Shītwa 21 - Bibilia Ilagano Lya Kale 2015

Lūgendo lwa kūja Yelusalemu

¹ Aho lyashika ī likanza, tūlinhya itanga tūgoloola tūjile tūūkashika Kosi, ū kū ntondo yaho tūshika Lodo, ū kūfuma a henaho tūja Patala.

² Tūbona meli ījile Foenike, twingīla ng'wenūmo, tūbūūka tūjile.

³ Ī Kupulo twīloleela dūhū, twītūla kū nkono gwa lūmoso, a bise tūja nalo ū lūgendo tūlolile Sulia; tūūkakola Tulo, nguno ī meli yabbakūūlaga miligo hoi a henaho.

⁴ Tūbona hoi bahemba, twikala nabo shikū mpungatī; būng'hūgūla na kūng'hūgūla ū Paulo mu nguzu ja ng'wa Moyo, gīkī atizūja ī Yelusalemu.

⁵ Alīyo aho jashika ī shikū ja kūbūūka, twandya dūhū ū lūgendo; a bose būtūshindīkīla, pye na a bakīma na a banīgīnī būfuma hamò nise ī hanze ya nzengo; aho twashika a ha ng'walo tūtuja mazwi kūlomba.

⁶ Twahayūmala ū kwilaga nabo, twingīla mu meli a bise, nabo būshoka kaya.

⁷ Tūja nalo ū lūgendo lwise ū kūfuma ī Tulo, aho twashika Putolemai tūbagīsha a badūgū, tūlenda nabo hoi lūshikū lūmò.

⁸ A ha ntondo yaho tūshika Kaisalia, tūūkikala ha ng'wa Nomeeji Filipo, ūyo walī ūmò wa bagunanhi abo mpungatī.

⁹ Walī na bashīke bane bahangi, baalī batatoolilwe.

¹⁰ A henaho tūkikala ho shikū ningī, kwitulwa washika ng'hangi nebe kūfuma sī ya Būyudaya, lina lyakwe Agaabo.

¹¹ Wahayūshika aho twalī, ūsola ngwasho go ng'wa Paulo, wibohya a magūlū na a makono; hūna ūhaya, “Ū Moyo Ng'wela alīhaya gīkī, ‘A Bayudaya bakūja bakamohye gīkī ū ng'wenekīlī ngwasho ūyū, bantūūle mu makono ga banhū ba mahanga.’”

¹² Pye a bise, a bageni na a baho na kale, twandya kūng'wikūmbīlīja atizūja ī Yelusalemu.

¹³ Alīyo ū Paulo ūshosha ūhaya gīkī, “Bing'we mulīīta mhayo kī ū gwenūyū, mulīlīla gīkī munigwishe ng'holò? Managi gīkī ū nene natazunije kūtungwa dūhū, alīyo nūūlū kūchīla ko ī Yelusalemu, kūlwa lina lya ng'wa Seeba Yesu!”

¹⁴ Aho twabona gīkī atīko kūgalūchiwa, tūhaya, “Leka īshikīīle īyo Seeba atogilwe ībize ho; tūhuumūla tūneka.”

¹⁵ Ha numa ya shikū ndebe, tūgolanya lūgendo lwise; tūbūūka tūjile Yelusalemu.

¹⁶ Bahemba balebe bana Kaisalia biza hamò nise, būtūshikīja ha kaya ya ng'wa Naasoni, gīkī tūlende ha ng'wakwe. Walī ng'hemba wa shikū ningī, fumo yakwe Kupulo.

Paulo kūja kwibona na Yakobo

¹⁷ Aho twashika ī Yelusalemu, būtwanukūla na būyegi a badūgū.

¹⁸ A ha ntondo yaho tūja nang'hwe ū Paulo kwibona na Yakobo; na a banamhala baalīho pye a bose.

¹⁹ Twahayūmala ū kūbagīsha, ū Paulo wandya kūbonzoolela gūmò gūmò, pyī īyo yalī yabeejiwa na Mulungu kūbītīla mu būtūmami bokwe.

²⁰ Aho bigwa būnkumīlīja Mulungu, būng'wīla ū Paulo gīkī, “Bebe ndūgū wise, ūlībona gīkī a Bayudaya abo baazunije balī mashihūmbī makūmi mingī; na pye a bose balī na būjangīīzu būtaale no ū kū shilagīlo!

²¹ Alīyo hū baamalile kūwīlwa gīkī, ū bebe ūkūjaga ūbawīla a Bayudaya abo balī mu sī ja mahanga, gīkī balekane nang'hwe ū Musa; booye nū kūyūbasaala a baana babo, pyī nū kūshimīzīla ū mu shīmīle shise.

²² Ī gīsī lūūlū, gūlīho mhayo kī ū go kwīta? Nguno bakwigwa dūhū ī gīkī wizile!

²³ Ali lūūlū, leka tūkūwīle gūyū mhayo ūgwīte; balīho banhū bane hamò nise aha balī mu shilahīlo.

²⁴ Basolage wiyeeje hamò nabo, ūbafunīje bebe ī sabo ja kūmoogelwa ī mitwe yabo. Ū mu gīko pye a banhū bakūmana gīkī, ī mihayo īyo bakūwīlagwa kūlwa nguno yako ītī ya ng'hana; bakūbona gīkī ū bebe ūkūshimīzīlaga mo ū mu shilagīlo, na hangī ūshidimile.

²⁵ Ī mihayo ya banhū ba mahanga ī yene twamala kwizunīlīja kale, tūbandīkīla na kūbandīkīla, gīkī balekane nū būfunya bo shitambo kū mashiikolile, nū kūlya a mininga nūūlū ndimu ja kūbūlagwa na kwitwa mininga yaya; balekane nayo gete ī yenīyo, pyī nū būjingi.”

²⁶ Na ng'hana a ha ntondo yaho ū Paulo ūbasola a banhū benabo wiyeeja hamò nabo; hūna wingīla mu hekalu kūbasomboolela ī likanza lya kwejiwa kwabo; na gīkī ūlū lyūng'wa, shikūfunyiwa ī shitambo kūlwa būlī ūmò wabo.

Kūding'wa kwa ng'wa Paulo mu hekalu

²⁷ Aho jegeela kūshila ī shikū ījo mpungatī, Bayudaya balebe, ba kūfuma Asia, būmona ū Paulo alī mu hekalu. Būng'haja na makono gabo kūnū balīyoganya, bakwitanaga banhū.

²⁸ Balīhaya gīkī, “Bagosha Baisilaeli twangūhīlagi, ū ng'wing'wana ng'wenūyū hū ng'wene ūyo akūjaga hose hose, ūlanga mihayo ya kūlīgomela ī lihanga lise nī shilagīlo; pyī nī lipandī lyenīlī. Nīyo wingījaga na Bayunani ū mu hekalu, kūlīsosohaja ī lipandī lyeela īlī!”

²⁹ Bakahaya gīko īkī baalī bamona ū Paulo ū mu nzengo alī na Tilofimo muna Efeso, biganikaga gīkī walī wingīla hamò nang'hwe nū mu hekalu.

³⁰ Hūna pyī ū nzengo gūyugūūka ī likanza lyenīlo; bugidinga nhambo a banhū. Būndima ū Paulo, būndutanja bamfunije hanze ya hekalu; haho na haho yūlugalwa ī milyango!

³¹ Aho bataalī būhadīkīja kūhaya kūmūlaga, jūshika ī mhola kūlī ntaale wa mabita ga bashilikale, gīkī yayogooka ī Yelusalemu.

³² Nang'hwe haho na haho witana bashilikale na bataale babo, būpeela bajile ū kū yombo. A Bayudaya aho bamona ū ntaale wa mabita, hamò na a bashilikale abo walī nabo, boya ū kūntūlagūla ū Paulo.

³³ Hūna ū ntaale wa mabita wegeela ho ūndima, ūlagīla atungwe minyololo ībīlī abūjiwe alī nani, hangī wītaga mhayo kī!

³⁴ A banhū bandya kūyoganya ū ng'wibita, abo balīhaya kīngī na a babo nabo balīhaya kīngī. Ū ntaale wa mabita ūduuma ū kwīmana īyo yahayiagwa kūlwa nguno ya yombo, nose ūkalīla kūlagīla dūhū gīkī, ū Paulo akingījiwe mu ng'hambī ya bashilikale.

³⁵ A bashilikale aho bashika a ha mita, yūbigeleelwa kūmūcha ū Paulo, ū kūng'wingīja ū mu ng'hambī, nguno ū nsambo gwa banhū gūkongeja ū kūkūla.

³⁶ Ī libita lya banhū abo bakūūbījaga bajaga balīhaya gīkī, “Mūlagagi!”

Būsombooji bo ng'wa Paulo

³⁷ Ū Paulo aho wegeela ū kwingījiwa ū mu ng'hambī ya bashilikale, ūng'wīla ū ntaale wa mabita gīkī, “Nadūgije kūkūwīla mhayo?” Nang'hwe ūhaya, “Bebe ūmanile Shiyunani?

³⁸ Ūtī ng'wene ū muna Misili ūyo walī wenhelegije nsambo makanza malebe ū mu shikū ījo jabītile, ūkuminga n'ibita lya banhū babūlagi shihūmbī shine, ūja nabo kū mapoolu?”

³⁹ Nang'hwe ū Paulo ūhaya, “Mm yaya, ū nene nalī Nyudaya muna Taso ya Kilikia, nzengo ūyo gūtī gwa kwibengelejiwa; nalīkūlomba ūnizunīlīje nayombe nabo a banhū.”

⁴⁰ Ūnzunīlīja ng'hana. Ū Paulo wīmīīla ha malinhīlo ga kwingīlīla ū mu numba ya ng'hambī, ūbahūngīja nkono a banhū būhuumūlīja sele. Hūna ūbawīla mu lūlīmi lo Shihebulania alīhaya gīkī.