Shītwa 10 - Bibilia Ilagano Lya Kale 2015

Malaika na Kolinelio

¹ Walīho ngosha ūmò mu Kaisalia witanagwa Kolinelio, ntaale wa bashilikale igana; w'ibita litanagwa lya Italia.

² Ū munhū ng'wenūyo walī ntūngīlīja, nī kaya yakwe ī yose, hangī walī ang'ogohile Mulungu; nīyo walī ng'wiza ng'holò no ū kū banhū, na wanombaga Mulungu gwa gwa gwa.

³ Lwise lūmò makanza gītī ga sa kenda ya līīmi, ū munhū ng'wenūyo ūmona malaika hape hape mu koolechiwa. Akingīla ū mu ng'wakwe; ūshika ūng'witana, “Kolinelio.”

⁴ Ū Kolinelio ūnkalalīla kūnū ogohaga; wanoga nose ūhaya, “Ni ginehe Seeba!” Ūng'wīla gīkī, “Ū kūlomba kwako nū wiza ng'holò wako shanukūlilwe kwigūlya, kūbiza shizūkījo kūlī Mulungu.

⁵ Ali lūūlū, ī haha tūmaga banhū baje Yopa, bakang'witane alīko koi Simoni akitanagwa Petelo.

⁶ Alendile ha ng'wa Simoni nkomi wa makūnza, numba yakwe īlī hihī na nyanza!”

⁷ Aho wīnga ū malaika ūyo wayombaga nang'hwe, ū Kolinelio ūbitana babīlī ba batūmami ba ha ng'wakwe, na nshilikale ūmò, ūyo walī ng'wishigwa mu kūlamya, ūmò wa bashilikale abo bikalaga hamò nang'hwe gwa, kūlwa kūntūmamīla.

⁸ A banhū benabo ūbasomboolela pyī ī mihayo yenīyo, hūna ūbatūma ī Yopa.

Petelo koolekejiwa na Moyo Ng'wela

⁹ Ū kū ntondo yaho aho balīja, bahayūgwegeela ū nzengo, ū Petelo nang'hwe ūsangwa walinha kwigūlya ya numba mu makanza ga kūlomba, gīkī akalombe kwenūko; yalī gītī sa itandatū.

¹⁰ Alīyo īkī walī watuuba, wandya kwiganika mhayo gwa shilīwa, gwike baalī bataalī būzugīja; wahayimanīla wahweelwa.

¹¹ Hūna ūbona ī ligūlū lyakundūka, na shikolo sha kūbiza gītī nguto gwa ng'wenda ntaale gūlichiwa ha sī, gūdimīlilwe kū mhembeelo jago ine.

¹² Ū mu gatī jalīmo shiinū ja būlī mbika, ja magūlū ane, nī ja kwigwesa ha sī, na noni ja kūlala ja būlī mbika.

¹³ Lyūng'wizīīla n'ilaka līlīhaya gīkī, “Petelo, būūkaga ūsīnze ūlye.”

¹⁴ Nang'hwe ū Petelo ūhaya, “Yaya Seeba; ū nene nataalī kūlya shikolo sha sagala nūūlū shisoso.”

¹⁵ Ī lilaka lyūng'wizīīla hangī lūkangala lwa kabīlī līlīhaya, “Īsho wamalaga kūsheeja Mulungu, ūtashihayage ū bebe gīkī shilī shisoso.”

¹⁶ Ū mhayo gwenūyo gūshokeelwa ng'hangala idatū, hūna haho na haho ī shiseme shenīsho shūdutwa kūlinhyiwa ng'wigūlū.

¹⁷ Ū Petelo aho ataalī akwibūja būjaga a makūlū ga mhayo ūyo akagūbona gwenūyo, a banhū abo baalī batūng'wa kūfuma kū ng'wa Kolinelio kwiza kwīkooba ī numba ya ng'wa Simoni, būshika bīmīīla ha mita.

¹⁸ Būbūja ūlū alīho hoi Simoni ūyo akitanagwa Petelo.

¹⁹ Ū wei ū Petelo akasangwa ataalī alīgwideedeng'hanya ū mhayo gwenūyo, hūna ū Moyo ūng'wīla gīkī, “Balīho banhū badatū balīkūkooba.

²⁰ Būūkaga wike ūje hoi ūkababone, ūtizūsusanya nguno nabatūmile nene.”

²¹ Wika ng'hana ū Petelo ūja aho baalī a banhū benabo; ūshikīla kūbabūja gīkī, “Angū mmho mulīnikooba nene, mulī na mhayo kī?”

²² Nabo būng'wīla, “Kolinelio wawīlilwe na malaika ng'wela, gīkī akwitane ūje kū ng'wakwe ūkansomboolele mihayo milebe īyo ūlī nayo. Ū wei nshilikale, munhū ntūngīlīja na wa logohano kūlī Mulungu; nī lihanga lya Bayudaya līkankaanīlaga gīko.”

²³ Hūna ūbeegeleja bingīla mu kaya, ūlenda nabo. A ha ntondo yaho ūbūūka ūja nabo, hamò na badūgū bangī ba kūfuma Yopa.

Būsombooji bo ng'wa Kolinelio

²⁴ Būūkashika ī Kaisalia kū ntondo yaho hangī. Ū Kolinelio olī abalindīīlile, nīyo olī olaalīka na badūgū bakwe, hamò na banwani biye.

²⁵ Ū Petelo aho alingīla, ū Kolinelio ūng'wanukūla, kūnū alīngwīla mu magūlū gīkī anamye.

²⁶ Alīyo ū Petelo ūngūngūmūla ūng'wīla, “Būūkaga; nū nene nalī munhū dūhū gītī bebe.”

²⁷ Aho wamala ū kūyomba nang'hwe, wingīla ū mu kaya ūsanga balīmo moi bingī bibilingaga.

²⁸ Ūbawīla, “A bing'we mumanile gīkī ītazunīlīgije ū munhū ū Nyudaya kwisangīja na banhū ba mahanga gangī, nūūlū kūbageniha; alīyo ū nene wanilemegije ū Mulungu natizūng'witana munhū nūūlū ūmò gīkī wa sagala nūūlū nsoso.

²⁹ H'ī nguno yene aho nawīlwa natahalalīlile, niza dūhū; nose lūūlū ī haha nalībūja, hīmba ng'wanitanīlaga mhayo kī?”

³⁰ Ū Kolinelio ūhaya gīkī, “Jabītaga shikū ine, naalī mu ng'wane ng'wenūmu nalombaga makanza gītī genaya ga sa kenda, kūhayimanīla munhū wīmīīla kū būtongi bone, azwalile myenda yape.

³¹ Ūhaya, ‘Kolinelio, ū kūlomba kwako kwigwiwe, na a manong'ho gako gizūkīlilwe ū kūlī Mulungu.

³² Ali lūūlū, tūmaga banhū baje Yopa, bakang'witane Simoni, lina līngī Petelo; alīho alendile ha kaya ya ng'wa Simoni nkomi wa makūnza, īlī haho na nyanza.’

³³ Na ng'hana haho na haho nūtūma banhū kwiza ū kūlī bebe, wabeeja no ū kwiza. Nīyo lūūlū, a bise tūlīho aha, pye a bose tūlī kū būtongi bo ng'wa Mulungu, twalindaga kwigwa dūhū īyo ūlagīlilwe kūfuma kūlī Seeba.”

Būsombooji bo ng'wa Petelo

³⁴ Hūna ū Petelo wandya ū kūbasomboolela alīhaya gīkī, “Gashinaga ng'hana ū Mulungu atī na būsolanhya,

³⁵ alīyo pyī ū mu mahanga akanukūlaga būlī munhū ūlū ūbiza ntūngīlīja.

³⁶ Ū gwenūyū hū mhayo ūyo akabatūmīla Baisilaeli, ūbenhela būlomeeji bo mhayo gwa mhola mu nzīla ya ng'wa Yesu Kilisito, ūyo alī Seeba wa bose.

³⁷ A bing'we mugūmanile ū mhayo ūyo gūkilonga mu Būyudaya, gūsambaala hose pye ū mu sī yenīyo kwandīja Galilaya, aho bobīta ū būbatīīja ūbo Yohana wabūlomeelaga.

³⁸ Ū Mulungu walī ang'witīīlile Moyo Ng'wela na būdūla ū Yesu wa Nazaleti, ūyo wajaga hose hose akūbeejaga yawiza na kūbapīja pye abo balī mu būhedekwa bo ng'wa Shetani, īkī ū Mulungu walī hamò nang'hwe.

³⁹ A bise tūlī bakaanīji bayo pyī īyo wabeejaga ū mu sī ya Bayudaya nī Yelusalemu; ū munhū ng'wenūyo bakamūlaga bo kūnungeleja ha līntī.

⁴⁰ Alīyo ū Mulungu unhimbula ha lūshikū lwa kadatū lwaho, ūng'oolecha hape;

⁴¹ gwike ītī kū banhū bose, alīyo kū bakaanīji dūhū, abo Mulungu abasolile. H'a bise abo twalyaga na kūng'wa hamò nang'hwe ū mu shikū ja gīkī wajūūkile kūfuma mu bafu.

⁴² A bise hū bene abo akatūlagīla kūja tūlībalomeela a banhū, na kūfunya būkaanīji gīkī ū ng'wenūyū hūna ng'wene ūyo ahelilwe na Mulungu kūbiza Namuji wa bapanga na a bafu.

⁴³ Hū ng'wene ūyo bankaanīlile pye a bahangi, hama hū ng'wene ūyo būlekejiwa bo shibi shose būdūgije kwanukūlwa mu nzīla ya lina lyakwe.”

Moyo Ng'wela kū banhū ba mahanga

⁴⁴ Ū Petelo aho ataalī wīsomboola ī yenīyo, ū Moyo Ng'wela ūbikīīla pye abo bakagwigwa ū mhayo.

⁴⁵ A Bayudaya abo baalī biza nū Petelo būkumya, nguno na a banhū ba mahanga bakitīīlwa ū Moyo Ng'wela ūyo alī shakwinhwa.

⁴⁶ Būbigwa balīyomba mu ndīmi jingī, hamò na kūnkumīlīja Mulungu. Hūna ū Petelo ūhaya gīkī,

⁴⁷ “Nani ūyo adūgije kūlemeja minzī batizūbatīījiwa a banhū aba, alīyo nabo bang'wanukūla ū Moyo Ng'wela gīt'ūmo bise tūkang'wanukūlīla?”

⁴⁸ Ūlagīla babatīījiwe mu lina lya ng'wa Yesu Kilisito. Hūna būnomba ikale hamò nabo ikanza lya shikū būlebe.