Sumo 15 - Bibilia Ilagano Lya Kale 2015

¹ Ī lishosho ilyehu līkahangījaga būdaki, alīyo ū mhayo nkalahu gūkasooselaga būpelanu.

² Ū lūlīmi lwa banhū ba masala lūkizunīlījaga nū būmani, alīyo ū nomo gwa mbbūūlī gūkafuupagūlaga būchilū.

³ A miso ga ng'wa SEEBA galī hose pye, gabalolile a babūbi na a bawiza.

⁴ Ū lūlīmī ūlo lūkatūūlaga mhola lūlī ntī gwa būpanga, alīyo ūlo lūkafunyaga mihayo mibi, lūkalabūlaga moyo.

⁵ Ū munhū mbūūlī akadalahaga kahūgūlīle ka ng'wa ise, alīyo ūyo azunije kūhang'wa akoolechaga witegeleja.

⁶ Ī kaya ya ntūngīlīja īlī na wībīkīja wa sabo ningī, alīyo īsho bakapandīkaga bahūnga shikabenhelaga makoye.

⁷ Ū nomo gwa munhū wa masala gūkasambaajaga witegeleja, alīyo ī ng'holò ja babbūūlī jitūgūdūla ū gwenūyo nūūlū hado.

⁸ Ū SEEBA atashitogagwa ī shitambò sha banhū ba malofu, alīyo ū kūlomba kwa ntūgīlīja kūnyegije.

⁹ Ū SEEBA ajikolilwe ī nzīla ja banhū babūbi, alīyo abatogilwe abo bakabūkoobaga ū būtūngīlīja.

¹⁰ Ū wa kūtala mu nzīla akūgwīlwa nsango ntaale; ūyo atatogilwe kūhang'wa akūyagaala.

¹¹ Ū Kūlimu nū Būkenaagūku shilī ng'waje ū kū būtongi bo ng'wa SEEBA, sumvwa na ng'holò ja banhū!

¹² Ū w'ibengwe abbyedile ū kūhūgūlwa, na a ba masala atūbabūūja mhayo.

¹³ Ī ng'holò nyegu īkazalabanyaga ihanga lya munhū, alīyo ī ng'holò ūlū yūpīnīhala gūkalabūkaga ū moyo.

¹⁴ Ī ng'holò nitegeleja īkakoobaga būmani, alīyo ū nomo gwa mbūūlī gūkaalīlījaga būchilū.

¹⁵ Ū nuhi alī na makoye ū mu shikū ja būlamu bokwe pyī ī jose, alīyo ī ng'holò nyegu īkabūlūmbaga ū būpanga pyī ī shikū.

¹⁶ Hambū hamhū kūbiza na sabo ngehu hamò na logohano kūlī SEEBA, kūtinda sabo ningī hamò na makoye.

¹⁷ Hambū hamhū kūlya būgalī bo makūbī mu kaya ya būtogwa, kūtinda kūlya shizeeze sha nyama mu kaya ītī na būtogwa.

¹⁸ Ū munhū mpelanu akasooselaga wilemeelwa, alīyo ū ng'wiyūmīlīja akapojaga wilemeelwa.

¹⁹ Ī nzīla ya ng'winogolelwa Īkikalaga īkobeelilwe masanzu; alīyo ī nzīla ya ntūngīlīja, Ī yene ikūūwa igalī.

²⁰ Ū ng'wana wa masala akanyejaga ise, alīyo ū wa kūng'wibengeleja nina ng'wene mbūūlī.

²¹ Ū munhū ūyo agehelilwe witegeleja ayegelile būchilū, alīyo ūyo alī na būdeeba akikalaga mu nzīla īgoloolile.

²² A kahelele ka mihayo kakabipaga kūlwa kūgaya būyangūji, alīyo ūlū balīho baganikīji Īkagololokaga.

²³ Ū munhū akayegaga ūlū ūfunya ishosho ligeleelilwe, gūkabeelelaga no ūlū gūhayiwa ng'wikanza lyago.

²⁴ Ū kūlī wa masala ī nzīla ya būpanga īlongolile kūj'igūlya, yīngunanhe kwīnga ng'wichongo lya lūfu

²⁵ Ū SEEBA akajikambagūlaga ī numba ja bikumīlīja, alīyo akajilang'hanaga ī mbīmbī ja bachīlwa.

²⁶ Ū SEEBA agakolilwe a maganiko ga banhū ba malofu, alīyo a ga beela ganyegije.

²⁷ Ū munhū o kwikala ahahaalīlile sabo, Ī kaya yakwe akītūūlaga mu makoye, alīyo ūyo atatogagwa kūhongwa akūlama.

²⁸ Ū ntūngīlīja akīyideedeng'hanyaga tame mu ng'holò īyo alīhaya kūshosha, alīyo ū nomo go ng'hūganu gūkapumunhaga sagala ī mihayo.

²⁹ Ū SEEBA akikalaga kūle nabo a bahūnga, alīyo akigwaga ū kūlomba kwa batūngīlīja.

³⁰ Ū būshū būzalabanu būkayejaga ng'holò, nī mhola soga jikenhaga nguzu mu maguha.

³¹ Ūyo akigwaga kahamīle kapanga akwikala hamò na banhū ba masala.

³² Ūyo alemile kūhūgūlwa idalahile ng'wenekīlī ū ng'wenūyo, alīyo ūyo akigwaga ūlū wahang'wa akapandīkaga witegeleja.

³³ Ū logohano kūlī SEEBA lūkaanangaga masala ū munhū, hama ī likūjo līkizaga ha numa ya widohya.