Shītwa 24 - Bibilia Ilagano Lya Kale 2015

Kūbūūlwa kwa ng'wa Paulo

¹ Aho jabīta shikū itanò, ū ngabīji ntaale Anania ūja ko ī Kaisalia, hamò na banamhala. Bakaja hamò na Tetulo, munhū ndeeba mu kūsomboola mihayo; a benaba hū bakajīmīīla ū kū būtongi bo nsugi kūmūūla ū Paulo.

² Aho witanwa ū Paulo, ū Tetulo wandya ū kūmūūla alīhaya gīkī, “Ū ng'wihanga īlī tūlī mu mhola yabūyaga kūlwa nguno yako; hama nī mihayo īkūjaga yongeja kūbeela kūlwa būloleeji bo maganiko gako

³ baba nkūjiwa Feliki. Hūna lūūlū, bose pye ūmo tūgelelile tūkwīyanukūlaga pyī ī yenīyī mu kūlūmba kūtaale.

⁴ Gwike natatogilwe nikale nūkūjimīīgīja makanza; na lūūlū ī haha baba nalīkwikūmbīlīja wiyūmīlīje ho hado ūtūdegeleke.

⁵ Nguno ū munhū ng'wenūyū twamonile gīkī nkenaagūji, akūjaga ūbasong'hanya pye a Bayudaya hose hose ūko balī; nīyo ntongeejibo banhū b'igele lya Banazolayo.

⁶ Walī wagemile na kūsosohaja hekalu, tūndima; aho twahaya kūnamula kūlondeela katongeelele ka shilagīlo shise,

⁷ wiza Lisia, ū ntaale wa mabita ga bashilikale, ūshikīla kūng'hulumūla bo nguzu, ūng'wīnja ū mu makono gise.

⁸ Hūna ūlagīla bize kūlī bebe a babūūji bakwe. Nīyo nū bebe ūlū ūlamūje ūkwīmana jigi pyī īyo tūlīmūūlīla yenīyī.”

⁹ Na a Bayudaya a bangī bakizunīlīja nayo ī mihayo yenīyo, gīkī yalī chene.

Paulo kūsomboola kūlī Feliki

¹⁰ Ū nsugi ūnzunīlīja nang'hwe ū Paulo ū kūsomboola; hūna ūshosha gīkī, “Nalī na būyegi ū kūkūsomboolela ī mihayo yane, nguno namanile ūlī namujibo shikū ningī ū ng'wihanga īlī.

¹¹ Ūkūbeelela ūmane gīkī naalī naajile Yelusalemu kūjūlamya, nīyo ī haha ī shikū jitaalī nūūlū kūbīta a h'ikūmi n'ibīlī.

¹² A banhū benaba batanibonile nakwihalalījaga na munhū nūūlū ūmò mu hekalu; nūūlū ni gīkī nabilingaga banhū ng'wisinagogi, nūūlū h'ipandī līngī lyose lyose ū mu nzengo, nī chene batanibonile.

¹³ Batīho nūūlū kūfunya būng'hana wayo ī mihayo īyo balīnibūūla ī haha.

¹⁴ Gwike nalīzunya mhayo gūmò ū kū būtongi wako; gīkī ū Mulungu wa bakūlūgenji bise nakūnamyaga mu Nzīla īyo bakwīhayaga a benaba gīkī ya nyagomi. Ū nene nīzunije pyī ī mihayo īyo yandīkilwe mu shilagīlo, nū mu bahangi.

¹⁵ Nagūsanije ū mhayo ūyo agūhayile ū Mulungu, gīt'ūmo na a boi bagūsanīgije; gīkī būkūbiza ho būjūūko wa bafu pye a bose, batūngīlīja na a bakenaagūji.

¹⁶ Nose ū nene nakūhadīkaga gwa, nabize wape ū mu moyo, ū kū būtongi bo ng'wa Mulungu nū kū banhū.

¹⁷ “Alīyo yabītaga myaka mingī natīho, naanogile niza; kwenha shakwinha na manong'ho kū banhū b'ihanga lyane.

¹⁸ Abo balīnibūūla benaba bakanisangīla mu hekalu nalī ng'wikanza lya kwiyeeja; batanibonile n'ibita lya banhū, nūūlū hamo gīkī nalenheleja nsambo.

¹⁹ Abo bakīīta ī gīko baalī Bayudaya balebe ba kūfuma Asia, abo ni yabeelela ūlū ni babiza balīho aha, bafunye būkaanīji, babūkaanīle ū būbi bone ūmo bamanīlile.

²⁰ Nūūlū a benaba balīho aba ni babūsomboolage ū būbi ūbo banibonile nabo, kūko nataalī nīmīīlaga kū būtongi w'ibanza gīkī.

²¹ Ūlū ītī kūlw'ilaka īlo nakafunya aho nakīmīīla ha gatī yabo nūhaya gīkī, ‘Ū lelo nalīlamulwa kū būtongi wing'we kūlwa nguno ya mhayo gwa būjūūko wa bafu.’”

²² Ū Feliki walī ayīmanile chiza no ī mihayo ya Nzīla yenīyī, alīyo wījimangūcha. Ūlīsambaaja ī libanza; kūnū alīhaya gīkī, “Ūlū alize ū Lisia ū ntaale wa mabita ga bashilikale nakwīlamula ī mihayo yako.”

²³ Hūna ūnagīla ū ntaale wa bashilikale igana anang'hane ū Paulo; gwike ang'winhe wiyabī, hama atizūbalemeja a banwani biye ū kūyūngunanha.

Paulo mu kūlanghanwa

²⁴ Ū Feliki walī atoolile Nyudaya, lina lyakwe Dulusila. Jahayūbīta shikū ndebe wiza hangī hamò nū nke. Aho bashika ūtūmīja wenhwa ū Paulo, ūndegeleka ū būsombooji bokwe bo mihayo ya kūnzunya Yesu Kilisito.

²⁵ Ū Paulo akansomboolela mihayo ya būtūngīlīja na ya kwilang'hana, na ya būlamulwa ūbo būliza. Ū Feliki ogoha; ūnshokeja gīkī, “Wigejaga lūūlū ī haha, jaga nakūkwitana ikanza līngī hangī.”

²⁶ Alīyo īkī akasangwa wisagīlagwa gīkī ū Paulo akūng'honga hela, akayikala ūnagīlīja kwiza kūhoya nang'hwe būlī makanza.

²⁷ Aho yabīta myaka ībīlī ū nīmo go ng'wa Feliki gūkasolwa na Polikio Fesito; gwike ū Feliki walī atogilwe kūbayeja a Bayudaya, na lūūlū ūneka ū Paulo alī mu būtungwa.