Lyīmbo lya ng'wa Solomoni 2 - Bibilia Ilagano Lya Kale 2015

Nkīma

¹ Ū nene nalī bonji bo kūfuma Shaloni, nalī būlabo wa mu malago.

Ngosha

² Ūmo būlabo būkabizīlaga ūlū būlī mu ming'hwa, h'ūmo alī nū ntogwa wane ūlū alī ng'wigele lya banhya bangī.

Nkīma

³ Ūmo gūkabizīlaga ntī gwa shisuumo ha gatī ya mītī ya ng'wipoolu, h'ūmo alī nū Ntogwa wane ū ng'wibità lya basūmba. Nakayegaga no ū kwigasha mu mbeho yakwe, ūlū nashiloja ī shisuumo shakwe shikanonaga no.

⁴ Waningīgije mu numba ya kūlīīla shizeeze, ū būtogwa wakwe hū lūbembeela lwakwe ūlo lūkūbbepeelaga higūlya yane.

⁵ Ninhagi mizabibu nalye napandīke nguzu, ninhagi shisuumo shinonu nalye nazalabane, nguno nose ū būtogwa būlīhaya kūnigumīla.

⁶ Ū nkono gwakwe gwa lūmoso gūlī ha sīlīlī ya ntwe gwane, hūna ū gwa būlyo gūūnikumbatīla.

⁷ Bing'we bashīke ba Yelusalemu, leki nang'wilahīje bo kūjihaya laala na saala ja mu mbūga; ū būtogwa yaya ū kūbūsaja, nūūlū kūbūkomya, kūshisha būmishe boi wenekīlī.

⁸ Bing'we alidegelekagi! Ntogwa wane! Mulībona! Ūūyo washika alīsadagūka na kwikīndīka ngūlū nhaale na ndo.

⁹ Ū Ntogwa wane abange gītī laala nūūlū ngulyati ya ngūlūgūlū. Alilolagi! Ūūyo alī ha mpīndo ya ndugu yise, wīmīīlaga alīsūūlīla mu madilisha, alīkengeela mu ng'hengeleji ja mbawa.

¹⁰ Ū Ntogwa wane akaniyombya ūhaya, “Bebe ntogwa wane būkaga, ng'wiza wane, tūjage.

¹¹ Ūlībona gīkī ī likanza lya mbeho ya mu shiyaga lyamalile kūbīta, nī shidiku shabītile shūja.

¹² Ī haha a matogolo gookalile bonji, tūlī ng'wikanza lya kūbina mbina, malaka ga ng'hūūlū jikūdaayaga mu matogolo galigwiwa būlī kwene ū mu sī yise.

¹³ Ū ntiini gwandije kūtwaja shisuumo sha wandījo, nū ng'waso gwa būlabo wa mizabibu gwasambaalile hose hose. Bebe ntogwa wane būkaga, ng'wiza wane, tūjage.”

Ngosha

¹⁴ Ee bebe ng'hūūlū yane ūyo wibisile mu mahalo g'iwe, mu shiganga sha mu lūgūlū; noolekejage ū būshū wako, nī līlaka lyako naliigwe! Nguno ī lilaka lyako isoga no, nū būshū wako wiza no.

¹⁵ Bing'we, badimagi a bana jidīvī, a bana jidīvī a bado bado abo bakūtūkenaagūjaga migūnda yise ya mizabibu; nguno ī migūnda yise ya mizabibu yalabile būlabo.

Nkīma

¹⁶ Ū Ntogwa wane ng'wene wane, nū nene nalī wakwe; a madaale gakwe akagadīīmīlaga mu bonji.

¹⁷ Bebe Ntogwa wane, līlī bbihī kūfuma ī līīmi nī giiti shisambaale; shokaga wize gītī laala, gītī ngulyati ya ngūlūgūlū higūlya ya ngūlū ja Besali.