Lyīmbo lya ng'wa Solomoni 1 - Bibilia Ilagano Lya Kale 2015

¹ Lyīmbo lya mīmbo ga ng'wa Solomoni.

Nkīma

² Ni anibbipage wei, anibbipe na nomo gwakwe ng'wenekīlī; ū būtogwa wako būsoga no kūtinda divai.

³ Ū ng'waso gwa maguta gako gwawiza no, ī lina lyako lībange gītī maguta ga ng'waso gwawiza gitagwa hanhū. H'ī chene bakūtogilwe a banikī.

⁴ Nisolage ūnijane, nīyo tūjage wangū! Ū ntemi ni aningījage mu chumba shakwe. Tūkūkūyegela no, hangī tūkūsangabala; ū būtogwa wako tūkūbūkumīlīja kūtinda divai. Abo bakūtogilwe batūngīlīgije no!

Banwani Nkīma

⁵ Bing'we bashīke ba Yelusalemu, ū nene nalī ng'wiza nūūlū īkī nalī ng'wilabūzu, nalī ng'wilabūzu gītī maheema ga Kedaali; gītī matundubaali ga ng'wa Solomoni.

⁶ Mutanilolage ng'ūnikumya kūlwa wilabūzu wane, nalī ng'wilabūzu kūlwa līīmi dūhū. Basīza bane baalī baanipelanīla, būnihadīkīja kūyūlīma mu migūnda ya mizabibu; ū mīlī gwane nūgūlekanīja.

⁷ Bebe ūyo nakūtogilwe, niwīlage ūko ūkajagūdīīmīla a madaale gako, nū kūko ūkajagūtūūgīja ūlū lyaseba ī līīmi; nibūlī nikale nakūpīndīīlaga madaale ga mitugo ja biyo gītī nakundīkīgije a miso?

Banwani

⁸ Bebe nkīma ng'wiza kūtinda bakīma bose, ūlū ūtadeebile kūūbījaga dūhū ī migweshi ya magūlū ga ng'holo, ūje ūkakīgīle nang'ho a baana ba mbūlī bako bbihī na maheema ga badīīmi.

Ngosha

⁹ Ntogwa wane, nakakwikolanījaga na falasa īkūdutaga magogoteni ga ng'wa Falao.

¹⁰ Ī sīīlī jako ūlū janungeelaga jikagabeelejaga no a matama gako; nū ngufu gwa zahabu gūkabeelelaga kīngī nasho ūlū wagūzwaalaga ū mu nhingo yako

¹¹ Ī gete tūkūkūbeegeja sīīlī ja zahabu jitobanīgije mo na feza.

Nkīma

¹² Ū ntemi aho alī ha meeza yakwe, a malaashi gane gakasambaaja ū ng'waso gwago.

¹³ Ū Ntogwa wane ū kūlī nene abange gītī ibungī lya būbbani līlaalīkījiwe ha gatī gatī ya mbeele jane.

¹⁴ Nīyo ū kūlī nene ū Ntogwa wane alī gītī ibbipi lya bonji wa kūfuma kū migūnda ya mizabibu ya Engedi.

Ngosha

¹⁵ Ee Ntogwa wane, ūlī nsoga no! Ūlī nsoga shido Ntogwa wane! A miso gako masoga no, gabange gītī ng'hūūlū.

Nkīma

¹⁶ Ntogwa wane ūlī wawiza no! Ū bebe ūkaniyejaga kīngī nasho! Ū būlīīlī wise būbange gītī maswa managana, būfuuku kīngī nasho.

Ngosha

¹⁷ Ī migamba ya numba yise ya mikoola, Ī selele ja mibanga.