Nomeji 10 - Bibilia Ilagano Lya Kale 2015

Munhū wa masala na munhū mbūūlī

¹ A maguta nūūlū galī na ng'waso gwawiza, ūlū jūchīla mo ngi gakanung'haga kībi; nū būchilū h'ūmo būlī, nūūlū būkabiza būdo būkakenaagūlaga masala n'ikūjo.

² Ī ng'holò ya munhū wa masala Īdīlīīlile mihayo migololoku, alīyo ī ng'holò ya mbūūlī ī yene Īdīlīīlile mihayo ya sagala.

³ Ū mbūūlī nūūlū akūshimīzaga ng'wipanda akabizaga agehelilwe, nīyo akiyoolechaga kū banhū bose gīkī gatīmo.

⁴ Ū nsugi ūlū ūkūpelanīla yaya ū kwīta isuku; nguno ū būlembeezu būkapojaga mihayo nūūlū mitaale.

⁵ Būlīho būbi naabonīle a ha sīlīlī ya līīmi, bo kūbiza gīt'ūbo būkīītagwa na basugi;

⁶ Babbūūlī bakūtūūlagwa mu mapandī mingī g'ikūjo, a basabi baayūlekwa ha sīlīlī.

⁷ Naabonile na basese bazenzemalile ha migongo ya nzobe, alīyo a bataale hū bakūshaadūkaga lwa magūlū gītī basese.

⁸ Ū wa kūsīmba ichongo akagwīlaga mo wei ng'wenekele, ū wa kūtwinya lūgūtū akagomagwa nzoka.

⁹ Ū melagūji wa mawe gadūgije kūnchūūbagūla we ng'wenekīlī, ū mpandūji wa magogo h'ūyo akūseeseelwa nūūlū na mantī.

¹⁰ Ī mbasa ūlū yūduumīla, ū ntūmamīji wayo ūlū atīnoolile akūtūmamīla nguzu ningī kūtinda; a masala h'ayo gakagunanhaga kūbeeja īyo shiigelile yītwe.

¹¹ Ī nzoka ūlū yūngoma munhū, ūlū būtatūmamīlilwe būgota ū ng'wilamanzūji atī na gwa kwīta.

¹² Ī mihayo ya kūfuma mu nomo gwa munhū wa masala īkayejaga, alīyo ū mbūūlī akabūlajiagwa nomo gwakwe we ng'wenekīlī.

¹³ Ūlū alandya ū kūyomba Īkafumaga mihayo ya nyachilū, alīkakalīcha lwabizaga lūtūgà lwa nyasaji.

¹⁴ Nīyo ū mbūūlī akūloloma mihayo mingī no. Atīho wa kūmana īyo īkwilonga ū kū būtongi, nani adūgije kūngunanha ayitegeleje Īyo īkūng'wilongela a ha numa ya henaho?

¹⁵ Ū mbūūlī īkansedeechaga ī milīmo, wakījimīīlwa nī nzīla ya kūnshosha kaya.

¹⁶ Bebe sī, ū ntemi wako ūlū alī nyanīgīnī ūlī mu makoye, na a basugi bako ūlū bakipunaga kwandya kūlya shilīwa.

¹⁷ Alīyo ū bebe sī ūlī na mbango, ū ntemi wako ūlū ng'wana wa ng'wikūlū; na a basugi bako ūlū bakigashaga kūlya mu makanza ayo gigeleelilwe, gīkī bapandīke nguzu, Ītī kūlwa būlaku.

¹⁸ Kūlwa guno ya boolo nūmba ikuhombokelaga, Na kūlwa guno ya winogolelwa wa makono nūmba ikuzwaga.

¹⁹ Ī shigukulu shikatūūlagwa banhū bapandīke būyegi, ī divai īkazalabanyaga būpanga; Ī hela jikagunanhaga mu yose.

²⁰ Ūtizūgima kūndūka ntemi wako, yaya nūūlū mu maganiko gako; nū nsabi yaya ū kūnsondagūla nūūlū ūbize ūlī mu chumba shako. Nguno ī mihayo yako īshikile kūjanwa noni ya kūlala, īyo ūkwīhayaga īdūgije kūpulwa inoni lya manana lyūja kwīhooyela.