Lyīmbo lya ng'wa Solomoni 5 - Bibilia Ilagano Lya Kale 2015

Ngosha

¹ Bebe nke wane, naashikile ū mu ngūnda gwane ng'wanong'wise; nī ngazu naabingile, pyī nī shisanjo shane. Na a malela gane naagaliile, nūbūng'wa nū būūkī, nī divai yane nīng'wa, pye na a mabeelè. Bing'we banwani bichane, lyagi; batogwa, ng'wagi ūmo mutogelilwe.

Nkīma

² Ū nene nakasangwa naalaala, alīyo ī ng'holò yalī nzūgūlū matū. Kwimanīla nigwa ū Ntogwa wane watūla hoodi ha nyango. Ūhaya, “Ng'hūūlū yane, bebe ūyo ūtī na shisembo, nilugūlīlage Ntogwa wane. Ng'wanong'wise, ū ntwe gwane gwanaganyiagwa lūme, ī nzwīlī jane jadotaga minzi g'iswaalala lya būjikū.”

³ Hama īkī namalaga kwikūngagūla Ī shizwalo, nazwalīle hangī? Nī mhambala jane nasosohale hangī alīyo namalaga kūjooja?

⁴ Hūna ū Ntogwa wane ūgaganīja kūsheepya nkono h'ipūndū lyalī a ha nyango; yūnsaatwa no ī ng'holò yane.

⁵ Nūbūūka gīkī nanugūlīle ū Ntogwa wane, kūnū gakūtoonaga ngazu a makono gane; ī nzwaala jane jūlīlobya lūyīlo lwa ngazu ī lilugalīlo lya nyango.

⁶ Nūlugūla gīkī ingīle ū Ntogwa wane, alīyo nūsanga atīho, wamalaga kūja! Aho nasanga wajaga yūchongomeela Ī ng'holò yane. Nūfuma nalilalangīja nakūnkoobaga, alīyo natampandīkile; nūgema nū kūng'hīlīka, nahene atiidīkile.

⁷ Balang'hani ba mu nzego baabītaga būlī kwene ū mu būlang'hani wabo; aho banibona būnitūla būnichūbagūla; a balang'hani ba ndugu benabo būnizuuja nī shizwalo shane.

⁸ Bing'we bashīke ba Yelusalemu, nalīng'wilahīja ī ya kūng'wīla ū Ntogwa wane ūlū ng'ūmpandīka. Ng'wīlagi gīkī ū nene ū kūūnū bonilabūlile ū būtogwa.

Banwani

⁹ Bebe nkīma nsoga kūtinda bakīma bose, Ī gete ū Ntogwa wako ng'wenūyo abalebije kī a bangī nose ūlītwilahīja gīko?

Nkīma

¹⁰ Ū Ntogwa wane ng'wiseku, nū mīlī gwakwe ngīlīng'hanu; ū wei nūūlū akabiza ng'wibità lya banhū shihūmbī ikūmi akūmanīka dūhū.

¹¹ Ū ntwe gwakwe gūbange zahabu Ī niiza kūheeba; ī nzwīlī jakwe ndīhu japi jigi, gītī nzooya ja ng'hūngūūlū.

¹² A miso gakwe gabange gītī ng'hūūlū joogaga mu mabeelè, hūna jihela chiza chiza ha ngegu ja myongo ya minzī gakūselaga.

¹³ A matama gakwe gabange ngūnda gwa mitī ya shisuumo sha shisanjo sha ng'waso gwawiza, Ū nomo gwakwe gūbange bonji būkūtoonaga būnasa bo ngazu.

¹⁴ A makono gakwe gabange zahabu jisulilwe gītī myīsī ya malīngīīla, hūna gūūtonwa mo mawe ga kilisolito. Ū mīlī gwakwe ntelezu gītī ipembe lya mhūlī līguusilwe mu būgaliili lyūsheeka, hūna lyūtūūlīlwa būlenji bo mawe ga safilo.

¹⁵ Ī milūndī yakwe ībange gītī ng'hīngī ja mawe ga alabasto jikīndīkile ha madaamījo ga zahabu niiza no no no; ī lihanga lyakwe isoga no, gītī kūbeelela kwa Lebanoni kūlwa wiza bo mibanga yamo.

¹⁶ Ū nomo gwakwe gūkitaga mihayo minonu no. Ū būgima wa yose ū wei ng'wiza no. Bīng'we bashīke ba Yelusalemu, ū ng'wenūyū h'ū Ntogwa wane; hū ng'wene ū nwani ng'wichane.