Nomeji 3 - Bibilia Ilagano Lya Kale 2015

Būlī mhayo gūlī n'ikanza lyago

¹ Būlī mhayo gūlī n'ikanza lyago, na būlī kajīle kakabītaga mu lūhelo lwako a ha sīlīlī yigūlū:

² Līlīho ikanza lya kūbyalwa, n'ikanza lya kūcha; ikanza lya kūbība, n'ikanza lya kūdubbūla.

³ Ikanza lya kūbūlaga, n'ikanza lya kūpīja; ikanza lya kūkambagūla, n'ikanza lya kūzenga.

⁴ Ikanza lya kūlīla, n'ikanza lya kūseka; ikanza lya ng'hūngū, n'ikanza lya mbina.

⁵ Ikanza lya kūsambaaja mawe, n'ikanza lya kūbilinga mawe; ikanza lya kūkumbatīla, n'ikanza lya kūleka kūkumbatīla.

⁶ Ikanza lya kūkooba, n'ikanza lya kūjimīīja; ikanza lya kūdimīīla, n'ikanza lya kūponya.

⁷ Ikanza lya kūtandūla, n'ikanza lya kūsuma; ikanza lya kūhuumūla, n'ikanza lya kūyomba.

⁸ Ikanza lya kūtogwa, n'ikanza lya kūkolwa; ikanza lya būlūgū, n'ikanza lya mhola.

Mbūūkī ya wiza na mhola

⁹ Ī gīsī ū ntūmami akapandīkaga solobo kī ū kūfuma ū mu kūkoya nayo ī milīmo yakwe?

¹⁰ Ū nene nībonile ī milīmo īyo Mulungu wabinha a banhū kwīyīta.

¹¹ Būlī shikolo washibeeja gīkī shibize shawiza ng'wikanza lyasho; na būpanga bo welelo bose abatūūlīlile a banhū ū mu ng'holò jabo, alīyo nahene batīko kwīyitegeleja īyo wīyīta kūfuma wandījo kūshisha kū būkalīkījo.

¹² Namanile gīkī ū kū banhū shitīho shawiza gītī kūbiza mu būyegi na kwīta yawiza aho bataalī bapanga.

¹³ Nīyo ū Mulungu abahelelile a banhū gīkī būlī ng'wene alye na kūng'wa, na kwīyegela ī milīmo yakwe pyī ī yose.

¹⁴ Namanile būlī shikolo īsho akashītaga ū Mulungu shilī sha kūshinga ilalī, shitīho sha kongelelejiwa, na shitīho sha kwīnjiwa hoi. Ū Mulungu ashibeegije gīko, gīkī a banhū bang'ogohe.

¹⁵ Īyo īlīho ī haha yalīho nī kale, nī yīyo īlilonge, nayo yalīho na makanza gangī; īyo yabīta kale akīyitanaga hangī ū Mulungu.

Nū būpanga būtī na ngofyoolo

¹⁶ Hūna nūbona shikolo shingī hangī a ha sīlīlī ya līīmi: A ha ng'wanya gwa būlamuji bo ng'hana, būlīho wiboneeji; na a ha ng'wanya gwa būtūngīlīja, būlīho būbi.

¹⁷ Niiwīla ū mu ng'holò yane gīkī, “Ū Mulugu akūbalamula a batūngīlīja na a bahūnga. Nguno ahelile ikanza lya būlī mhayo, na būlī shītīle.”

¹⁸ Aho nalībiganika a banhū nūbona hangī ū mu ng'holò yane gīkī, ū Mulungu akabagemaga a banhū badeebe gīkī batikīlile na ndimu.

¹⁹ Nguno īyo īkajigwīlaga ī ndimu h'īyo īkabagwīlaga na a banhū; ūmo jikachīlaga ī joi, na a bene bakachaaga gīko dūhū. A bose balī na myūyī ya mbika īmò, ū munhū atajikīlile ī ndimu; būlī shikolo shitī na ngofyoolo.

²⁰ Pye bakajaga ipandī līmò, a bose bafumile mu lūbuubu, na pye bakashokaga mu lūbuubu.

²¹ Ī gīsī nani ūyo amanile gīkī ū moyo go ng'wa munhū gūkalinhaga kūja ng'wigūlya, ū gwa ndimu gwaja hasī, gwajimīlīla mu sī?

²² Hūna lūūlū nūbona gīkī gūtīho gwawiza ū kūlī munhū kūtinda kūgayegela a matwajo ga milīmo yakwe, nguno ū gwenūyo hū ngabo gwakwe. Nani ūyo akūng'wenha hangī, ize ibone īyo īlilonge a ha numa yakwe?