Sumo 13 - Bibilia Ilagano Lya Kale 2015

¹ Ū ng'wana wa masala akigwaga būlangi bo ng'wa īse, alīyo ū ndalahi atadīlīlaga būhūgūji.

² Ū munhū akashilūmbaga ī shawiza kūfuma mu kalūngalūngīle kakwe; alīyo a bahūnga ī ng'hūmbū jabo jilī ha wiboneeji.

³ Ūyo ilang'hanile ū nomo gwakwe akapījaga būpanga bokwe, alīyo ū wa kwiyangūhīlīja kūyomba, akiyenhelaga makoye.

⁴ Ū ng'winogolelwa akikūmbagwa alīyo atapandīkaga, alīyo ū nkamu kū milīmo Ī ng'hūmbū jakwe jikashikīīlaga.

⁵ A batūngīlīja babūkolilwe ū būlomolomo, alīyo a bahūnga bakenhaga ya minala n'iponda soni.

⁶ Ū būtūngīlīja būkanang'hanaga ū wa nhūngwa jigoloolile, alīyo ū būbi būkangwishaga ū munhū wa shibi.

⁷ Munhū ashikile kwigīmba gīkī nsabi, alīyo gashi atī na shose shose; hama alīho ūngī wa kūbiza gītī atī nsabi, alīyo hū nsabi kalalamba.

⁸ Ū nsabi akapījiagwa sabo yakwe, alīyo ū ng'habī atī na sha kūng'wīta ogohe.

⁹ Ī lisana lya ntūngīlīja līkongejaga kūng'weka, alīyo ī tala ya nkenaagūji Īkajimiagwa.

¹⁰ Ū wikumīlīja būkabyalaga yombo, alīyo a masala galī mu banhū abo bakazunyaga kūganikīlwa.

¹¹ Ī sabo ya būnyeecha Ītadīīlaga ū kūkamīīla, alīyo ū wa kūbilinga ī hela hado hado, akajikwījaga nose.

¹² Ū kwisagījiwa ūlū kūdīīla kūshikīīla Īkasaataga ī ng'holò, alīyo ū kūshikīlīgījiwa ng'hūmbū ū gwene ntī gwa būpanga.

¹³ Ū wa kūdalaha kūtongwa akūbiza n'igasa wei ng'wenekīlī, alīyo ūyo ūshidīlīla shilagīlo akūpandīka mheela niiza.

¹⁴ A malange ga banhū ba masala lūlī lūzwīlo lwa būpanga, kūlwa kūngalūcha munhū atizūgwa mu lūtu lwa kūmūlaga.

¹⁵ Ū kwitegeleja chiza kūkinhaga kūyegelwa na banhū, alīyo ī nzīla ya bagomi ndaamu no.

¹⁶ Būlī ng'witegeleja akatūmamaga na masala, alīyo ū mbūūlī akaboolechaga hape ū būchilū bokwe.

¹⁷ Ū ntūmījiwa ū ng'hūnga akagwaga mu makoye, alīyo ū nsanyiwa ūlū ūlagījiwa akatūūlaga ho mhola.

¹⁸ Ūyo ūdalaha būhūgūlwa akahabīpaga na kūgwa mu magooke, alīyo ūyo akazunyaga kūhang'wa, akagūngūhiagwa.

¹⁹ Ū gwa kūshikīlījiwa īsho munhū ashiikūmbilwe, gūlī nonu ū mu ng'holò; alīyo a babbūūlī batatogagwa ū kūlekana nī yabūbi.

²⁰ Ūyo akayeelaga na banhū ba masala akapandīkaga masala; alīyo ū nwani ng'wiye wa babbūūlī alī mu makoye ū ng'wenūyo.

²¹ Mihayo mibi īkabalondeelaga a ba shibi, alīyo ī mheela ya batūngīlīja Īlī kwīlūkīlwa mbango.

²² Ū munhū wawiza akalekaga wingīji kūlwa shibyalīlwe sha baana bakwe, alīyo ū munhū wa shibi ī sabo yakwe akībilingaga yaaja na batūngīlīja.

²³ Ū ngūnda gwa ng'habī gūshikile kūponeka shilīwa shingī, alīyo akūtaagījiwa dūhū kūlwa wiboneeji.

²⁴ Ūyo atadimaga inasu atantogilwe ū ng'wanokwe, alīyo ūyo antogilwe akang'hūgūlaga na būkomeezu.

²⁵ A batūngīlīja bakalyaga gīt'ūmo ng'holò jabo jitogelilwe, alīyo ī nda ya nkenaagūji Īkadīīlaga nzala.