Nomeji 2 - Bibilia Ilagano Lya Kale 2015

Ndūhū ngofyoolo ū mu kūyegela ya sī

¹ Hūna niwīla, “Ī gete nageme ū kwīyegela ī ya mu sī; haho lūūlū, yegaga”. Alīyo nū ng'wenūmo nūbona ndūhū mo ī ngofyoolo.

² Nūhaya, “Ū kwisekeleja gūlī mhayo gwa nyabbūūlī; ī gīsī ū mu kūyega shilīmo kī ī sha kūsola?”

³ Nūgema kūyūgūzalabanya ū mīlī gone mu nzīla ya kūng'wa walwa, kūnū nū būbbūūlī nataalī nadimanile nabo, na a maganiko gane gataalī gakūnitongeelaga mu masala. Naalī na ng'hūmbū ja kwīmana īyo ībigelile kwīyīta a banhū aho bataalī ha sīlīlī y'igūlū, ū mu shikū ī ngehu ī ja būlamu wabo.

⁴ Nakīīta milīmo mitaale, nizengela manumba na kūlīma migūnda ya mizabibu.

⁵ Nibeegeja migūnda misoga mitaale na mido, nūhamba mo mitī ya matwajo ya būlī mbika.

⁶ Nūsīmba na nzwinzī jane nene ng'wenekīlī, ja kūyūdaha a minzī nalitīīla ī lipoolu lya mitī ūlū īlīkūla.

⁷ Nūgūla na basese bagosha na bakīma, na a basese ba kūbyalīlwa ha ng'wane nabo būkwīla no. Hama a madaale ga ng'holo nī ng'ombe ayo naalī nago gaalī mataale kūbaheeba pye a banhū abo baalī mu Yelusalemu aho nataalī ū nene ū kūbiza ho.

⁸ Nūsoleleja feza na zahabu ningī no, na sabo jingī na jingī ja kūfuma kū batemi ba sī nhaale na ndo. Nūpandīka na bīmbi bingī, bagosha na bakīma; na bakīma bingī nūbilingīja kūlwa kwiyeja gīt'ūmo īdūgije kūyegela ng'holò ya ngosha.

⁹ Nūhangama kīngī nasho, nūbiza ntaale kūbaheeba pye abo baalīho ū mu Yelusalemu aho nataalī ū nene ū kūbiza ho. Ū mu yose yīnīyī, ū witegeleja bone naalī na taalī nabo dūhū.

¹⁰ Natilemegije mhayo gose gose ūyo miso gane gaagwikūmbagwa; nī ng'holò yane natīgobbile sha kwiyeja shose shose. Ī ng'holò yane yayegaga no kūlwa milīmo yane yose, ī lyenīlī hū lyalī inong'ho ū mu būnoge bone ū bose.

¹¹ Alīyo nahene aho nīlola pyī īyo naalī nīyīta na makono gane, nū mumo naanogelaga ū kwīyīta, nūbona ū mu yose yenīyo ndūhū mo ngofyoolo, gwenūyo mhayo gwa kūpeeja lūyaga dūhū, ndūhū sha kūpandīka gete a ha sīlīlī ya līīmi!

Ū wa masala nū mbūūlī bakachaaga

¹² Nūbona nagalūche a maganiko gane, nagideedeng'hanye a masala nū lūtūgà, nū būbbūūlī. Nguno ūyo alize a ha numa ya ntemi akwīta kī ī gīsī ī sha kūkīla a ha shikolo īsho shamala kwītwa?

¹³ Nūbona gīkī a masala gabūtindile ū būbbūūlī, gīt'ūmo isana līshitindile ī giiti.

¹⁴ Ū wa masala alī na miso ū mu ntwe gwakwe, alīyo ū mbūūlī akashimīzaga alī mu giiti; gwike nahene nūbona gīkī pye bakagwīlagwa mhayo hū gūmò dūhū.

¹⁵ Hūna niwīla ū mu ng'holò yane, Ī gete kī lūūlū īsho nalīpandīka ū mu kūbiza na masala? Nguno ūyo gūkūngwīla ū mbūūlī, nū nene gūkūnigwīla hū gwenūyo dūhū! Hangī niwīla ū mu ng'holò yane, “Ū gwenūyū nago gūtī na ngofyoolo!”

¹⁶ Nguno ū wa masala atikīlile nū mbūūlī, lītūkūla ī likanza bataalī bakwizūkīlagwa; ū mu shikū ījo jiliza a bose bakwībīlwa gete. Nguno pye bakachaaga, ū wa masala nū mbūūlī!

Kūminyiwa milīmo kūtī na ngofyoolo

¹⁷ A henaho lūūlū nūbūkolwa no ū būpanga, nguno īyo īkīītagwa a ha sīlīlī ya līīmi, ū kūlī nene īlī ya kūpīnīhaja no; pyī ūmo īgelelile ītī na ngofyoolo, nguno īlī ya kūpeeja lūyaga dūhū.

¹⁸ Pyī ī milīmo yane īyo yaninoja kwīyīta a ha sīlīlī ya līīmi nūyīdalaha no, nguno nakabona gīkī shinigeleelilwe kūnekela munhū ūyo alize ha numa yane.

¹⁹ Ī gīsī nani ūyo amanile ūlū akūbiza wa masala, nūūlū mbūūlī? Alīyo nahene hū ng'wene akūbiza ntaale wayo ī milīmo yenīyo, īyo nīnoga nogela nene, nakūtūmamīlaga masala gane ha sīlīlī ya līīmi. Ū gwenūyū nago gūtī na ngofyoolo gete.

²⁰ Gūkaniminya no, gūnigwisha ng'holò ū kū milīmo yane pyī īyo yaninojaga nakwītūmamaga ha sīlīlī ya līīmi.

²¹ Nguno ū munhū nūūlū akaminyīka akwītaga milīmo na masala, na witegeleja hamò na būgoogo būtaale, alīyo nahene pyī ī shikolo shakwe shiigelile anekele munhū ūngī, ūyo atashinogelile. Ū gwenūyū hū gwa sagala gete, hama mi no!

²² Ū munhū akūpandīka solobo kī lūūlū ū kūfuma ū mu milīmo nū būnoge bokwe ūbo akūnoga nogaga a ha sīlīlī ya līīlmi?

²³ Nguno pyī ī shikū jakwe ī milīmo yakwe ya kūsedeecha na kūsaatya mīlī; nū būjikū a maganiko gakwe gatifuulaga yaya; nū gwenūyū nago gūtī na ngofyoolo.

²⁴ Ū kūlī munhū gūtīho mhayo gwawiza gītī kūlya na kūng'wa na kūshiyegela īsho akūshinoga nogelaga. Alīyo nago ū gwenūyū naagūbonile gīkī gūfumile mu nkono go ng'wa Mulungu.

²⁵ Nguno ūlū atī wei nani ūyo adūgije kūlya na kūng'wa na kūyega?

²⁶ Ū Mulungu akang'winhaga masala, witegeleja, na būyegi ū munhū ūyo akīītaga ya kūnyeja we, alīyo ū ng'hūnga, akang'winhaga milīmo ya kūbilingīja na kashilūndīka, alanekele ū munhū ūyo anyegije Mulungu. Ū gwenūyū nago gūtī na ngofyoolo, gūlī gītī kūpeeja lūyaga.