Nomeji 11 - Bibilia Ilagano Lya Kale 2015

Wibīkīja kūlwa ha ntondo

¹ Gaponejage minzī ī shilīwa shako, nguno hanuma ya shikū kaganda ūkūshipandīka hangī.

² Nong'haga banhū mpungatī, alichene, nūūlū banaane gīko; nguno ūtagamanile a makoye ayo gashikile kwilonga ū mu sī.

³ A malunde ūlū gūbunwa minzī gakitaga mbula a hasī. Ū ntī ūlū gūūgwa gūlolelile dakama nūūlū sukuma, gūkūlambalala ilalī a h'ipandī Īlo gwagwīlaga.

⁴ Ū wa kūlendela kūlola lūyaga atīko kūbība, nū yūyo akalindīīlaga kūbona malunde atalagesa.

⁵ Ūmo ūtamanīlile kajīle ka lūyaga, nūūlū ūmo maguha gakabeegejiagwa mu nda ya myīle, h'ūmo ūtadūgije kūgūmana nū nīmo go ng'wa Mulungu, ū Meeja wa shose.

⁶ Ipuunage dilū ūbībe ī mbīyū jako, nī mhīndī ūtizūkuna makono dūhū, nguno ūtamanile jilī ījo jikūkwangūhīla; Īji nūūlū hamo ījo, nūūlū jikūbeela pye.

Kūng'wizūkwa Mūmbi mu būsūmba

⁷ Ī lisana inonu no, nīyo a miso gakayegaga ū kūlībona ī līīmi.

⁸ Ū munhū ni alamage myaka mingī, nīyo ayīlūmbe pyī ī yose. Alīyo shiigelile kūlizūkwa ī likanza lya shikū ja giiti; nguno līkūbiza ilīhu. Pyī īsho shikūlondeela shikūbiza shitī na ngofyoolo.

⁹ Bebe ng'walūki yegaga aho ūtaalī ndinha, leka ī ng'holò yako īkūyeje ū mu shikū ja walūki wako, shimīzīlaga mo dūhū ū mu katongeelele ka ng'holò yako, na kūshilondeela shose īsho miso gako gakūshibonaga. Gwike managa gīkī, ū Mulungu akūkūlamula ū mu yose yenīyo.

¹⁰ Hūna lūūlū īnjaga ū būpīna ū mu ng'holò yako, nī ya malofu yīnge ū mu mīlī gwako; nguno ū walūki nī nguzu ja ha būdinha shitī na ngofyoolo.