Lyīmbo lya ng'wa Solomoni 3 - Bibilia Ilagano Lya Kale 2015

¹ Pyī ū būjikū aho nalaalile naabbaabbasha no a ha būlīīlī bone nakūnkoobaga ū ntogwa wane, nankooba no na kakoobele kose, alīyo natampandīkile.

² Ī gete nabūūke naje ū mu zengo nakankoobe ū ntogwa wane; naje nakwilalangījaga py'a hose ū mu mayīla nū mu magūlilū. Ng'hana nūja nakūnkoobaga, alīyo natampandīkile.

³ Balang'hani ba mu nzego baabītaga būlī kwene ū mu būlang'hani wabo; nibona nabo nūbabūūja, “Bing'we bababa, hamo ng'wamonaga ū ntogwa wane?”

⁴ Aho naabakīlanhya ho hado nahayimanīla namona ū ntogwa wane. Nūndima, nūng'ūmīīla, natanekelile hangī aje; niza nang'hwe mu numba ya ng'wa mayū, tūūshika twingīla tūlī dege ū mu chumba sha myaji wane.

⁵ Bing'we bashīke ba Yelusalemu, leki nang'wilahīje bo kūjihaya laala na saala ja mu mbūga; ū būtogwa yaya ū kūbūsaja, nūūlū kūbūkomya, kūshisha būmishe boi wenekīlī.

Banwani

⁶ Nani ūyo aliza kūfuma kū mabbaala ng'wenūyo, ūyo alī gītī ng'hīngī ya lyochi, kūnū akūnung'haga ng'waso ng'wiza gwa ngazu na būbbani, na gwa būlī shikolo sha ng'waso gwawiza īsho shikajinjiagwa na basūlūja?

⁷ Alilolagi! Igogoteni lya ng'wa Solomoni, līliza līpīndiwe bagosha ba nguzu makūmi atandatū; bagosha ba mbagashūūla ba mu Isilaeli.

⁸ Pye a bose balī na shū mu shilaalo, bose pye bamani ba mihayo ya būlūgū; būlī ng'wene anungelegije lūshū lwakwe h'itango, bamalīīlile kūmanhya nī yīyo īlilonge makanza ga būjikū.

⁹ Ū ntemi Solomoni wibeegeja wei Ī ligogoteni lyenīlo, ūlībeeja lya mitī ya kūfuma Lebanoni.

¹⁰ Ī ng'hīngī jalyo ūjibeeja ja feza, Ī lyoi lyenekīlī lya zahabu; ī lisumbī lyalyo līlī na langi ya nzulunge, ū mu gatī bashīke ba Yelusalemu baalībeeja na būgaliili būtaale kūlwa būtogwa wabo.

¹¹ Bing'we bashīke ba Sayuni, fumagi munole ū ntemi Solomoni wazwalīlaga ngikili īyo akazwalīkījiwa na nina mu lūshikū lwa kūtoola kwakwe, lwise lwene ī ng'holò yakwe yalī mu būyegi būtaale.