Biblia Todo Logo
Bìoball air-loidhne

- Sanasan -

Sumo 14 - Bibilia Ilagano Lya Kale 2015

1 Ū nkīma wa masala akībeejaga ī kaya yakwe, ū mbūūlī akīkambagūlaga ī yakwe na makono gakwe ng'wenekīlī.

2 Ū munhū wa shīmīle shigoloolile alī na logohano kūlī SEEBA, alīyo ū wa nzīla jichaama chaamile andalahile ū SEEBA.

3 A kalūnga lūngīle ka mbūūlī kakang'wenhelaga nang'ha gwa kūndīīmūla ha ngongo, alīyo a ba masala bakalang'hanagwa nomo gwabo.

4 Aho jitīho ng'ombe, ū lūbīgīlī lwape, alīyo ī nguzu ja nzīkū jikenhaga būponi būtaale.

5 Ū mbonà wa ng'hana ataloma lomaga, alīyo ū nkaanīji ng'hwahwa akabībaga būmaama.

6 Ū munhū w'ibengwe nang'hwe akakoobaga kūbiza na masala, alīyo atagapandīkaga; lelo ū būmani shinogu no ū kwiza ū kūlī ng'witegeleja.

7 Ū mbūūlī lekanaga nang'hwe, nguno ūtīko kūmana mhayo ū mu yose īyo īkafumaga mu nomo gwakwe.

8 A masala ga bitegeleja gakabagunanhaga kūjideedeng'hanya ī nzīla jabo, alīyo ū būchilū wa babbūūlī būlī ha kwilembagūla.

9 A bachilū bakashiibengelejaga Ī shibi, alīyo a batūngīlīja bakachīlagwa shigongo.

10 Būlī ng'holò īmanile kūsaatwa kwayo, na atīho ūyo adūgije kūsangīla nayo ū mu būyegi wayo.

11 Ī numba ya munhū wa malofu Īkūkenaagūlwa, alīyo ī kaya ya ntūngīlīja Īkongeja kwīlūkīlwa yawiza.

12 Īlīho nzīla īyo munhū ashikile kwībona gīkī ītūngīlīgije, alīyo gashinaga ū kū ng'halīlo Ījile mu kūcha.

13 Ī ng'holò īkapīnīhalaga nūūlū ng'wikanza lya seko, nū būyegi būshikile kūkalīkīla mu būpīna.

14 Ū wa kūshoka numa mu ng'holò, akapandīkaga mheela kūlenganīla na shimīzīle yakwe; nū ntūngīlīja alī na mheela ū mu shimīzīle yakwe.

15 Ū munhū atūgije akazunyaga būlī mhayo, alīyo ū wa masala akajiideedeng'hanyaga chiza ī nzīla jakwe.

16 Ū munhū wa masala alī na logohano kūlī SEEBA, na akīngaga ū mu shibi; alīyo ū mbūūlī ng'wiyangūhīlīja hangī atadīlīlaga.

17 Ū munhū ng'wangū kūpelana akīītaga mihayo ya nyachilū, nū yūyo amanīīlile kūkelela biye bankolilwe a banhū.

18 A ba lūtūgà ū wingīji wabo būlī būchilū, alīyo a ba masala bakazwīkagwa ngikili ya būmani.

19 A banhū babūbi bakūgwa mu magūlū kū būtongi wa bawiza, na a ba malofu a ha mibita ya batūngīlīja.

20 A bahabī bakikangīīlagwa nūūlū na bazenganwa bichabo, alīyo a basabi balī na banwani bichabo bingī.

21 Ūyo akandalahaga nzenganwa ng'wiye akīītaga shibi, alīyo alī na lubango ūyo akachīlaga shigongo bagayiwa.

22 Angū, abo bakahelaga mihayo yabūbi batafumīlaga hanze? Alīyo abo bakahelaga yawiza bakanukūlagwa mu būtogwa na kūsanyiwa.

23 Būlī nīmo ndito gūkenhaga solobo, alīyo ū būlomi bo mamihayo dūhū būkatwalīīlaga mu būhabī.

24 Ī sabo h'ī shingilima ya banhū ba masala, alīyo ū būchilū wa babbūūlī būkatwajaga būchilū.

25 Ū nkaanīji wa kwīmīīla ha ng'hana akapījaga būpanga; alīyo ū nkaanīji nomolomo ng'wene mībi wa būhwahwa.

26 Ūyo alī na logohano kūlī SEEBA alī n'ipīlīlo lya ng'hana, nū kū baana bakwe līkūbiza ibūngīlo.

27 Ū logohano kūlī SEEBA lūlī lūzwīlo lwa būpanga, kūlwa kūng'hangīja munhū atizūgwa mu lūtu lwa kūmūlaga.

28 Ī likūjo lya ntemi asuge banhū bingī; alīyo ūlū batīho a banhū, ū nsugi atī na gwakwe.

29 Ū munhū ng'wiyūmīlīja alī na witegeleja būtaale, alīyo ū ng'wangū kūpelana, akoolechaga būchilū bokwe.

30 Ī ng'holò ūlū yūlembeela Īkagwinhaga būpanga ū mīlī, alīyo ū wilu būkabojaga a maguha.

31 Ūyo akiboneelaga bahabī akoolechaga ibengwe ū kūlī Nsūmbi wabo; alīyo ūyo akabachīlaga shigongo bagayiwa, ankūgije ū Mulungu.

32 A ba nhūngwa jabūbi bakagwaga mu mayanga kūlwa būbi wabo, alīyo a batūngīlīja balī na būpīlīlo ū ng'wikanza lya kūcha.

33 A masala gakikalaga mu ng'holò ya munhū ng'witegeleja, alīyo nū kū babbūūlī gakiyoolechaga bagamane.

34 Ū būtūngīlīja būkagūngūhyaga ihanga, alīyo ī shibi shikenhaga magooke kū banhū bose bose.

35 Ū ntemi akayejiagwa na ntūmami wa masala, alīyo ū ntūmami wa nhūngwa ja magooke akabūbbehaga ū būdaki bokwe.

Sukuma Bible © Bible Society of Tanzania, 2019.

Bible Society of Tanzania
Lean sinn:



Sanasan