Shītwa 1 - Bibilia Ilagano Lya Kale 2015

Kwisagījiwa Moyo Ng'wela

¹ Baba Teofilo, ī mihayo ya kwandya īyo naamalile kūkwandīkīla, yoolekije pyī īyo wīyītaga ū Yesu, nī yīyo walangaga, kūfuma ha wandījo wa būtūmami bokwe,

² kūshisha aho akanukūlwa ng'wigūlū; ū mu lūshikū ūlo akabinha shilagīlo mu nzīla ya ng'wa Moyo Ng'wela, a banhū abo walī wabasola kūbiza batūng'wa.

³ Aho lyabīta ī likanza lya kūluhiwa kwakwe, jikashika shikū makūmi ane akūmanagiyoolecha ū kū banhū benabo, mu shimanīkījo shabūyaga, īsho shitīko kūhalalījiwa. Jūkwīla ī ng'hangala akwiyoolechaga gīkī alī mpanga, wabasomboolela na mihayo ya būtemi bo ng'wa Mulungu.

⁴ Ū ng'wikanza īlo walī hamò nabo, akabakomeleja ūbawīla gīkī, “Mutizīnga ī Yelusalemu; alīyo shilindīīlagi ī shakwinha īsho wang'wisagīja ū Baba, gīt'ūmo ng'wigwīlile kūfuma kūlī nene.

⁵ Nguno ū Yohana wabatīījaga na minzī, alīyo aho jitaalī kūbīta shikū ningī, a bing'we mukūbatījiwa mulī Moyo Ng'wela.”

Kūja ng'wigūlū kwa ng'wa Yesu

⁶ Hūna aho bibilinga hamò būmūja gīkī, “Seeba angū mmho lyashikaga lūūlū ī haha ī likanza, ūbashokeje ū būtemi a Baisilaeli?”

⁷ Nang'hwe ūbawīla, “Gūtī gwing'we ū gwa kwīmana ī ya kajīle na kagalūkīle ka makanza, īyo Baba ayītūūlile mu būdūla bokwe.

⁸ Alīyo ūlū alang'wizīīle ū Moyo Ng'wela mukwanukūla nguzu; mubize bakaanīji bane ū mu Yelusalemu, nī Būyudaya ī yose, nī Samalia; kūshika kū ngelelo ya sī.”

⁹ Aho ataalī ūhaya ī mihayo yenīyo, bahayimanīla obūūchiwa balolile; ilunde lyūnshīkīja, boya ū kūmona.

¹⁰ Baalī bataalī bakalalīlile ng'wigūlū, ū ng'wene ūbiza omalaga kūja, kwimanīla bīmīīla haho nabo banhū babīlī bazwalile shizwalo shape.

¹¹ Būbawīla gīkī, “Bing'we bana Galilaya, nibūlī ng'wīmīīlaga ng'ūkalalīla ng'wigūlū? Ū Yesu ūyo wamala kwanukūlwa ng'wigūlū kūfuma kū bing'we ng'wenūyū, akwiza hangī gīt'ūmo ng'wamonelaga ajile ng'wigūlū gīko.”

Wa kwingīla ha ng'wanya go ng'wa Yuda

¹² Hūna būshoka Yelusalemu, bīnga ū kū lūgūlū ūlo lūkitanagwa lo mizeituni; lūlī hihī nī Yelusalemu, gītī lūgendo lwa ha sabato.

¹³ Aho bashika bingīla mu chumba sha kū golofa; h'ūko būyikala, baalī ba Petelo na Yohana na Yakobo na Andulea, Filipo na Tomaso, Batolomayo na Matayo, Yakobo ng'wana Alifayo na Simoni Zelote na Yuda ng'wana Yakobo.

¹⁴ Pye a benaba baalī na moyo gūmò gwa būkomeezu mu kūlomba gwa gwa gwa. Ū ng'wigele lyenīlo baalīmo na bakīma; hamò nū Malia ū nina wa ng'wa Yesu, na a baana ba ng'wawe ū Yesu.

¹⁵ Hūna ū mu shikū jenījo, ū Petelo wīmīīla ū ng'wigele lyabo a badūgū, (baalī gītī igana na makūmi abīlī); ūhaya gīkī,

¹⁶ “Bing'we bababa badūgū bane, yalī igelile shishikīīle ī shandīkwa īsho shihayiwe na Moyo Ng'wela kūbītīla mulī Daūdi, kūng'haya ū Yuda, ūyo akabatongeela abo bakandima ū Yesu.

¹⁷ Nguno nang'hwe walī abalilwe hamò nise, walī na ngabo ū mu nīmo gwenūyū.”

¹⁸ (Ū munhū ng'wenūyo akapandīka mheela mu nzīla ya nhūngwa jakwe jabūbi, wītūmamīla kūgūla itongo; ūūkitaalīka ha sī ng'wenūmo, ūtandūka ī nda, widīka pyī ū būla bokwe!

¹⁹ Ū mhayo gwenūyū aho gwamanīka ū kū bana Yelusalemu a bose, būlitana ī litongo lyenīlo mu lūlīmi lwabo gīkī Akelidama, makūlū gaho itongo lya mininga.)

²⁰ “Nguno ū mu shitabo sha Zabuli handīkilwe gīkī, ‘Ū wikalo bokwe būlekwe dalali, nīyo atizūzenga mo munhū ūngī;’ na gīkī, ‘Ū nīmo gokwe gūsolwe na ūngī.’

²¹ “Ali lūūlū, ū mu banhū abo bajaga hamò nise būlī kwene ū ng'wikanza ī lyose īlo Seeba Yesu wingīlaga na kūfuma hamò nise;

²² kwandīja mu shikū ja būbatīīja bo ng'wa Yohana, kūshisha aho watwalīlilwe ng'wigūlū ūtwīngīla, shiigelile ūmò wabo abize hamò nise ū mu kūbūkaanīla ū būjūūko bokwe.”

²³ Hūna būsola banhū babīlī, ūmò wabo Yosefu, lina līngī witanagwa Balisaba, nūūlū Yusto; na Matiya.

²⁴ Hanuma būlomba balīhaya, “Seeba ū bebe wīmanile ī myoyo ya banhū bose, toolekejage ūyo ūlīnsola ū mu babīlī benaba;

²⁵ ūyo igeleelilwe agūsole ū ng'wanya gwa būtūmami nū būtūng'wa wenūbū, ūbo wabūlekile Yuda, ūja kwipandī lyakwe ng'wenekīlī.”

²⁶ Hūna būbatūlīgīja mbale, yūngwīla Matiya, ūbalwa kūbiza ūmò wabo a batūng'wa abo ikūmi na ūmò.