwa, nīyo ū mu nomo gwakwe gūkang'witanīlaga milang'ha.

⁷ Ū mbūūlī akagwishiagwa nomo gwakwe, ū mu nomo gwakwe hū ntego gwa būpanga bokwe.

⁸ Ī mihayo ya nsīīgani minonu gītī nhonge yachaajaga mu būūkī, īkang'wingīlaga ū munhū yanwengeela.

⁹ Ū munhū ngokolo kū milīmo yakwe we, ū ng'wenūyo ng'wiye wa nkenaagūji.

¹⁰ Ī lina lya ng'wa SEEBA hū yene Ī ng'hambī ya kūpīlīla, a batūngīlīja bakapeelaga ng'wenūmo baakapīla.

¹¹ Ī sabo ya basabi h'ī ng'hambī yabo ya kūpīlīla, bakibonaga balī mu ndugu ndīhu Ītī ya kūlinhwa.

¹² Ū munhū ūlū ataalī kūgwīlwa mayanga ī ng'holò yakwe īkikumīlījaga; alīyo ī likūjo līkizaga ha numa ya widohya.

¹³ Ū munhū wa kūshosha aho ataalī nūūlū kūdegeleka, ū wenūbo būchilū, hangī igisha minala ū kūlī we.

¹⁴ Ū moyo gwa munhū gūkangunanhaga kwiyūmīlīja mu būsaatu, alīyo nani adūgije kwiyūmīlīja ū moyo ūlū gūsheedekejiwe?

¹⁵ Ī ng'holò ya ng'witegeleja Īkapandīkaga būmani, na a matū ga munhū wa masala gakabūkoobaga ū būmani.

¹⁶ Ī shakwinha shikanugūlīlaga nyango ū ng'winhi washo, nīyo shikanugūlīlaga nyango gwa kūshika kū būtongi wa bataale.

¹⁷ Ūyo akatongaga kūfunya būsombooji bokwe, akabyagi giti ntūngīlīja, kūshisha ilonge ūngī wa kūngīsīlīja.

¹⁸ Ī mbale īkamalaga halalī, Īkalekanyaga banhū nūūlū balī na wihalalīja būtaale.

¹⁹ Ū ndūgū ūlū ūsaayīchiwa nambu no ū kūgalūchiwa, kūtinda kūdumīla nzengo gūpīndiwe ndugu ya kūgūlang'hana; nū wilemeelwa būbangile gītī mibita ya nzengo īlugalile.

²⁰ Ū munhū akalyaga sha kūfuma mu matwajo ga nomo gwakwe, akigūtaga sha kūfuma mu magesa ga lūlīmi lwakwe.

²¹ Ū lūlīmi lūlī na būdūla bo kwenha icha nūūlū būpanga, abo balūtogilwe bakūlya matwajo gaalo.

²² Ūyo ūpandīka nke wapandīkaga munhū wa mpango ntaale, wīlūkīlagwa wiza kūfuma kūlī SEEBA.

²³ Ū ng'habī akagwaga mu magūlū akwikūmbīlījaga, alīyo ū nsabi akashoshaga n'ilaka lya būkalī.

²⁴ Ū wa kwalīlīja banwani salasamya atadīīlaga ū kūlabūka, alīyo alīho nwani ūyo akadimanaga na munhū kūtinda ndūgū.