Shītwa 13 - Bibilia Ilagano Lya Kale 2015

Balinaba na Saulo kūtūng'wa

¹ Ū mu kanisa ya Antiokia baalīho bahangi na balangi, ba Balinaba, Simioni ūyo witanagwa ng'wilabūzu, Lukio muna Kilene, Manaeni ng'wanong'wawe na Helode mu kūlelwa, na Saulo.

² Makanza malebe baalī bafungile, lwise lūmò aho balīnamya Seeba, ū Moyo Ng'wela ūbawīla gīkī, “Nikomanījagi ū Balinaba nū Saulo kūlwa nīmo ūyo naabitanīla.”

³ Aho bamala ū kūfunga būlomba, būbatūūlīla makono, hūna būbatūma.

Būlomeeji mu Kupulo

⁴ Aho baatūng'wa nū Moyo Ng'wela, bakaja būūkashika Seleukia; ū kwīnga a henaho, būbuga nyanza bajile Kupulo.

⁵ Bahayūshika Salami bandya kūgūlomeela ū mhayo go ng'wa Mulungu, ū mu masinagogi ga Bayudaya; baalī nang'hwe nū Yohana, wajaga akūbagunanhaga.

⁶ Būbīta pye a hose ū ng'wijinga būūkashika Pafo, būmona Nyudaya nebe, walī nogi na ng'hangi nomolomo; lina lyakwe Bali-yesu.

⁷ Walī hamò na Seligio Paulo, munhū o masala; nūwe olī nsugi. Ū munhū ng'wenūyo akabitana a ba Balinaba nū Saulo, nguno walī atogilwe kūgwigwa ū mhayo go ng'wa Mulungu.

⁸ Gwike ū nogi ū Elima (h'a makūlū ga lina lyakwe) akabalemeja, nguno walī atogilwe kūng'hangīja ū nsugi atizūzunya.

⁹ Alīyo ū Saulo, ūyo witanagwa na lina lya Paulo, ūnkalalīla ū munhū ng'wenūyo, kūnū okalaga nguzu ja ng'wa Moyo Ng'wela.

¹⁰ Hūna ūng'wīla gīkī, “Bebe ng'wana wa ng'wa Shetani na ng'wanishi wa būtūngīlīja bose, ūyo okalile būliganya na būbi wa būlī mbika, ūtūdūla ū kūleka ū kūjichaamya ī nzīla ja ng'wa Seeba ī ngololoku?

¹¹ Managa gīkī ī haha ū nkono go ng'wa Seeba gūlī higūlya yako, ūkūbbokula ooye ū kūlībona ī līīmi ikanza ho.” Haho na haho ūgwīlwa wiija na giiti, wandya kūja alībbabbasha na nkono, akūkoobaga batongeeji.

¹² Ū nsugi aho wagūbona ū mhayo gwenūyo ūbiza nzunya, ū būlangi bo ng'wa Seeba ūbūkumya no.

Paulo na Balinaba mu Antiokia ya Pisidia

¹³ Hūna ū Paulo na a biye bīnga ī Pafo, būlinhya itanga būbūūka bajile būūkashika Peliga ya Pamfulia. Ū Yohana ūbaleka ūshoka Yelusalemu.

¹⁴ Alīyo a boi būbīta mo ū mu Peliga būja būūkashika Antiokia ya Pisidia; ū lūshikū lo sabato bingīla ng'wisinagogi bigasha.

¹⁵ Aho shamala kūsong'wa shilagīlo na shitabo sha bahangi, a bataale b'isinagogi būbatūmīla nhūng'wa būbawīla, “Bababa ūlū mulī na mhayo gwa kūganikīla banhū, somboolagi!”

¹⁶ Ūbūūka ū Paulo ūbahūngīja nkono; hūna ūhaya gīkī, “Bababa Baisilaeli na a bing'we abo mung'ogohile Mulungu; degelekagi.

¹⁷ Ū Mulungu wa banhū benaba, a Baisilaeli, akabasola a bakūlūgenji bise. Būūkikala mu sī ya Misili gītī bageni; aho balī kwenūko a banhū benabo ūbagūngūhya, hūna ūbafunya ū mu sī yenīyo alībatongeela na nkono gwa būdūla būtaale.

¹⁸ Būmala ikanza lya myaka ya kūshika makūmi ane balī kū matogolo, nang'hwe alī hamò nabo mu kwiyūmīlīja.

¹⁹ Aho wamala kūgīnja mahanga mpungatī ū mu sī ya Kanaani, ūbinha bene ī sī yenīyo kūbiza wingīji wabo.

²⁰ Bahayikala mo ikanza gītī lya myaka magana ane na makūmi atanò, ūbinha balamuji, kūshisha ikanza lya ng'hangi Sang'weli.

²¹ Hūna ū ng'wikanza lyenīlo būlomba ntemi; ū Mulungu ūbinha Saulo ng'witūnja o ng'wa Kishi, munhū wa lūganda lo ng'wa Benjamini, ūbasuga ikanza lya myaka makūmi ane.

²² Aho wang'wīnja ū ng'wenūyo ūbabūūkīja Daūdi kūbiza ntemi wabo; ūyo akankaanīla alīhaya gīkī, ‘Naapandīkile munhū ūyo alī hang'holò yane, Daūdi ng'witūnja wa ng'wa Yese, h'ūyo akūshikīlīja pyī īyo nītogilwe.’

²³ Ng'hana lyūshika nose ī likanza, ū Mulungu ūgūshikīlīja ū mhayo ūyo walī wang'wisagīja ū Daūdi. Ū kūfuma ū mu lūganda lokwe ūbenhela a Baisilaeli Mpīja, ng'wene Yesu.

²⁴ Aho ataalī ū kūshika ū ng'wenūyo, Yohana wandya kūbalomeela pye a Baisilaeli mihayo ya būbatīījiwa na kūgalūka.

²⁵ Ū Yohana aho wegeela kūmala ū nīmo gokwe ūbawīla gīkī, ‘A bing'we muliganika ū nene hū nalī ng'wene? Natī ng'wene ū nene, alīyo managi gīkī a ha numa yane aliza ū wei. Ū nene natigeleelilwe nūūlū kūtaligūla shilatū kū mhambala jakwe ū wei.’

²⁶ “Bababa, badūgū bane, ba lūganda lo ng'wa Abulahamu, na a bing'we abo mung'ogohile Mulungu, ū mhayo gwa būpīji wenūbū gwatūmilwe kūlwa nguno yise.

²⁷ Nguno a banhū ba Yelusalemu na a batongeeji babo baalī batang'witegelegije ū munhū ng'wenūyū, alīyo aho banamula, būbiza bīshikīlīja īyo īhayiwe na bahangi abo bakasomagwa būlī sabato.

²⁸ Nguno nūūlū īkī batapandīkile mhayo gose gose gwa kūng'wenheleja kūcha ū Yesu, alīyo nahene bakangaagaanīla ū Pilato gīkī anamule nsango gwa kūbūlagwa.

²⁹ Aho bamala maja pyī īyo yandīkilwe kūlwakwe, būng'wicha a ha līntī, būnaaja mu shigila.

³⁰ Gwike ū Mulungu akanjūūcha kūfuma ū mu bafu.

³¹ Wiyoolecha ikanza lya shikū ningī ū kū banhū abo walī wiza nabo Yelusalemu kūfuma Galilaya; abo bakūnkaanīlaga kū banhū ī haha.

³² A bise nise tūlīmulomeela gīkī, ū kwisagījiwa ūyo bakinhwa bakūlūgenji bise kwashikīlījiwe.

³³ Nguno ū Mulungu watūshikīlīgīgije a bise baana, unhimbula ū Yesu, gīt'ūmo gwandīkilwe mu Zabuli ya kabīlī; gīkī, ‘Ū bebe ūlī Ng'wana wane, Ī lelo yenīyī naakūbyalaga.’

³⁴ Nguno wanjūūkije kūfuma mu bafu atīko kūshoka hangī mu būkenaagūku, gīt'ūmo gūhayiwe gīkī, ‘Nakūkwinha bebe ī shikolo sha ng'wa Daūdi, Īsho shilī sheela na sha ng'hana.’

³⁵ H'ī nguno yene alīhaya n'ipandī līngī gīkī, ‘Ūtūnekanīja ū Ng'wela wako ashike mu būkenaagūku.’

³⁶ Nguno īlī hape gīkī ū Daūdi aho wamala ū nīmo ū mu shibyalīlwe shakwe, akacha gīt'ūmo kalī kahelele ka ng'wa Mulungu, ūjīkwa, ūlaala hamò na bakūlūgenji bakwe, ūbola.

³⁷ Alīyo ūyo wajūūchiwe na Mulungu, ū ng'wene atakūbonile ū kūbola.

³⁸ Ali lūūlū bababa badūgū bise, managi gīkī ū mulī munhū ng'wenūyū ū Yesu, mulīlomeelwa mihayo ya būlekejiwa bo shibi.

³⁹ Nīyo būlī ng'wene ūyo ūnzunya ū munhū ng'wenūyū, akūbalīlwa būtūngīlīja nū mu yīngī īyo mutadūgije kūbalīlwa būtūngīlīja mu nzīla ya kūdima shilagīlo sha ng'wa Musa.

⁴⁰ Nose hū kūhaya ilang'hanagi gūtizung'wizīīla ūyo gūhayiwe na bahangi gīkī,

⁴¹ ‘Bing'we badalahi lolagi, na mukumye kūshisha muche, nguno ū mu shikū jing'we nalībeeja nīmo, nīmo ūyo mutūgūzunya nūūlū munhū ūmuwīla.’”

⁴² Hūna aho bafuma ū ng'wisinagogi, a banhū būbalomba babasomboolele hangī ī mihayo yenīyo na ha sabato yīngī.

⁴³ Lyahayūshila ī libilinga, Bayudaya bingī na bahembekwa abo baalī bakomeezu mu kūlamya, būbalondeela a ba Paulo nū Balinaba. Bakabahūgūla na kūbakomeleja gīkī bikale mo ū mu shigongo sha ng'wa Mulungu.

⁴⁴ A ha sabato ī yīngī, hihī pyī ū nzengo gwikuminga kwiza kūdegeleka mhayo go ng'wa Seeba.

⁴⁵ A Bayudaya aho bagabona a mabita bakokala wilu, bandya kūng'wihalalīja ū Paulo, na kwīsondagūla īyo wīhayaga.

⁴⁶ Alīyo a ba Paulo nū Balinaba būyomba na būgimu būtaale gīkī, “Ū mhayo go ng'wa Mulungu gwalī gwigelile gwenhwe kū bing'we tame; gwike ī haha īkī mulīgūponya, twabagalūkīla banhū ba mahanga. Bing'we benekīlī mulibala gīkī mutigeleelilwe kūwanukūla ū būpanga butashilaga.

⁴⁷ Hū gwene ū mhayo ūyo atūlagīlile ū Seeba; nguno alīhaya gīkī, ‘Nakūtūūlile kūbiza isana kū mahanga, ūbize wa kūtwala būpīji hose hose, kūshisha kū ngelelo ya sī.’”

⁴⁸ A banhū ba mahanga aho bigwa gīko bakayega būgūkūja ū mhayo go ng'wa Seeba. Pye a bose abo baalī babalīlilwe būpanga bo welelo bakazunya.

⁴⁹ Ū mhayo go ng'wa Seeba gūsambaala pye a hose ū mu sī yenīyo.

⁵⁰ Alīyo a Bayudaya bakabahūmbūūla bakīma balebe, baalī bakūjiwa na bakomeezu mu kūlamya, hamò na bagosha abo baalī batongeeji ba mu nzengo; būbabūūkīja būluhiwa a ba Paulo nū Balinaba, hanuma būbapeeja ū mu sī yabo.

⁵¹ Nabo bīnga ng'hana, nīyo būlūkung'unha nū lūbuubu ūlo lwalī kū mhambala jabo; būja būūkashika Ikonio.

⁵² Alīyo a bahemba bakokala būyegi na Moyo Ng'wela.