Shītwa 11 - Bibilia Ilagano Lya Kale 2015

Petelo kūbasomboolela batūng'wa biye

¹ A batūng'wa na a badūgū ba mu sī ya Būyudaya ī yose, bakigwa nabo ī gīkī na a banhū ba mahanga bagwanukūlile ū mhayo go ng'wa Mulungu.

² Gwike ū Petelo aho waja ī Yelusalemu, būūkashikīla kūnyogeela abo basendamīlile mhayo gwa kūsaalwa.

³ Būhaya gīkī, “Ū bebe wajile kū banhū batasaalilwe, nīyo ūūkalya na kūlya hamò nabo!”

⁴ Nang'hwe ū Petelo wandya kūbasomboolela chiza mu kwihela, ūhaya gīkī,

⁵ “Ū nene naalī mu nzengo gwa Yopa naalombaga, nahayimanīla nahweelwa, nūbona koolechiwa kwa shikolo sha kūbiza gītī nguto gwa ng'wenda ntaale gūlichiwa ha sī kūfuma ng'wigūlū, gūdimīlilwe kū mhembeelo jago ine, gūlenhwa aho nalī.

⁶ Nahayūlola ū mu gatī, nūbona mo shiinū ja mu mapoolu, ja magūlū ane na ja kwigwesa ha sī, na noni ja kūlala.

⁷ Niigwa n'ilaka līlīhaya gīkī, ‘Būūkaga Petelo ūsīnze, ūlye.’

⁸ Nane nūhaya, ‘Yaya Seeba, nguno ū mu nomo gwane shitaalī kwingīla shikolo shose shose sha sagala nūūlū shisoso!’

⁹ Ī lilaka lyūshosha lo kabīlī kūfuma ng'wigūlū līlīhaya, ‘Īsho wamalaga kūsheeja Mulungu ūtashitanage ū bebe gīkī shisoso.’

¹⁰ Ū mhayo gwenūyo gūkashokeelwa ng'hangala idatū, hūna pyī ī shose shūshoshiwa ng'wigūlū hangī.

¹¹ Kūhayimanīla banhū badatū bīmīīla a hanze ya numba īyo naalī nashikīlile; baalī baatūng'wa kūfuma kū ng'wa Kolinelio, kwiza kūlī nene.

¹² Hūna ū Moyo ūniwīla kūja nabo, natizūsusanya nūūlū hado. A badūgū a batandatū aba nabo bakiza hamò nane, tūūkingīla ū mu numba yakwe ū munhū ng'wenūyo.

¹³ Ūtūwīla ūmo akamonela ū malaika wīmīīlaga mu kaya yakwe; ūng'wīla gīkī, ‘Tūmaga banhū kūja Yopa bakang'witane Simoni ūyo akitanagwa Petelo.

¹⁴ Akwiza akūwīle mihayo īyo īkūkwinha būpīji ū bebe na a ba mu ng'wako.’

¹⁵ Hūna ū nene aho nandya ū kūyomba, ū Moyo Ng'wela ūbikīīla nabo gīt'ūmo akatwikīīla dūhū a bise a ha kwandya na kwandya.

¹⁶ A henaho nūyizūkwa ī mihayo ya ng'wa Seeba ūmo akahayīla gīkī, ‘Ū Yohana wabatīījaga na minzī, alīyo a bing'we mukūbatījiwa na Moyo Ng'wela.’

¹⁷ Ī gīsī lūūlū īkī ū Mulungu akabinha ī shakwinha īsho akatwinha na a bise abo tūnzunije ū Seeba Yesu Kilisito, ū nene nalī nani nose nang'hangīje ū Mulungu?”

¹⁸ Aho bīyigwa ī yenīyo būfulīka sele; banoga bandya kūnkumīlīja Mulungu balīhaya gīkī, “Hū kūhaya ū Mulungu wabinhaga kūgalūka nabo a banhū ba mahanga, bingīle mu būpanga.”

Kanisa ya Antiokia

¹⁹ Hūna lūūlū, abo bakasambaala nguno ya būluhiwa ūbo būkilonga kūlwa ng'wa Stefano, bakaja būūkashika Foenike na Kupulo na Antiokia; gwike batagūlomeelile ū mhayo ūlū ītī kū Bayudaya dūhū.

²⁰ Alīyo baalīho bamò babo, baalī bana Kupulo na Kilene; a benabo aho bashika ī Antiokia, būjisomboola ī ng'hūlū ja ng'wa Seeba Yesu na kū Bayudaya ba Shiyunani.

²¹ Ū nkono go ng'wa Seeba gwalī hamò nabo, banhū bingī būzunya, būngalūkīla Seeba.

²² Ū mhayo gwenūyo aho gwahayūshika ū mu matū ga banhū ba Yelusalemu, būntūma Balinaba kūja ī Antiokia.

²³ Aho washika ko ūyega no ū kūshibona ī shigongo sha ng'wa Seeba. Hūna ūbakomeleja pye a bose gīkī badimane na Seeba mu moyo gūmò.

²⁴ Nīyo īkī ū wei walī munhū wawiza, na okalile Moyo Ng'wela na kūzunya, banhū bingī biza ū kūlī Seeba; lyūkūla ī libita.

²⁵ Akīīta ūja Taso kūjūnkooba Saulo.

²⁶ Aho wampandīka wiza nang'hwe ī Antiokia; būmala ng'waka ngima ū mu kanisa bakūlangaga ibita itaale lya banhū. Nīyo ī Antiokia h'ūko a bahemba bakandīja kwitanwa gīkī Bakilisto.

²⁷ Ū mu shikū jenījo biza bahangi ī Antiokia kūfuma Yelusalemu.

²⁸ Ūmò wabo, witanagwa Gabata, hūna wīmīīla ūhanga mu nguzu ja ng'wa Moyo gīkī nzala nhaale īlī hihī kwilonga hose pyī ū mu sī; (na ng'hana īkilonga mu shikū ja ng'wa Kilaudio).

²⁹ Hūna pye a bahemba bizunīlīja, gīkī būlī ng'wene ūyo walī na būdūla asooge sha kūbagunanha a badūgū ba mu sī ya Būyudaya.

³⁰ Na ng'hana būshikīlīja, būbatwalīla banamhala ba kwene mu makono ga ng'wa Balinaba na Saulo.