Sumo 16 - Bibilia Ilagano Lya Kale 2015

¹ A kahelele ka maganiko kalī mu ng'holò ya ng'wa munhū, alīyo ī ya kūyomba na lūlīmi, īkafumaga kūlī SEEBA.

² Ū munhū pyī ī nzīla jakwe jitī na būbi ū kūlī we ng'wenekīlī, alīyo īyo yibisile mu gatī ū SEEBA ayīmanile ūmo īlī.

³ Ntūūlīlage SEEBA pyī īyo ūkīītaga, hūna ī mihayo yako īyo ūlīyīhela īkūshikīīla.

⁴ Ū SEEBA ayītūūlile pyī ī mihayo kūlenganīla na kahelele kakwe we ng'wenekīlī, na a ba malofu kūlwa lūshikū lwa kūkenaagūlwa.

⁵ Ū SEEBA abakolilwe pye a bikumīlīja mu ng'holò. Shiigelile gūmanīkage hape gīkī, Batūgūpūlūgūka ū nsango.

⁶ Ī shibi shamala kwīnjiwa mu nzīla ya kūchīla shigongo na kūsanya; ū munhū akalekanaga na būbi kūlwa kūng'ongoha SEEBA.

⁷ Ī nzīla jako ūlū jūnyeja ū SEEBA, na a banishi bako akūbīīta bikale nang'ho mu mhola.

⁸ Hambū hamhū kūbiza na shigehu hamò na būtūngīlīja, kūtinda kūshikwīja mu nzīla ja wiboneeji.

⁹ Ū munhū akahelaga mu ng'holò yakwe ī mihayo īyo ayiganikile, alīyo ū SEEBA hū ntongeeji wa kataamīle ka magūlū gakwe.

¹⁰ Ū nomo gwa ntemi gūkayombaga mu būdūla bo kūfuma ng'wigūlū, hūna lūūlū ū nomo gwakwe gūtigeleelilwe kūhūba ū mu kalamulīle.

¹¹ Ī ngelekelo ījo jitūngīlīgije nī gapani ja ng'wa SEEBA; pye a mawe ga kūpimīla būdito agatūūlile ho wei.

¹² Mhayo gwa malofu no a batemi ū kwīta yabūbi, nguno ī lisumbī lya būtemi shiigelile lyīmīīle mu nzīla ya būtūngīlīja.

¹³ A batemi ībayegije ī milomo ya batūngīlīja, na bankūngije ū munhū ūyo akahayaga ya ng'hana.

¹⁴ Ū būpelanu wa ntemi būbange gītī ntūmījiwa abūūkije lūfu, alīyo ū munhū wa masala akūbūpoja.

¹⁵ Ū mu kūūzalabana kwa būshū bo ntemi būlīho būpanga, ū būyegi bokwe būbange gītī ilunde lya mbula ya mu mīsa.

¹⁶ Īlī chiza no ū kūpandīka masala kūtinda zahabu, hama īlī hambū hambū kūpandīka witegeleja kūtinda hela.

¹⁷ Ī likūūwa lya ng'hana kūlwa batūngīlīja līlī kūlekana na būbi, ūyo akilang'hanaga mu shimīzīle yakwe alang'hanile būpanga bokwe.

¹⁸ Wikumīlīja būkandyaga kūsuga hūna wingīla būkenaagūji, nū kūgwa gūkalondeelaga moyo gwa kwigūngūhya.

¹⁹ Hambū hambū kūbiza ng'widohya mu moyo na kūbiza hamò na baluhiwa, kūtinda kūbiza na bikumīlīja mukūgabanhaga sha mu wiboneeji.

²⁰ Ūyo wīdīlīla īyo akūtongagwa Ī mihayo īkūmeelela, ū wa kūnsanya SEEBA alī na mbango.

²¹ A banhū ba ng'holò ja masala bakahayiagwa badeeba a benabo, hama ī mihayo ya kūyeja Īkagītaga kūnona a malange.

²² Ū witegeleja wene lūzwilo lwa būpanga ū kū banhū abo balī nabo, alīyo ū būchilū būkabenhelaga nsango a babbūūlī.

²³ Ī ng'holò ya munhū wa masala Īkagūlangaga ū nomo gwakwe ī ya kūyomba; ū nomo gwakwe gwayūbeeja akalangīle.

²⁴ Ī mihayo ya kūyeja ībange gītī ilela lya būūkī; īkatūūlaga būnonu ū mu būpanga, na a maguha gakapīlaga.

²⁵ Īlīho nzīla īyo munhū ashikile kwībona gīkī ītūngīlīgije, alīyo gashinaga ū kū ng'halīlo Ījile mu kūcha.

²⁶ Ū ntūmami akatūmamiagwa nda yakwe, kūnū ū lūtuubo lwakwe lūkūnkomigaga.

²⁷ Ū munhū ng'haali akadosaga yabūbi, na a kalūngalūngīle kakwe kakabbiishaga gītī moto.

²⁸ Ū munhū wabūbi akasooselaga wilemeelwa, ū nsīīgani nkenaagūji wa būnwani.

²⁹ Ū ng'wibonya akankonga kongaga nzenganwa ng'wiye, hūna wantongeela mu nzīla ītī yawiza.

³⁰ Ūyo akalolaga banhū kūnū ūbakandīla liso, alī na nje gwabūbi ū ng'wenūyo, nū wa kūyūbamyolela nomo nang'hwe alī n'iganiko ibi.

³¹ Ī nzwīlī jape kū ntwe yene ngikili y'ikūjo, jikapandīkagwa mu nzīla ya būtūngīlīja mu kikalīle.

³² Ū munhū ng'wiyūmīlīja wawiza kūtinda ngosha wa makaya, nū yūyo adūgije kūbūhangīja būpelanu bokwe, antindile ūyo alī na būdūla bo kūheeba nūūlū nzengo ngima.

³³ Ī mbale īkatūlījiagwa na banhū, alīyo a kalamulīle kaayo pye a kose kafumile kūlī SEEBA.