Shītwa 25 - Bibilia Ilagano Lya Kale 2015

Paulo kūjūdegelekwa na Kaisali

¹ Hūna ūbiza wingīla Fesito a ha nīmo gwa būsugi ū mu sī yenīyo; aho jabīta shikū idatū wīnga ī Kaisalia ūja Yelusalemu.

² A bagabīji bataale na a batongeeji ba Bayudaya būūkansomboolela ī mihayo ya kūbūūlwa kwa ng'wa Paulo, nīyo būng'wikūmbīlīja

³ balīnomba abīītīle shigongo; alagīle ize Yelusalemu, nguno baalī balomana kūng'wibandīīla na kūmūlagīla mu nzīla.

⁴ Alīyo ū Fesito ūbashokeja gīkī, “Ū Paulo alī Kaisalia alang'hanilwe;” na gīkī ū wei ng'wenekīlī walī n'iganiko lya kūja ko ūlū jabīta shikū ngehu.

⁵ Ongeja kūhaya gīkī, “Bamò ba batongeeji bing'we ni bizage hamò nane bakīmīīle nang'hwe ū munhū ng'wenūyo, babooleche ū būkenaagūji bokwe”.

⁶ Akikala nabo shikū ja kūshika inaane nūūlū ikūmi gīko, hūna ūtulumenha ashokile Kaisalia; ha ntondo yaho wigasha kūlamula, ūlagīla witanwa ū Paulo.

⁷ Aho washika, a Bayudaya abo baalī biza kūfuma Yelusalemu, bandya kūsomboola mihayo mingī nīyo midito, ya kūmūūla; alīyo nahene būlemeelwa ū koolecha ū būng'hana wayo.

⁸ Ū mu būsombooji bokwe ū Paulo ūhaya gīkī, “Ū nene natīītile mhayo gose gose gwabūbi ū kū Bayudaya, nūūlū ū kū hekalu, nūūlū ni kūlī Kaisali dūhū.”

⁹ Gwike ū Fesito akabona abayeje a Bayudaya, na lūūlū ūnshokeja ū Paulo alīng'wīla gīkī, “Hamo ūtogilwe kūja Yelusalemu nakīlamulīle kwene ī mihayo yako?”

¹⁰ Nang'hwe ū Paulo ūhaya, “A henaha nīmīīlaga kū būtongi w'ibanza lya ng'wa Kaisali, aho hanigeleelilwe kūlamulīlwa. Ū bebe ng'wenekīlī ūmanile hape gīkī natabakenije mhayo nūūlū gūmò a Bayudaya.

¹¹ Ū nene ūlū nalī ng'hūbi nūūlū nīītile mhayo gwa kūningīja mu kūcha, natogohaga ū kūcha, alīyo ūlū gūtīho mhayo nūūlū gūmò ūyo balīnibūūla a banhū aba, atīho ūyo adūgije kūnitūūla mu makono gabo. Nalīlomba kūja kūlī Kaisali!”

¹² Ū Fesito a henaho wandya kūlūngalūnga na a banhū b'ibanza; aho wamala ūshosha gīkī, “Ali lūūlū, īkī walomba kūja kūlī Kaisali, ūkūja ng'hana!”

Paulo kū būtongi bo ng'wa Agilipa na Belinike

¹³ Aho jabīta shikū ndebe, ntemi Agilipa wiza ī Kaisalia hamò na Belinike, kwiza kūngīsha ū Fesito.

¹⁴ Bakamala ho shikū ningī, nose ū Fesito ūnsomboolela ū ntemi ī mihayo ya ng'wa Paulo; ūhaya gīkī, “Alīho munhū aha walekilwe na Feliki atungilwe.

¹⁵ Naalī naajile Yelusalemu būūkanisomboolela a bagabīji bataale na a banamhala ba Bayudaya, būnilomba nang'winhe nsango.

¹⁶ Nane nūbashokeja gīkī, shitī shīmīle sha Balumi kūlamula munhū ose ose aho ataalī kūmanhya nabo a babūūji bakwe būshū kū būshū, nang'hwe afunye būsombooji ū mu yose īyo balīmūūlīla.

¹⁷ Hūna lūūlū aho biza natadīlile; a ha ntondo yaho nigasha ng'wibanza, nūlagīla ū munhū ng'wenūyo wenhwa.

¹⁸ Bahayīmīīla kwandya kūmūūla a babūūji bakwe, nūgayiwa mo nūūlū gūmò ū gwabūbi;

¹⁹ ūlū ītī ya wihalalīja wa mihayo ya dini yabo dūhū, na ya ng'wa munhū ūmò, Yesu, ūyo wamala kūcha; alīyo ū Paulo akūgaagaanaga kūhaya gīkī alīho mpanga!

²⁰ Ū nene ī mihayo yenīyo īkanizwanja, nose nūmūja ūlū atogilwe kūja Yelusalemu īkalamulīlwe kwenūko.

²¹ Alīyo ū Paulo ūlomba kūjūlamulwa na Augusto, hūna nūlagīla alang'hanwe kūshisha līshike ī likanza lya kūntwala ū kūlī Kaisali.”

²² Ū Agilipa ūng'wīla ū Fesito gīkī, “Ūkūbeelela nang'wigwe nane ū munhū ng'wenūyo.” Ū Fesito ūhaya, “Ntondo ūkūndegeleka.”

²³ Na ng'hana aha ntondo yaho biza a ba Agilipa nū Balinike baamanukaga, baalī hamò na bataale ba bashilikale, pye na a banhū a bataale bataale a ba mu nzengo. Būshika bingīla ū ng'wibanza, hūna ū Fesito ūlagīla witanwa ū Paulo.

²⁴ Na lūūlū ū Fesito wandya kūhaya gīkī, “Ntemi Agilipa na a bing'we bababa pye abo mulī hamò nise aha, ū munhū ūyo mulīmona ng'wenūyū, pye a Bayudaya ba Yelusalemu na a ba henaha bakūnilīlīīlaga būhaya gīkī, shitigelile ikale mpanga.

²⁵ Alīyo ū nene natūgūbonaga ū mhayo ūyo wītile, ū gwa kūng'wenheleja kūcha; gwike īkī walombile kūja kūlī Augusto, naabonile īlī yawiza nantwale ng'hana.

²⁶ Gwike natī nago gete ū mhayo gwa kapanga ūyo nalang'wandīkīle ū ntaale wane; h'ī nguno yene nang'wenha kū būtongi wing'we. Ū no no no ū kū būtongi wako ntemi Agilipa. Hamo ū mu kūmūja būja nakūpandīka sha kwandīka.

²⁷ Nguno nakūbiza giti nalī nchilū chilū ūlū nūtwala ntungwa alīyo natoolekegije ī ng'hana ya mihayo īyo alībūūlīlwa.”