Shītwa 23 - Bibilia Ilagano Lya Kale 2015

¹ Ū Paulo ūbakalalīla no no no a b'ibanza; hūna ūhaya gīkī, “Bababa badūgū bane, ū nene ū mu kikalīle kane ka būlī lūshikū ū kū būtongi bo ng'wa Mulungu, nalī na wiyangūji wawiza ū mung'holò kūshisha nī lelo īyī.”

² Ū ngabīji ntaale Anania ūbalagīla abo baalī bīmīīla haho nang'hwe bantūle ū kū nomo gokwe.

³ Nang'hwe ū Paulo ūng'wīla, “Akūkūtūla ū Mulungu, bebe ndugu ībilile swakala; wigashaga kūnilamula mu ng'hana ya shilagīlo alīyo hū walinhya kūshikenaagūla na kūlagīla gīkī natūlwe!”

⁴ Nabo abo baalī bīmīīla haho nang'hwe būng'wīla, “Bebe ūlīng'wīla mihayo kī ī yenīyo ū ngabīji ntaale wa ng'wa Mulungu?”

⁵ Ū Paulo ūhaya, “Badūgū bane, naalī natamanile gīkī ngabīji ntaale, nguno gwandīkilwe gīkī, ‘Yaya ū kūng'haya kībi ū ntongeeji wa banhū bako.’”

⁶ Hūna lūūlū ū Paulo aho wadeeba gīkī abo baalīho, bamò baalī Basadukayo na bangī Bafalisayo, ūhamuka ū ng'wibanza n'ilaka itaale ūhaya, “Bababa badūgū bane, ū nene nalī Mfalisayo, ng'wana wa Bafalisayo, nalīlamulwa kūlwa nguno ya kwisagīlwa kwa būjūūko wa bafu!”

⁷ Aho wahaya gīko yūbūūka yombo a ha gatī ya Bafalisayo na a Basadukayo, lyūgabanīka ī libita.

⁸ Nguno a Basadukayo bakahayaga gīkī būtīho ū būjūūko, na a bamalaika batīho, pye nī myoyo ītīho; alīyo a Bafalisayo bazunije gīkī pyī ī shenīsho, shilīho.

⁹ Aho yakūla ī yombo, bīmīīla nose bamò ba Bafalisayo, a balangi ba shilagīlo. Bandya kūyomba mu kwigambīla balīhaya gīkī, “Nīyo a bise tūtūbonaga nūūlū būbi ū mulī munhū ng'wenūyū. Ī gīsī gūlīho mhayo kī ūlū ūbiza wayombiwe na moyo nūūlū na malaika?”

¹⁰ Ū ntaale wa mabita ga bashilikale aho wabona gīkī gwakūla ū nsambo, ūbalagīla a bashilikale bang'wīnje ū Paulo; būng'wingīja mu ng'hambī, nguno akogoha a banhū batizūntandagūla.

¹¹ Aho wila ū būjikū, ū Seeba wīmīīla aho walī ū Paulo; ūng'wīla gīkī, “Timbyaga ng'holò, nguno shiigelile ūnikaaniīle nī Lumi gīt'ūmo wanikaanīlaga mu Yelusalemu.”

Bayudaya kūlomana kūmūlaga Paulo

¹² Aho wela a Bayudaya būbeeja long'we; biyilahīja gīkī batūlyaga nūūlū kūng'wa shose shose yaya, kūshisha bamūlage ū Paulo.

¹³ Abo bakabeeja ī long'we yenīyo baalī banhū bakīlile ha makūmi ane.

¹⁴ Hūna biza ū kūlī ngabīji ntaale, ūko baalī na a banamhala; būng'wīla, “Twilahīlaga gīkī tūtūlojaga shose shose nūūlū hado, kūshisha tūmūlage ū Paulo.

¹⁵ Ali lūūlū, ū bebe nī libanza lyako tūmaga nhūng'wa ū kūlī ntaale wa mabita ga bashilikale, ang'wenhe; gītī gīkī mulīhaya kūmūgīlīja chiza ī mihayo yakwe. A bise tūtang'anhīlile gete, tūkūmūlagīla mu nzīla aho ataalī nūūlū kwegeela a henaha.”

¹⁶ Gwike ng'wipfwa wa ng'wa Paulo ūwigwa ū būsīgani wenūbo, hūna wiza wingīla ū mu ng'hambī, ūng'wīla ū Paulo.

¹⁷ Nang'hwe ū Paulo ūng'witana ūmò wa bataale ba bashilikale; ūng'wīla gīkī, “Ū nyanda ng'wenūyū ntwalage ū kūlī ntaale wa mabita, nguno alī na mhayo gwa kūng'wīla.”

¹⁸ Aho wantwala ūūkang'wīla gīkī, “Ū ntungwa ū Paulo walī wanitana ūniwīla nakwenhele ūyū nyanda alī na mhayo gwa kūkūwīla.”

¹⁹ Ū ntaale wa mabita ūndima nkono ūja nang'hwe ha mhūjo ūūkamūja, “Ūlī na mhayo kī ūyo ūtogilwe kūniwīla?”

²⁰ Nang'hwe ūhaya gīkī, “A Bayudaya balomanaga kwiza ī ntondo kūkūlomba ūlantwale ū Paulo kwibanza gītī kūhaya kūmūgīlīja chiza ī mihayo yakwe.

²¹ Ū bebe ūtizūbazunīlīja, nguno bamò babo, banhū bakīlile ha makūmi ane, bakūbiza bang'witegeelaga. Bilahīlaga gīkī batūlyaga shose shose nūūlū kūng'wa yaya, kūshisha bamūlage; nīyo ī haha balīho balindaga kwigwa kūfuma kūlī bebe dūhū.”

²² Hūna ū ntaale wa mabita ūneka aje ū nyanda, alīyo ūng'hūgūla ūng'wīla, “Ūtizūng'wīla munhū nūūlū ūmò, gīkī waniwīlaga ī mihayo yenīyī.”

Paulo kūtwalwa kūlī Feliki

²³ Hūna witana bataale babīlī ba bashilikale ūbawīla gīkī, “Solagi bashilikale magana abīlī, na badamhīji ba falasa makūmi mpungatī, na bashilikale magana abīlī ba machimu; bibeeja beeje bamalīīle, nguno lūlīho lūgendo lwa kūja Kaisalia makanza ga sa idatū ja būjikū.

²⁴ Jigele na ndamhī aladamhīle ū Paulo, bantwale kūlī nsugi Feliki bakanshishe ko mhola.”

²⁵ Wandīka na nyalūba mu mbika īyī.

²⁶ “Kilaudio Lisia, kūlī baba nsugi nkūjiwa Feliki. Nalīkūgīsha.

²⁷ Ū munhū ng'wenūyū walī wadimilwe na Bayudaya; baalī batogilwe kūmūlaga, alīyo aho namana gīkī alī ūmò wa Balumi, nūja na bashilikale nūkampīja.

²⁸ Nūng'wenha ng'wibanza, wiza wīmīīla nabo īkī naalī natogilwe kūmana ni nguno kī bakūng'wītīlaga īlī gīko.

²⁹ Nakabona gīkī alībūūlwa kūlwa wihalalīja bo mihayo ya shilagīlo shabo; mhayo ūyo gūtigelile kūng'wenheleja kwinhwa nsango gwa kūbūlagwa, nūūlū gwa kūtungwa.

³⁰ Hama hangī nahayagimanīla nawīlwa gīkī, īlīho gwīnda ya kūhaya kūng'wītīla gwabūbi ū munhū ng'wenūyo; haho na haho nūbona nantūme kūlī bebe. Nabalagīlaga na a babūūji bakwe bize basomboole kū būtongi wako, ī mihayo īyo balīmūūla.”

³¹ Na ng'hana a bashilikale bīīta gīt'ūmo gūkahelelwa, būnsola ū Paulo ītaalī būjikū gīko, būūkashika nang'hwe Antipatili.

³² Aho wela ī dilū a bene būshoka kū ng'hambī ya bashilikale, būbaleka a badamhīji ba falasa būshikīīla nang'hwe ī Kaisalia.

³³ Abo bakaja ī Kaisalia aho bingīla ū mu nzengo, būng'winha ī nyalūba ū nsugi; nū Paulo būneka mu makono gakwe.

³⁴ Wahayūmala kwīsoma, ūbūja ū Paulo muna halī; aho wamana gīkī muna Kilikia,

³⁵ ūhaya; “Nakwīdegeleka ī mihayo yako ūlū balashike a babūūji bako.” Ūlagīla alang'hanwe ng'wikūlū lya ng'wa Helode.